Ntchito za atumwi 3:1-26
3 Lomba Petulo na Yohani enzepita kuti akaloŵe mu kachisi nthawe ya 3 koloko nzuŵa* kuti akapemphele.
2 Tetyo penze mwanalume muyakine wamene evyalika wolemala. Nsiku iliyonse enzemutakula nomunkhazika pafupi na muliyango wa kachisi uitiwa kuti Gedi Iweme, kuti akosenga mphaso zachifundo kuli ŵanthu oloŵa mu kachisi mwamene umo.
3 Munthu wamene uyo pechiwona Petulo na Yohani akuya kuti akaloŵe mu kachisi mwamene umo, eyamba kusenga kuti amupase mphaso zachifundo.
4 Koma Petulo pamozi na Yohani emuloleshesha nonena kuti: “Tiloleshe.”
5 Yove eŵaloleshesha, noyembekezela kuti amupase kanthu.
6 Koma Petulo enena kuti: “Siliva na golide niliye, koma nikupase chanili nacho: Mu zina ya Yesu Khilisitu waku Nazaleti, yenda!”
7 Pechichita tetyo emukata kwanja ngayo nomupanamika. Nthawe yamene iyo vipazi na mendo* ŵake vitang’a.
8 Pevichitika tetyo elumpha nopanama ndipo eyamba kuyenda. Yove eloŵa nawo pamozi mu kachisi mwamene umo, oyenda, kulumpha-lumpha komasoti kutamanda Mulungu.
9 Ŵanthu onse emuwona oyenda komasoti kutamanda Mulungu.
10 Ove emuziŵa kuti ni munthu wamene enzenkhala pa Gedi Iweme yakachisi nosenga mphaso zachifundo. Ndipo ŵanthu amene awo edabwa ngako na vamene ivo vemuchitikila.
11 Munthu wala enzengoyenda-yenda mphela na Petulo komasoti Yohani osaŵaleka, ndipo gulu yonse ya ŵanthu iutukila kuli ove yudabwa ngako pa malo oitiwa kuti Lukolo ya Vipilala ya Solomo.
12 Petulo pechiwona vamene ivi euja ŵanthu amene awo kuti: “Mwewo Aisilaeli ndaŵa yanji mudabwa navo vamene ivi? Ndaŵa yanji mutiloleshesha monga kuti tamuyendesha na mphamvu zasu olo chifukwa cha kulipeleka kwasu kwa Mulungu?
13 Mulungu wa Abulahamu, wa Isaki na wa Yakobo, Mulungu wa makolo ŵasu niye walemekeza Ntumiki wake Yesu, wemwipeleka mwewo komasoti kumukana pa menso pa Pilato, olo kuti Pilato wamene uyo enzefuna kumumasula.
14 N’chendi, mwewo mwikana ntuŵa na wolungama wamene uyo, ndipo mwisenga kuti akumasulileni munthu opaya ŵanthu.
15 Mwipaya Ntumiki Nkulu wa moyo, koma Mulungu emuusha ndipo sewo nise mboni za nkhani yamene iyi.
16 Tetyo mu zina yake komasoti chifukwa chakuti tukhulupilila zina yake yamene iyo, munthu wamene uyu wamuwona komasoti kumuziŵa wapola. Chikhulupililo chatili nacho sewo chifukwa cha yove, chachitisha kuti apoleletu monga ni mwamuwonela monse.
17 Mwewo akwangu nuziŵa kuti mwichita vinthu mosaziŵa monga ni mwechichitilasoti olamulila ŵanu.
18 Koma pamene apa Mulungu wakwanilisha vechilengezelatu kupitila muli aneneli onse, kuti Khilisitu wake azatamane.
19 Tetyo lapani nochinja kuti machimo ŵanu afimvyiwe, komasoti kuti nyengo zopumulisha ziwele kufumila kwa Yehova.*
20 Komasoti kuti atumije Yesu wamene ni Khilisitu wosankhiwa chifukwa cha mwewo.
21 Wamene uyu kululu kufunika kumusunga mpaka nthawe yowejelesha vinthu vonse, yechinenelatu Mulungu kupitila muli aneneli ŵake atuŵa akale ngako.
22 Ndipo Mose enena kuti, ‘Yehova Mulungu wanu azakupaseni mneneli monga ni newo kufumila pakati pa akwasu. Muzamumvwile pa vinthu vonse vati azakuujeni.
23 Munthu aliyense wamene akuti azaleke kumvwila Mneneli wamene uyo, Mulungu azamupaye kuti osati azankhalesoti pakati pa ŵanthu.’
24 Ndipo aneneli onse, kufumila pali Samueli mpaka aneneli onse amene ewela pa vuli pake, onse amene elosela, enena mosapita mbali za masiku amene aŵa.
25 Mwewo nimwe ŵana ŵa aneneli na apangano yamene Mulungu epangana na makolo ŵanu akale. Yove euja Abulahamu kuti: ‘Kupitila mwa mbadwa* yako mabanja onse apa chalo azadalisiwe.’
26 Mulungu pechisankha Ntumiki wake, poyamba emutumija kuli mwewo, kuti azakudaliseni pojosha aliyense wa mwewo kuti muleke ntchito zanu ziipa.”
Malizu a m'nyansi
^ Mu Chigiliki, “awazi ya 9,” kuŵelenga kufumila mma 6 koloko mmawa.
^ Kutanthauza tufupa twamene tukatanija chipazi na kwendo.
^ Mu Chigiliki, “kufumila pa chinso cha Yehova.”
^ Mu Chigiliki, “mbewu.”