Ntchito za atumwi 4:1-37
4 Petulo na Yohani penzelaŵila na ŵanthu amene awo, ansembe, wopanamila kachisi komasoti Asaduki efwika.
2 Ove ekalipa chifukwa atumwi amene awo enzephunzisa ŵanthu komasoti kulalikila mosapita mbali vakuti Yesu eushiwa.
3 Tetyo eŵakata noŵaika mu djeli mpaka nsiku yokonkhapo, chifukwa kwenze kwifipa kale.
4 Koma ŵanthu anyinji amene emvwishila mawu amene awo ekhulupilila, ndipo chiŵelengelo cha analume chikwana pafupi-fupi 5.000.
5 Nsiku yokonkhapo olamulila na akulu komasoti alembi eungana ku Yelusalemu.
6 Penzesoti Anasi wansembe nkulu, Kayafa, Yohani, Alekizanda komasoti ŵanthu onse amene enze enekwake a wansembe nkulu wamene uyo.
7 Tetyo epanamika Petulo na Yohani pakati pawo noyamba kuŵakonsha kuti: “Kansi mphamvu zamuchitila vamene ivi mwazitola kuni, olo kansi mwachita vamene ivi mu zina ya ŵani?”
8 Petulo pechizujiwa na mzimu utuŵa eŵayankha kuti:
“Mwewo olamulila komasoti akulu,
9 keno lelo tukonshewa pa vinthu viweme vatachitila munthu wamene uyu wolemala ndipo mufuna kuziŵa kuti wamupojeka ni ŵani,
10 ziŵani mwewo monse na Aisilaeli onse kuti mu zina ya Yesu Khilisitu wala waku Nazaleti wamene mwewo mwimupaila pachimuti, koma wamene Mulungu emuusha, kupitila muli yove munthu wamene uyu wapanama pasogolo panu ali bwino-bwino.
11 Yesu wamene uyu ni ‘mwala wamene mwewo omanga ng’anda mweuwona monga ni watyala-tyala, wamene lomba wankhala mwala wofunika ngako wapakona.’
12 Komasoti paliye munthu aliyense wamene angatipulumushe, chifukwa paliye zina iliyonse pano pa chalo yamene yapelekewa kwa ŵanthu yamene ingatipulumushe.”
13 Pechiwona kuti Petulo na Yohani olaŵila motang’a ntima komasoti pechikumbukila kuti enze osaphunzila* komasoti ŵanthu tyala, edabwa ngako. Ndipo eziŵa kuti enzeyenda na Yesu.
14 Lomba pakuti munthu wala epojekewa enze epanamasoti pamene apo, ove esoŵa cholaŵila.
15 Tetyo eŵalamula kuti afume m’ng’anda ya Khoti Ikulu ya Ayuda,* ndipo eyamba kukambilana
16 kuti: “Tichite nawo tyani ŵanthu amene aŵa? Chifukwa kulaŵila chendi, ove achita chizindikilo chikulu mwakuti ŵanthu onse aku Yelusalemu awona. Ndipo sewo tingashushelini vamene ivi.
17 Tetyo kuti nkhani yamene iyi ilekepitilija kumvwika kuli ŵanthu ayakine, tiyeni tiŵayofye noŵauja kuti osati alaŵilesoti mu zina yamene iyi kuli munthu aliyense.”
18 Pechichita tetyo eŵaita noŵalamula kuti osati alaŵilesoti olo kuphunzisa mu zina ya Yesu.
19 Koma Petulo na Yohani eŵayankha kuti: “Weluzani mweka, keno n’viweme pa menso pa Mulungu kumvwila mwewo mmalo momvwila Mulungu wamene uyo.
20 Koma sewo tingalekelini kulaŵila za vinthu vamene tiviwona komasoti kuvimvwa.”
21 Tetyo pechiŵayofyasoti, eŵamasula, pakuti aliyefwane chifukwa chilichonse choŵapasila chilango. Komasoti enzeyopa ŵanthu, pakuti onse enzetamanda Mulungu chifukwa cha vamene ivo vichitika.
22 Chifukwa munthu wamene epojekewa modabwisa wamene uyu, enze na vyaka vopitilila 40.
23 Pechiŵamasula eluta kuli okhulupilila ayawo, ndipo eŵafotokozela vonse vechiŵauja ansembe akulu-akulu na akulu.
24 Pechimvwa vamene ivi, onse pamozi eŵilikija kwa Mulungu kuti:
“Ambuye Nkulu Ngako, mwewo niye mwipanga kululu na chino chalo, nyanja na vonse vamene vunkhala mwamene umo.
25 Pokatishila ntchito mzimu utuŵa, mwewo mwilaŵila kupitila pakamwa pa kolo yasu Davite ntumiki wanu kuti, ‘Ndaŵa yanji ŵanthu amitundu iyakine ochita nsokonezo komasoti ndaŵa yanji mitundu ya ŵanthu yuganizila vinthu vatyala-tyala?
26 Mafumu a chalo epanama pamalo ŵawo, ndipo olamulila eungana mokatijana kuti alimbane na Yehova komasoti wozozewa* wake.’
27 Vamene ivi vichitika chendi, Helode, Pontiyo Pilato, ŵanthu a mitundu iyakine komasoti ŵanthu a mu Isilaeli, pechiungana mu tauni yamene iyi noukila Yesu, ntumiki wanu ntuŵa, wamene mwewo mwemuzoza.
28 Eungana kuti achite vemwinenelatu, vamene ivi vichitika chifukwa mwewo muli na mphamvu komasoti chifukwa chakuti venze vokatijana na chifunilo chanu.
29 Koma lomba Yehova mvwani mwakutiyofyela ndipo tiyavyeni sewo akapolo ŵanu kuti tipitilije kulaŵila mawu ŵanu motang’a ntima.
30 Pitilijani kupojeka ŵanthu na kwanja yanu komasoti kuyavya kuti vodabwisa vipitilije kuchitika mu zina ya Yesu, ntumiki wanu ntuŵa.”
31 Pechisilija kupemphela mopapatila, malo ŵechiungana amene awo enyang’anya. Pavuli pake onse ezujiwa na mzimu utuŵa ndipo eyamba kulaŵila mawu a Mulungu motang’a ntima.
32 Komasoti onse amene ekhulupilila enze na maganizo olingana.* Penzeve aliyense wamene enzenena kuti vinthu venze navo venze va yove yeka. Vonse venze navo venze va onse.
33 Komasoti atumwi amene awo epitilija kuchitila umboni mwamphamvu ngako za kuuka kwa Ambuye Yesu. Ndipo Mulungu eŵawonesha kuwama ntima kukulu onse amene awo.
34 Ndipo penzeve aliyense wamene enzesoŵa kanthu. Onse amene enze na minda olo ng’anda, enzegulisa noleta ndalama zamene izo.
35 Ndipo enzezipeleka kuli atumwi. Tetyo ndalama zamene izo enzeziyaŵa kuli aliyense mokatijana na venzefunikila.
36 Tetyo Yosefe wamene atumwi amene awo emupasa zina yakuti Balanaba, kutanthauza “Mwana Wotonthoja,” wamenesoti enze Mulevi wovyalikila ku Kupulo,
37 enze na munda. Yove egulisa munda wamene uyo nopeleka ndalama zamene izo kuli atumwi.
Malizu a m'nyansi
^ Enzetanthauzalini kuti oziŵalini kuŵelenga na kulemba, koma kuti aliye lute ku sikulu za Alabi.
^ Mu Chigiliki, “Sanihedilini.”
^ Olo kuti, “Khilisitu.”
^ Mu Chigiliki, “enze na ntima umozi komasoti maganizo amozi.”