Ntchito za atumwi 28:1-31
28 Petipulumuka tetyo, tichimvwa kuti malo amene awo oitiwa kuti Melita.
2 Ŵanthu olaŵila chilaŵilo chachilwendo kwamene uko etiwonesha kuwama ntima kwapadela. Ove ekunjika mulilo notilondela luweme tonse chifukwa kwenzelokwa mvula komasoti kwenzezizila.
3 Koma Paulo pechitola nkhuni noziponya pa mulilo, pefuma njoka ya chipili chifukwa cha kupya ndipo imuluma nokangamila ku kwanja yake.
4 Ŵanthu achilaŵilo chachilwendo amene awo pechiwona njoka ya poizoni yulelemba ku kwanja yake, eyamba kuujana kuti: “Shuwa uyu munthu ni wopaya ŵanthu chifukwa olo kuti wapulumuka pa nyanja, Chilungamo* chiliye mulole mphela kuti ankhale na moyo.”
5 Koma yove ekunkhumulila njoka yamene iyo pa mulilo ndipo aliye umvwe kuŵaŵa.
6 Ŵanthu amene awo enzeyembekezela kuti avimbe olo apone mwazizizi na kufwa. Koma pechiyembekezela kwa nthawe itali nowona kuti paliye chumuchitikila, echinja maganizo noyamba kunena kuti ni mulungu.
7 Pafupi na malo amene awo, penze minda ya munthu wololela nsuwa yamene iyo zina yake Papuliyo. Yove etilondela luweme ngako ndipo etitandaja kwa masiku atatu.
8 Koma atata ŵake a Papuliyo enzelwala maleliya* komasoti mmala mwa kamulopa ndipo enzeyone. Tetyo Paulo eloŵa m’ng’anda mwenze atata ŵake amene awo nopemphela ndipo pavuli pake eŵakata pa mutu noŵapojeka.
9 Pevichitika tetyo, ŵanthu ayakine onse amene enzelwala pa nsuwa yamene iyo, ewela kuli yove ndipo eŵapojeka.
10 Ove etilemekeza potipasa mphaso zinyinji, komasoti petenze nyamuka etipasa vinthu vinyinji vetenzefunikila.
11 Papita miyezi itatu tinyamuka pa bote yaku Alekizandiliya yonkhala na chizindikilo cha “Ŵana a Zeu.” Bote yamene iyi ipanama pa nsuwa yamene iyo poyembekezela kuti nthawe yozizila isile.
12 Pavuli pake tifwika pa sitesheni iyakine ku Sulakusa ndipo tinkhalapo kwa masiku atatu.
13 Petifuma kwamene uko, tizenguluka na kuyafwika ku Legiyo. Papita nsiku imozi, kweyamba mphepo yaku mmwela ndipo nsiku yachiŵili tifwika ku Potiyolo.
14 Kwamene uko tifwana akwasu ndipo etisenga kuti tinkhale nawo kwa masiku 7. Pavuli pake tipitilija ulwendo wasu wakuya ku Loma.
15 Akwasu akwamene uko pechimvwa za sewo, ewela mpaka kuzafwika ku Maketi ŵa Apiyo naku Ng’anda zitatu za Alwendo kuzatichunguja. Paulo pechiŵawona, etembeja Mulungu ndipo etang’a ntima.
16 Petifwika ku Loma, Paulo elolewa kuti akonkhala yeka na nsodja womulolela.
17 Papita masiku atatu, Paulo eita akulu-akulu ŵa Ayuda kuti awele. Pechiungana, eŵauja kuti: “Mwewo analume, enekwangu, olo kuti niliye chite chilichonse choshushana na ŵanthu olo mwambo wa makolo ŵasu, enikata ku Yelusalemu nonitwala mmanja mwa Aloma monga wa djeli.
18 Ndipo pechifufuza, enzefuna kunimasula chifukwa aliye nifwane na mulandu wanganipaile.
19 Koma Ayuda eshusha vamene ivo mwakuti nikakamijika kusenga kuzawonekela kwa Kaisala. Koma sikuti nichita vamene ivi chifukwa chakuti nenzefuna kuzalaŵilila viipa ntundu wangu.
20 Pa chifukwa chamene ichi, nisenga kuti nizawonane na mwewo nolaŵila namwe, pakuti namangiwa na iyi tcheni chifukwa cha chiyembekezo cha Aisilaeli.”
21 Ove emuyankha kuti: “Sewo tiliye londele makalata aliwonse ofumila ku Yudeya onena za wewo. Paliyesoti aliyense wa akwasu afwika kuno, wamene watiuja olo kulaŵila chiipa chilichonse chokhuza wewo.
22 Koma olo n’tetyo tufuna kumvwa maganizo ŵako, chifukwa kulaŵila chendi, sewo tonse tuziŵa kuti gulu yampatuko yamene iyi oilaŵilila viipa kuyakine kulikonse.”
23 Pevichitika tetyo, epangana nsiku yakuti azakumane naye ndipo ewela chendi anyinji kwenzenkhala yove. Tetyo kufumila mmawa mpaka nchingulo, eŵafotokozela nkhani yonse ndipo echitila umboni mokwanila za Ufumu wa Mulungu. Echita vamene ivi pokatishila ntchito mfundo zokopa zokhuza Yesu, kufumila mu Chilamulo cha Mose na vechilemba aneneli.
24 Ayakine eyamba kukhulupilila vamene ivo vechilaŵila Paulo koma ayakine aliyekhulupilile.
25 Tetyo pakuti enzeshushana eyamba kufumapo. Koma Paulo elaŵila mawu aŵa:
“Mzimu utuŵa winena vachendi kuli makolo ŵanu kupitila muli mneneli Yesaya.
26 Mzimu wamene uyo winena kuti, ‘Nkhoya ukauje ŵanthu aŵa kuti: “Kumvwa muzamvwe chendi, koma muzaziŵelini. Kulolesha muzaloleshe chendi, koma muzawonelini chilichonse.
27 Chifukwa ŵanthu amene aŵa ayumisha mitima yawo ndipo amvwa na matu ŵawo, koma osakonkheja. Asunzumila kuti osati awone na menso ŵawo komasoti kuti osati amvwe na matu ŵawo noziŵa tanthauzo yake mmitima yawo, pavuli pake nochunguluka kuti newo niŵapojeke.”’
28 Tetyo ziŵani kuti njila ya Mulungu yopulumushila ŵanthu, yatumijiwa kuli ŵanthu amitundu iyakine. Ndipo mosakaikila ove azamvwishile.”
29 ——
30 Tetyo Paulo enkhala mphela kwa vyaka viŵili mu ng’anda ya lendi, ndipo ŵanthu onse enzewela kuzamuwona enzeŵalondela na manja aŵili.
31 Enze ŵalalikila za Ufumu wa Mulungu komasoti kuŵaphunzisa za Ambuye Yesu Khilisitu, na ufulu wonse wolaŵila paliye* cholesha.
Malizu a m'nyansi
^ Mu Chigiliki Di′ke. Mawu amene aŵa payakine onena za mulungu mwanakazi wowejela kuti chilungamo chiwoneke. Olo payakinesoti echingoŵakatishila ntchito ponena za chilungamo.
^ Mu Chigiliki, “enzeupye muŵili.”
^ Olo kuti, “motang’a ntima ngako.”
