Ntchito za atumwi 25:1-27
25 Papita masiku atatu kufumila pechifwika mu chigawo chamene icho Fesito noyamba kutonga, eluta ku Yelusalemu kufumila ku Kaisaleya.
2 Kwamene uko ansembe akulu-akulu na analume olemekezeka pakati pa Ayuda emuuja vinthu viipa vokhuza Paulo. Tetyo eyamba kumupapatila
3 kuti aŵawamile ntima notuma munthu kuyaita Paulo kuti awele ku Yelusalemu. Koma epangana kuti amufisamile pa njila nomupaya.
4 Koma Fesito eŵayankha kuti Paulo ofunikila kusungiwa ku Kaisaleya, komasoti newo nasala patontho kujokela kwamene uko.
5 Tetyo enena kuti: “Ŵanthu amene ali na maudindo pakati panu, tilute nawo pamozi kuti keno pali chilichonse chawaphoniya munthu wamene uyu akamupase mulandu.”
6 Tetyo yove pechinkhala nawo kwamene uko kwa masiku osapitilila 8 olo 10, ejokela ku Kaisaleya. Ndipo nsiku yokonkhapo enkhala pa mpando wotongela milandu nouja ŵanthu kuti alete Paulo.
7 Paulo pechifwika, Ayuda amene ewela kufumila ku Yelusalemu, epanama momuzenguluka nomuyopejela milandu inyinji yoyofya, yamene aliye kwanishe kupeleka umboni wake.
8 Koma Paulo politeteza enena kuti: “Newo niliye chimwile Chilamulo cha Ayuda olo kachisi olosoti Kaisala.”
9 Koma pofuna kuti Ayuda amene awo amukonde, Fesito ekonsha Paulo kuti: “Kansi ufuna kuluta ku Yelusalemu kuti nkhani yamene iyi ikatongelewe kwamene uko pamenso pangu?”
10 Koma Paulo eyankha kuti: “Newo napanama kusogolo kwa mpando wotongela milandu wa Kaisala, kwanufunikila kutongewa. Ayuda niliye ŵaphoniyele chilichonse monga ni mwamuwonelasoti mwewo.
11 Keno nine wophoniya chendi ndipo nufunikila kupaiwa chifukwa cha vanachita, nukanalini kufwa. Koma keno vamene ivi vakuniyopejela ni vosamvwika paliye munthu wamene anganitwale kuli ove kuti aŵakondweleshe. Nuchita apilo kuti nikawonekele kwa Kaisala.
12 Tetyo Fesito pechikambilana na alangizi, eyankha kuti: “Pakuti wachita apilo kuti ukawonekele kwa Kaisala, uzalute chendi.”
13 Papita masiku atontho, Mfumu Agilipa na Belenike efwika ku Kaisaleya pa ulwendo wa boma wakuyawonana na Fesito.
14 Pakuti enkhala kwamene uko kwa masiku atontho, Fesito efotokozela mfumu yamene iyo nkhani yokhuza Paulo. Yove enena kuti:
“Pali munthu muyakine wamene Felike emusiya mu djeli.
15 Penenze ku Yelusalemu, ansembe akulu-akulu komasoti akulu ŵa Ayuda ewela kuzaniuja vinthu viipa vokhuza yove ndipo esenga chiweluzo chakuti apaiwe.
16 Koma newo niŵayankha kuti Aloma ochitalini vinthu mwa njila yamene iyo. Ove opelekalini munthu kuli ŵanthu omuyopejela pofuna tyala kuŵakondwelesha, munthu woyopejelewa wamene uyo akaliye pasiwa mwayi wowonana menso na menso na omuyopejela amene awo kuti aliteteze pa mulandu wamene uyo.
17 Tetyo pechifwika kuno niliye chelwe, koma nsiku yokonkhapo ninkhala pa mpando wotongela milandu noita munthu wamene uyo kuti awele naye.
18 Omuyopejela amene awo pechipanama noyamba kufotokoza, aliye tomole viipa vilivonse venenzeganiza kuti niye vechichita munthu wamene uyu.
19 Ove enzekungoshushana naye nkhani zokhuza mwakulambilila mulungu* komasoti za munthu muyakine zina yake Yesu wamene echifwa, koma Paulo olaŵila mphela mosimikijila kuti ali moyo.
20 Penikangiwa kusilija nkangano wa nkhani zamene izi, nimukonsha kuti keno ofuna kuluta ku Yelusalemu kuti akatongelewe kwamene uko.
21 Koma Paulo esenga kuti timusunge kuti akamvwe chigamulo cha Wolemekezeka. Tetyo nilamula kuti asungiwe mpaka nizamutumije kwa Kaisala.”
22 Agilipa euja Fesito kuti: “Nanesoti nufuna nimvwe neka munthu wamene uyu olaŵila.” Yove enena kuti: “Mailo muzamumvwishile.”
23 Nsiku yokonkhapo Agilipa na Belenike ewela na ulemu ukulu wachifumu noloŵa m’chipinda mwenzeungana ŵanthu. Enze na akulu-akulu a masodja komasoti ŵanthu otchuka a mutauni yamene iyo ndipo Fesito pechilamula, eleta Paulo.
24 Tetyo Fesito enena kuti: “Mfumu Agilipa na ŵanthu monse muli nase pano, mwamuwona uyu munthu? Ayuda onse ku Yelusalemu komasoti kuno enisenga kuti yove ofunikilalinisoti kunkhala na moyo ndipo elaŵila vamene ivi moŵilikija.
25 Koma newo niwona kuti aliye chite chilichonse changapailiwe. Tetyo yove pechisenga kuti akawonekele kwa Wolemekezeka, niganiza kuti nimutumije.
26 Koma niliye mfundo iliyonse yaningalembele Mbuye wangu yokhuza munthu wamene uyu. Tetyo namuleta kuli mwewo monse, maka-maka mwewo Mfumu Agilipa, kuti mukamukonsha za nkhani yamene iyi, nifwane chaningalembe.
27 Chifukwa newo nuwona kuti ni nzelulini kutumija wa djeli, koma osatomola milandu yake.”
Malizu a m'nyansi
^ Olo kuti, “vokhuza chipembezo chawo.”