Ntchito za atumwi 6:1-15
6 Pa nthawe yamene iyo, ophunzila amene awo penzepitilija kuyangijilika, Ayuda olaŵila Chigiliki eyamba kudandaula za Ayuda olaŵila Chihebeli. Enzedandaula chifukwa anakazi amasiye a Chigiliki enzeganiziliwalini pa nkhani yoyaŵa chakulya cha nsiku iliyonse.
2 Tetyo atumwi 12 ŵala eita gulu ya ophunzila nonena kuti: “Vufunikilalini kuti sewo tileke ntchito yophunzisa mawu a Mulungu noyamba kuyaŵa chakulya.
3 Tetyo akwasu, sakilani analume 7 pa gulu yanu yamene iyi a mbili iweme, amene ali na mzimu komasoti nzelu, kuti sewo tiŵapase udindo wololela ntchito yofunika yamene iyi.
4 Koma sewo tilipeleke pa nkhani yokhuza kupemphela komasoti kuphunzisa mawu a Mulungu.”
5 Ŵanthu onse amene awo ekondwela na mawu amene aŵa mwakuti esankha Sitefano, munthu wachikhulupililo chotang’a komasoti wozula na mzimu utuŵa. Esankhasoti Filipo, Pulokolo, Nikanola, Timoni, Palemena na Nikolawu waku Antiokeya wamene eloŵa Chiyuda.
6 Tetyo eŵaleta kuli atumwi, ndipo pechiŵapemphelela, atumwi amene awo eŵakata pamutu powonesha kuti aŵapasa udindo.
7 Pevichitika tetyo, mawu a Mulungu epitilija kufalikila. Chiŵelengelo cha ophunzila chenzeyangijilika ngako mu Yelusalemu. Ndipo ansembe anyinji enkhala okhulupilila.
8 Sitefano enze na mphamvu ndipo enzechita kuwonekelatu kuti Mulungu ali naye. Yove enzechita vinthu vodabwisa na vizindikilo vikulu pakati pa ŵanthu.
9 Koma ŵanthu ayakine a mu gulu yuitiwa kuti Sunagoge wa Omasuliwa ewela pamozi na ŵanthu ayakine aku Kulene, ku Alekizandiliya, ku Kilikiya komasoti aku Asia kuzashushana na Sitefano.
10 Koma ove aliye kwanishe kulimbana na nzelu zake komasoti mzimu utuŵa wamene wenzemusogolela akolaŵila.
11 Pavuli pake enyengelela analume ayakine kumbali kuti anene kuti: “Sewo tamumvwa wamene uyu olaŵila vinthu vonyoza Mose komasoti Mulungu.”
12 Vamene ivi vikalipisha ngako akulu, alembi komasoti ŵanthu ayakine. Tetyo ewela mozizimusha nomukata ndipo eluta naye ku Khoti Ikulu ya Ayuda.
13 Ove eleta mboni za wenye zamene zinena kuti: “Munthu wamene uyu akungonkhalila tyala kulaŵila mawu onyoza malo amene aŵa atuŵa komasoti Chilamulo.
14 Mwachisanzo, sewo tamumvwa olaŵila kuti Yesu wala waku Nazaleti azawononge malo amene aŵa atuŵa nochinja miyambo yechitipasa Mose.”
15 Ŵanthu onse amene enze mmalo a Khoti Ikulu ya Ayuda pechiloleshesha Sitefano, ewona kuti chinso chake chuwoneka monga ni cha mngelo.
