Ntchito za atumwi 5:1-42
5 Munthu muyakine zina yake Hananiya na mwanakazi wake Safila, egulisa munda wawo.
2 Koma yove echosapo ndalama ziyakine nofisa ndipo mwanakazi wake eziŵa vamene ivo. Tetyo etola ndalama zamene izo zisala nozipeleka kuli atumwi.
3 Koma Petulo enena kuti: “Hananiya, ndaŵa yanji Satana wakutang’isha ntima kuti utalije wenye mzimu utuŵa nofisa ndalama ziyakine za munda wamene uyo?
4 Kansi munda wamene uyo wenzelini mmanja mwako ukaliye ugulisa? Ndipo pewiugulisa, ndalama zamene izo sembe wikwanishalini kuchita nazo vilivonse vewenzefuna? Lomba ndaŵa yanji wiganiza kuchita vinthu vamene ivi? Pamene apa uliyetalije wenye ŵanthu, koma Mulungu.”
5 Hananiya pechimvwa vamene ivi epona pansi na kufwa. Ndipo onse amene echimvwa vamene ivi echita wowa ngako.
6 Tetyo alumbwana ewela nomuvunga pa nyula ndipo efuma naye na kuyamuika mmanda.
7 Papita ma awazi pafupi-fupi atatu mwanakazi wake eloŵa ndipo enzeziŵalini vichitika.
8 Lomba Petulo emukonsha kuti: “Niuje, kansi ndalama zonse zamwafwana pamwagulisa munda wanu ni zamene izi?” Yove eyankha kuti: “Eye ni zamene izi.”
9 Pavuli pake Petulo emukonsha kuti: “Ndaŵa yanji mwewo mwaŵili mwikatijana kuti muyese mzimu wa Yehova? Kansi uziŵa? Ŵanthu amene enze aluta kuyaika mwanalume wako mmanda ali pa muliyango. Nawesoti akutakule noluta nawe.”
10 Nthawe yamene iyo Safila epona pansi pafupi na mendo a Petulo na kufwa. Alumbwana ŵala penzeloŵa efwana kuti wafwa kale. Tetyo emutakula nofuma naye ndipo emuika mmanda pafupi na mwanalume wake.
11 Pevichitika tetyo, mpingo wonse komasoti ŵanthu onse amene echimvwa vamene ivi echita wowa ngako.
12 Atumwi amene awo epitilija kuchita vizindikilo komasoti vodabwisa vinyinji pakati pa ŵanthu. Ndipo okhulupilila onse enzeungana Palukolo ya Vipilala ya Solomo.
13 N’chendi kuti penzeve aliyense wamene etang’a ntima kukatijana na ophunzila amene awo. Koma olo n’tetyo ŵanthu enzeŵatamanda ngako.
14 Komasoti ŵanthu okhulupilila Ambuye epitilija kuyangijilika, chifukwa analume na anakazi anyinji enkhala ophunzila.
15 Ŵanthu amene awo enzeleta olwala mmisewu noŵayoneka pamabedi atontho-atontho na pamphasa kuti Petulo akopita, chimvwili-mvwili chake tyala chifwike pali ayakine mwa olwala amene awo.
16 Komasoti ŵanthu anyinji ofumila mmatauni ozenguluka Yelusalemu enzeluta kwamene uko na ŵanthu olwala komasoti amene enzetamanishiwa na mizimu iipa. Ndipo onse amene awo enzepojekewa.
17 Koma nkulu wa ansembe na onse ŵenze nawo, amene enze a mu gulu ya mpatuko ya Asaduki echita nsanje. Tetyo ove enyamuka
18 nokata atumwi amene awo ndipo eŵaika mu djeli.
19 Koma usiku, mngelo wa Yehova esegula viseko va djeli yamene iyo noŵafumya, ndipo eŵauja kuti:
20 “Nkhoyani mukapaname m’kachisi ndipo mukapitilije kuuja ŵanthu vokhuza moyo wamene uyo ukuza.”
21 Pechimvwa vamene ivi, eloŵa m’kachisi mmawa ngako noyamba kuphunzisa.
Koma nkulu wa ansembe na onse ŵenze nawo eunganija Khoti Ikulu ya Ayuda komasoti akulu onse ŵa Aisilaeli. Pavuli pake etumija akamalonda kwala ku djeli kuti akatole atumwi amene awo nowela nawo.
22 Koma akamalonda ŵala pechifwika, aliye ŵafwane mu djeli mwamene umo. Tetyo ejokela nakuyalaŵila vamene ivi.
23 Ove enena kuti: “Tafwana djeli ni yokhoma komasoti yotetezewa luweme, akamalonda alipaname mmiliyango. Koma patasegula tiliye fwanemo aliyense.”
24 Wololela kachisi na ansembe akulu-akulu pechimvwa vamene ivi, esiliwa nzelu chifukwa enzeziŵalini kuti visile tyani.
25 Koma pefwika munthu muyakine noŵauja kuti: “Mwewo mwaŵanthu! Analume ŵala ŵemwiika mu djeli ali m’kachisi, apanama mwamene umo ndipo ophunzisa ŵanthu.”
26 Pevichitika tetyo, wololela kachisi wamene uyo enyamuka na akamalonda ŵake na kuyaŵatola. Koma aliyeŵatole mwandewo poyopa kutemewa myala na ŵanthu.
27 Tetyo ewela nawo nowapanamika m’ng’anda ya Khoti Ikulu ya Ayuda. Ndipo nkulu wa ansembe enena
28 kuti: “Tikulamulani mwamphamvu kuti osati muphunzisesoti mu zina yamene iyi. Koma mwazuja Yelusalemu wonse na mfundo zamuphunzisa ndipo mwasimikija ntima kuti sewo tinkhale na mulandu wa milopa ya munthu wamene uyu.
29 Petulo na atumwi ayakine amene awo eyankha kuti: “Sewo tufunika kumvwila Mulungu monga wolamulila, osati ŵanthu.
30 Mulungu wa makolo ŵasu eusha Yesu, wemwipaya mwewo pomupanyika pachimuti.
31 Ndipo Mulungu emukweja ku kwanja yake ngayo monga Ntumiki Nkulu na Mpulumusi. Echita vamene ivi kuti Aisilaeli alape komasoti kuti machimo ŵawo akhululukiliwe.
32 Ndipo sewo nise mboni za vinthu vamene ivi, chimozi-mozisoti na mzimu utuŵa, wawapeleka Mulungu kuli ŵanthu amene omumvwila monga wolamulila.”
33 Pechimvwa vamene ivi ekalipa ngako mwakuti enzefuna kuŵapaya.
34 Koma Mfalisi muyakine zina yake Gamaliyeli epanama mu Khoti Ikulu ya Ayuda. Yove enze mphunzisi wa Chilamulo wolemekezewa na ŵanthu onse. Tetyo elamula kuti afumye ŵanthu amene awo kwa nthawe itontho.
35 Pavuli pake eŵauja kuti: “Mwewo Aisilaeli, musamale na vamufuna kuŵachita ŵanthu amene aŵa.
36 Chifukwa mmasiku akuvuli, kwenze Teuda wamene elitchukisha ngako ndipo ŵanthu pafupi-fupi 400 eloŵa mu gulu yake. Koma epaiwa, ndipo onse amene enzemukonkhelela emwajikana, osapezekasoti.
37 Pavuli pake kwiwela Yudasi waku Galileya mmasiku akalembela. Ŵanthu anyinji ekopeka naye ndipo enzemukonkhelela. Koma nayesoti echifwa, ndipo onse amene enzemukonkhelela emwajikana.
38 Tetyo mwavilili apa vinthu, nukuujani kuti alekeni ŵanthu amene aŵa osati mulimbane nawo. Chifukwa keno volinga vawo olo ntchito yamene iyi yufumila kuli ŵanthu, ilutelini patali.
39 Koma keno yufumila kwa Mulungu mungakwanishelini kuŵalesha. Ndipo mukayumilila vingawoneke monga kuti mulimbana na Mulungu.”
40 Ove emvwila malangizo ŵake amene aŵa ndipo esenga atumwi amene awo kuti awele. Tetyo echingoŵaniyata noŵalamula kuti aleke kulaŵila mu zina ya Yesu, pavuli pake eŵamasula.
41 Pevichitika tetyo, atumwi amene awo efuma pamenso pa Khoti Ikulu ya Ayuda. Ove enze okondwela chifukwa Mulungu eŵawona kuti owamila kuchitiliwa vinthu viipa chifukwa cha zina ya Yesu.
42 Ndipo nsiku iliyonse epitilija kuphunzisa mwakhama m’kachisi, ku ng’anda na ng’anda komasoti enzelalikila uthenga uweme unena za Khilisitu Yesu.