Ntchito za atumwi 26:1-32
26 Agilipa euja Paulo kuti: “Ungalaŵile mbali yako.” Tetyo Paulo eimya kwanja noyamba kulaŵila moliteteza kuti:
2 “Mwewo Mfumu Agilipa, nine wokondwela kuti lelo niliteteze pamenso panu, pa vinthu vonse vakuniyopejela Ayuda.
3 Maka-maka chifukwa chakuti nimwe oziŵa ngako miyambo yonse komasoti pa vakukangana Ayuda. Tetyo nukusengani kuti munimvwishile moleza ntima.
4 Kulaŵila chendi, moyo wanankhala nawo kufumila nili mulumbwana, pakati pa ŵanthu a ntundu wangu komasoti mu Yelusalemu, ni woziŵika luweme kuli Ayuda onse
5 amene oniziŵa kufumila kale na kale. Kuti afune anganichitile umboni kuti nenze chendi Mfalisi wa mu gulu yamene yulambila moyumisha vinthu ngako.
6 Koma lomba nupasiwa mulandu chifukwa cha chiyembekezo chechilonjezewa makolo ŵasu na Mulungu.
7 Mabanja ŵasu 12 oyembekezela kuwona kukwanilishiwa kwa lonjezo yamene iyi ndipo ochitila Mulungu wamene uyo utumiki wopatulika mosalekeja usiku na nzuŵa. Tetyo Mfumu, Ayuda onipasa mulandu chifukwa cha chiyembekezo chamene ichi.
8 Ndaŵa yanji mwewo mwaŵanthu muwona kuti ni vosakwanishika kuti Mulungu aushe akufwa?
9 Newo nenzeganiza kuti nufunikila kuchita vinyinji voshushana na zina ya Yesu waku Nazaleti.
10 Ndipo ivi niye venichita chendi ku Yelusalemu. Nenzeika mu djeli atuŵa anyinji penipasiwa mphamvu na ansembe akulu-akulu. Akaweluziwa kuti apaiwe, newo nenzevomekeja.
11 Nthawe zinyinji nenzeŵapasa chilango mmalo onse opemphelela, pofuna kuŵakakamija kuti aleke vakukhulupilila. Pakuti nenze nikalipa nawo ngako, nifwika mpaka poŵatamanisha olo mmatauni akunja.
12 Penenze na volinga vamene ivi, ninyamuka ulwendo woluta ku Damasiko penipasiwa mphamvu komasoti chilolezo na ansembe akulu-akulu.
13 Koma penenze mu njila nzuŵa, mwewo mfumu niwona kungweleŵela kofumila kululu kupambana kungweleŵela kwa zuŵa ndipo kwizenguluka newo komasoti ŵanthu ŵenenze nawo pa ulwendo wamene uyo.
14 Tetyo tonse petipona pansi, nichimvwa mawu oniuja mu Chihebeli kuti, ‘Saulo! Saulo! Ndaŵa yanji unitamanisha? Ukungovutika popitilija kuchita monga ni chinyama chamene chutchaya vibaka noniyata ku nsonga kwa chinthu chotokosela.’*
15 Koma newo nikonsha kuti: ‘Ambuye, kansi nimwe ŵani?’ Ndipo Ambuye eyankha kuti: ‘Nine Yesu wautamanisha wewo.
16 Koma olo n’tetyo, uka ndipo upaname. Nawonekela kuli wewo kuti nikusankhe kuti unkhale ntumiki komasoti mboni ya vinthu vonse vokhuza newo, vamene waviwona komasoti vati nizakuwoneshe.
17 Ndipo nizakupulumushe kuli ŵanthu amene aŵa komasoti kuli ŵanthu amitundu iyakine kwanikuti nikutumije
18 kuti ukasegule menso ŵawo, kuŵafumya mu mfinzi noŵapitisha kongweleŵela komasoti kuŵafumya mmanja mwa Satana noŵapitisha kwa Mulungu. Ukachite vamene ivi kuti machimo ŵawo akhululukiliwe nolondela chuma pamozi na otuŵishiwa chifukwa chonikhulupilila.’
19 Tetyo Mfumu Agilipa, newo niganiza kuti nimvwile veniwona mmensomphenya amene awo akululu.
20 Kufumila ku ŵanthu aku Damasiko, pavuli pake aku Yelusalemu komasoti mu chalo chonse cha Yudeya na ŵanthu a mitundu iyakine, nifwisha uthenga wakuti alape noyamba kulambila Mulungu pochita vinthu vuwonesha kulapa.
21 N’chifukwa chake Ayuda enikata m’kachisi nofuna kunipaya.
22 Olo n’tetyo, pakuti niwona Mulungu oniyavya, nuchitila mphela umboni kuli ŵanthu otchuka komasoti ŵanthu tyala mpaka lelo. Nulaŵilalini chiyakine chilichonse kupatulapo tyala vechinena aneneli na Mose kuti vichitike.
23 Vakuti Khilisitu azatamane, ndipo monga woyamba kuushiwa, azalalikile kuli ŵanthu aŵa komasoti kuli ŵanthu amitundu iyakine vokhuza kungweleŵela.”
24 Paulo penzenena vamene ivi politeteza, Fesito elaŵila moŵilikija mawu kuti: “Wewo Paulo wasiluka! Kuphunzila ngako kwakusilusha!”
25 Koma Paulo enena kuti: “Olemekezeka a Fesito, newo niliye siluke, koma nulaŵila mawu achendi ndipo nili bwino-bwino.
26 Kulaŵila chendi, nulaŵila momasuka chifukwa mfumu yanulaŵila nayo yuziŵa luweme vamene ivi. Nukaikilalini kuti paliye olo chimozi mwa vinthu vamene ivi chamene muchiziŵalini chifukwa vamene ivi viliye chitike mofisa.
27 Kansi mwewo Mfumu Agilipa, mukhulupilila vechilemba aneneli? Nuziŵa kuti muvikhulupilila.”
28 Koma Agilipa euja Paulo kuti: “Kwa nthawe itontho ungakwanishe kunikopa kuti ninkhale Mkhilisitu.”
29 Tetyo Paulo enena kuti: “Kaya kwa nthawe itontho olo ikulu, pemphelo yangu kwa Mulungu ni yakuti, onse amene animvwishila lelo, osati mwewo mweka, ankhale monga ni newo kupatulapo tyala aŵa matcheni.”
30 Pavuli pake mfumu ipanama. Gavana, Belenike komasoti analume ŵenze nkhale nawo pamozi nawosoti epanama.
31 Koma pofumapo eyamba kukambilana kuti: “Munthu wamene uyu aliye chite chilichonse changapailiwe olo kumangiwa.”
32 Ndipo Agilipa euja Fesito kuti: “Munthu wamene uyu kuti aliyesenge kuyawonekela kwa Kaisala, sembe wamasuliwa.”
Malizu a m'nyansi
^ Zamene izi zenze ndodo zosongola zenze tokosela vinyama vapa djoko kuti vikoyenda mokulumija.
