Ntchito za atumwi 27:1-44
27 Ulwendo wasu wa pamanzi woluta ku Italiya pewisimikijilika, Paulo na a djeli ayakine epelekewa mmanja mwa nsogoleli wa masodja zina yake Yuliyo, wa mu gulu ya masodja ya Augusito.
2 Ku Adilamutiyo tikwela bote yamene yenze isala patontho kunyamuka ulwendo woluta ku masitesheni a mmbali mwa nyanja mu chigawo cha Asia. Pavuli pake tinyamuka pamozi na Alisitako, wamene enze waku Makedoniya ku Tesalonika.
3 Nsiku yokonkhapo tifwika ku Sidoni, ndipo Yuliyo ewamila ntima Paulo mwakuti emuvomeja kuluta kuli ayake kuti akamusamalile.
4 Petiloŵasoti mu nyanja kufumila kwamene uko, tiyenda mmbali mwa nsuwa ya Kupulo yamene yenzetiteteza ku mphepo yenzeniyata kufumila kwetenzekuya.
5 Tiyenda pa nyanja molambalala Kilikiya na Pamfuliya ndipo tifwika pa sitesheni ya Mula, ku Lukiya.
6 Kwamene uko nsogoleli wa masodja efwana bote yofumila ku Alekizandiliya yamene yenzekuya ku Italiya ndipo etikwejeka mwamene umo.
7 Tetyo tiyenda patontho-patontho kwa masiku atontho ndipo tifwika ku Kinido movutikila. Chifukwa cha mphepo yamene yenzeniyata kufumila kusogolo kwasu, tipitila ku Salimone kuti nsuwa ya Kelete ikotiteteza ku mphepo yamene iyo.
8 Petiyenda movutikila mmbali mwa nsuwa yamene iyo, tifwika pamalo ayakine oitiwa kuti Masitesheni Aweme amene enze pafupi na tauni ya Laseya.
9 Lomba penze pepita nthawe itali, ndipo kuyenda pa nyanja kwenze koyofya chifukwa olo nthawe ya kulekeja kulya kwa Nsiku ya Mwambo Woziŵilija Machimo yenze ipita kale. Tetyo Paulo eŵapasa malangizo.
10 Yove eŵauja kuti: “Mwewo mwaŵanthu, nuwona kuti ulwendo wamene uyu tikauyamba lomba teti tiwonongeshe vinyinji. Tiwonongeshe katundu komasoti bote, olosoti miyoyo yasu.”
11 Koma nsogoleli wa masodja emvwila woyendesha bote na munecho wa bote yamene iyo mmalo momvwila vechinena Paulo.
12 Pakuti sitesheni yamene iyo yenzelini iweme kunkhalako nthawe yozizila, ŵanthu anyinji ekatijana na vakuti afumeko. Ove enzefuna kuwona kuti keno vingakwanishike kuyafwika ku Finikesi kuti akankhale kwamene uko nthawe yozizila. Finikesi yenze sitesheni ya Kelete yololesha ku mpoto cha ku mmawa na ku mmwela chaku mmawa.
13 Mphepo ya ku mmwela peiyamba patontho-patontho, eganiza kuti venzefuna vikwanishike. Tetyo ekwejeka nangula* noyamba kuyenda mmbali mwa nsuwa ya Kelete.
14 Koma pakaliye pita nthawe ikulu, mphepo ya nkuntho yuitiwa kuti Yulakilo* iyamba kuniyata bote yamene iyo.
15 Pakuti bote yenzeniyatiwa na mphepo yamphamvu ndipo tiliye kwanishe kuiphendusa kuti iloleshe kwenzefumila mphepo yamene iyo, tigonja ndipo ititola.
16 Pavuli pake tiyamba kuyenda mmbali mwa nsuwa iyakine itontho yuitiwa kuti Kauda yamene yenzetiteteza ku mphepo. Koma olo n’tetyo tenzekwanishalini kuphendusa bote itontho yamene yenzedonsewa na bote yamene iyo.
17 Tetyo pechikwejeka bote yamene iyo m’bote, eyamba kumanga bote yamene iyo na vomangila kuti itang’e. Ndipo poyopa kuti bote yamene iyo ingaloŵele mmiseche ku Suliti,* ove eselusha nthambo zomangila chinyula cha bote mwakuti yenzekankhiwa na mphepo.
18 Koma pakuti mphepo ya nkuntho yenzetiniyata komasoti kutikankha mwamphamvu, nsiku yokonkhapo ŵanthu eyamba kutaya katundu kuti bote ipepukiwe.
19 Nsiku yachitatu etaya nthambo zokwejela chinyula cha bote yamene iyo.
20 Petiwona kuti zuŵa komasoti nyenyezi viliye woneke kwa masiku anyinji komasoti tukankhiwa na chimphepo champhamvu, tiyamba kukaikila kuti tipulumuke.
21 Ŵanthu amene awo pechinkhala nthawe itali osalya kanthu, Paulo epanama pakati pawo nonena kuti: “Mwewo mwaŵanthu kuti mwenze mwimvwila malangizo ŵangu, osafuma kwala ku Kelete, sembe tiliye tamane teti komasoti katundu sembe uliye wonongeke.
22 Koma olo n’tetyo osati mudandaule chifukwa paliye akuti afwe, koma tyala bote yamene iyi iwonongeke.
23 Usiku uyu wapita mngelo wa Mulungu wangu wamene numuchitila utumiki wopatulika, wenze wapanama pafupi na newo
24 nonena kuti: ‘Paulo osati uyope. Ufunikila kuyapanama pamenso pa Kaisala. Ndipo ziŵa kuti chifukwa cha wewo, Mulungu apulumushe ŵanthu onse ŵauli nawo pa ulwendo wamene uyu.’
25 Tetyo tang’ani ntima mwewo mwaŵanthu, chifukwa nukhulupilila kuti Mulungu achite vonse vawaniuja.
26 Koma olo n’tetyo bote yasu yamene iyi iwonongeke pafupi na nsuwa iyakine.”
27 Pa usiku wa 14, mphepo iyamba kutikankhila uku na uku pa nyanja ya Adiliya. Tetyo pakati pa usiku, woyendesha bote yamene iyo eyamba kuganiza kuti ovwendela kuntunthu.
28 Tetyo epima kunoka kwa nyanja nofwana kuti yenze mamita 36. Pechiyenda kansenga patontho epimasoti kunoka kwake nofwana mamita 27.
29 Koma poyopa kuti tikunthe myala, eselusha anangula 4* kuvuli kwa bote yamene iyo ndipo enzefunishisha tyala kuti kuche.
30 Lomba woyendesha bote yamene iyo enzefuna kuthaŵamo. Tetyo eselusha yala bote pa nyanja potalijila wenye kuti ofuna kuselusha anangula kusogolo kwa bote yamene iyo.
31 Paulo euja nsogoleli wa masodja na masodja amene awo kuti: “Ŵanthu amene aŵa akafuma m’bote mwamene muno, mupulumukelini.”
32 Pavuli pake masodja amene awo etenda nthambo za bote yamene iyo noilekelela kuti ilute.
33 Kwasala patontho kucha, Paulo eyamba kuuja onse kuti alye. Yove enena kuti: “Lomba papita masiku 14 muyembekezela komasoti muli na nkhaŵa ndipo muliye ulye chilichonse.
34 Tetyo nukulimbikisani kuti mulye kuti vinthu vikuyendeleni luweme. Chifukwa olo sisi imozi ya mmutu mwanu iwonongekelini.”
35 Pechilaŵila vamene ivi, etola nkate. Pavuli pake etembeja Mulungu pa menso pa onse noyaŵa nkate wamene uyo ndipo yove eyamba kulya.
36 Pechichita tetyo onse etang’a ntima noyamba kulya.
37 Tonse pamozi, m’bote mwamene umo tenzemo ŵanthu 276.
38 Onse pechilya nokuta, etaya tiligu mu nyanja kuti bote yamene iyo ipepukiwe.
39 Kwacha mmawa aliyeziŵe kuti alikuni, koma ewona malo ayakine a miseche ndipo enzefunishisha kuti keno vingakwanishike akapanamike bote pamene apo.
40 Tetyo etenda nthambo za anangula* noziponya m’nyanja. Emasulasoti nthambo zomangila choyendeshela. Pechikweja mmululu nyula yakusogolo ya bote, eyamba kuluta ku malo amene awo amiseche.
41 Pavuli pake efwika pa chinthutu cha miseche chamene chenzeniyatiwa na mafunde mbali zonse. Kusogolo kwa bote yamene iyo kwidiba pansi mmiseche mwamene umo osanyang’anya ndipo mafunde amphamvu eyamba kuniyata kuvuli mwakuti iyamba kufwaika vipisi-vipisi.
42 Pevichitika tetyo masodja eganiza kuti apaye a djeli kuti osati papezeke aliyense wonyaya nothaŵa.
43 Koma nsogoleli wa masodja enzefunishisha kuti Paulo akafwike naye bwino-bwino, tetyo eŵalesha kuchita vamene ivo venzefuna. Mwakuti elamula oziŵa kunyaya kuti alumphile mu nyanja mwamene umo kuti ankhale oyamba kufwika kuntunthu.
44 Elamula ayakine onse kuti achite chimozi-mozi, ayakine pa mapulanga, ndipo ayakine pa vipisi va bote yamene iyo. Pamapeto pake onse efwika kuntunthu ali bwino-bwino.
Malizu a m'nyansi
^ Olo kuti, “chopanamikila bote.”
^ Yamene iyi ni mphepo yofumila ku mpoto cha ku mmawa.
^ Onani matanthauzo a mawu ayakine.
^ Olo kuti, “vopanamikila bote.”
^ ”Olo kuti, “vopanamikila bote.”