Ntchito za atumwi 24:1-27
24 Papita masiku 5 kwefwika nkulu wa ansembe Hananiya pamozi na akulu ayakine, komasoti munthu muyakine woziŵa kulaŵila,* zina yake Telitulo. Ove eyamba kufotokoza mulandu wa Paulo kwa gavana.
2 Telitulo pechipasiwa mwayi kuti alaŵile, eyamba kuyopejela Paulo kuti:
“Tili pa ntendele ngako chifukwa cha mwewo, komasoti vinthu vuchinja mu ntundu wasu wamene uyu chifukwa cha nzelu zanu zuwona patali.
3 Tetyo nthawe zonse komasoti kulikonse, mwewo Wolemekezeka a Felike, sewo tuwona nzelu zanu zamene izo ndipo tutembeja ngako.
4 Koma kuti osati nikutaisheni nthawe, nusenga kuti mutiwamile ntima ndipo mumvwe mawu ŵasu patontho.
5 Sewo tawona kuti munthu wamene uyu ni wovutisha ngako, ndipo oyambisha nkhani zoukila boma pakati pa Ayuda pa chalo chonse. Komasoti ni nsogoleli wa gulu ya mpatuko ya ŵanthu aku Nazaleti.
6 Komasoti yove enzefuna kuifya kachisi ndipo timukata.
7 ——
8 Kuti mumukonshe, mungakwanishe kusimikijila mweka vonse vamene ivi vatunena.”
9 Pechilaŵila vamene ivi, nawosoti Ayuda eloŵelelapo ndipo enzenena mosimikija kuti vamene ivo ni vachendi.
10 Gavana wamene uyo pechiuja Paulo na mutu kuti alaŵile, Paulo eyankha kuti:
“Nuziŵa kuti mwankhala wotonga wa ntundu wamene uyu kwa vyaka vinyinji. Tetyo nine wokondwela kulaŵila politeteza pa vakunilaŵilila vamene ivi.
11 Mwewo mungakwanishe kufwana umboni wakuti masiku 12 aliyesile kufumila peniluta ku Yelusalemu kuyalambila Mulungu.
12 Ndipo ove amene aŵa aliye nifwanepo m’kachisi nushushana na aliyense. Aliye nifwanesoti nuyambisha nsokonezo mmalo opemphelela olo payakine paliponse mu tauni yamene iyi.
13 Ndipo apa angakwanishelini kukupasani umboni wa vamene ivi vakunilaŵilila.
14 Koma chanuvomekeja kuli mwewo ni chakuti: Njila yolambilila yakunena ove kuti gulu ya mpatuko niye yanukonkheja newo potumikila Mulungu wa makolo ŵangu. Chifukwa nukhulupilila vonse vili mu Chilamulo na vechilemba aneneli.
15 Ndipo newo nili na chiyembekezo monga ni chali nachosoti ŵanthu amene aŵa kuti Mulungu azaushe olungama na osalungama kumo.
16 Chifukwa cha vamene ivi, nuyeja-yeja mwakhama kuti ninkhale na chikumbuntima chiweme kwa Mulungu komasoti kuli ŵanthu.
17 Lomba pavuli pa vyaka vinyinji, niwela kuzatwala mphaso zachifundo kuli ŵanthu a ntundu wangu komasoti kuzapeleka nsembe.
18 Penenzechita vamene ivi enifwana m’kachisi penilituŵisha pokonkheja mwambo. Penzeve gulu ya ŵanthu olo chongo, koma penze Ayuda ayakine ofumila mu chigawo cha Asia.
19 Amene awo kuti enze na chifukwa niye enzefunikila kuwela kuli mwewo kuzanipasa mulandu.
20 Payakine muŵalole ŵanthu amene aŵa alipano, kuti afotokoze ŵeka keno enifwana na mulandu uliwonse penenze nipanama pamenso pa Khoti Ikulu ya Ayuda.
21 Mawu amozi tyala ŵenilaŵila penenze ni panama pakati pawo ni akuti, ‘Newo lelo nutongewa chifukwa cha chiyembekezo chakuti akufwa azauke!’”
22 Pakuti Felike enzeziŵa luweme nkhani yokhuza Njila yamene iyi, epanamika mulandu wamene uyo nonena kuti: “Nizatonge mulandu wanu wamene uyu akazafwika Lusiya nkulu wa masodja.”
23 Yove elamula nsogoleli wa masodja kuti amusunge mu djeli, koma amupaseko ufulu ndipo akolola ŵanthu a ntundu wake kuzamuyavya.
24 Papita masiku atontho, Felike efwika pamozi na mwanakazi wake Dulusila, wamene enze Muyuda. Tetyo Felike eita Paulo kuti awele nomvwishila penzefotokoza vokhuza kukhulupilila Khilisitu Yesu.
25 Koma penzefotokoza vokhuza chilungamo, kulilesha komasoti chiweluzo chikuza, Felike echita wowa ndipo enena kuti: “Teti lomba yamba waluta, nikazafwana nthawe nizakuitesoti.”
26 Komasoti enzeganiza kuti Paulo amupase ndalama. Tetyo enzemuita pafupi-pafupi kuti awele nokambilana naye.
27 Papita vyaka viŵili, Felike eloŵewa mmalo na Polikiyo Fesito. Koma pakuti Felike enzefuna kuti Ayuda akomukonda, echingosiya Paulo mu djeli.
Malizu a m'nyansi
^ Olo kuti, “loya muyakine.”
