Ntchito za atumwi 7:1-60
7 Koma nkulu wa ansembe enena kuti: “Kansi vamene ivi n’vachendi?”
2 Sitefano enena kuti: “Mwewo mwaŵanthu, enekwangu na atata ŵangu, mvwishilani. Mulungu waulemelelo ewonekela kuli kolo yasu Abulahamu pa nthawe yenze ku Mesopotamiya, akaliyeluta kuyankhala ku Halana.
3 Ndipo emuuja kuti, ‘Fuluka mu chalo chako ndipo ufumepo pakati pa enekwako. Ulute mu chalo chati nizakuwoneshe.’
4 Tetyo efuluka mu chalo cha Akasidi nakuyankhala ku Halana. Kwamene uko, atata ŵake emwalila, Mulungu emuuja kuti afulukile mu chalo chino chamunkhalamo mwewo palipano.
5 Koma aliye mupasemo chuma chilichonse, olo kadela katontho. Mmalo mwake emulonjeza kuti azamupase chalo ichi kuti chinkhale chuma chake, na cha mbadwa zake, olo kuti pa nthawe yamene iyo enzeve mwana.
6 Ndipo Mulungu emuujasoti kuti mbadwa zake zizankhale alwendo mu chalo cha anecho, ndipo ŵanthu azaŵachitishe kunkhala akapolo ŵawo noŵatamanisha kwa vyaka 400.
7 Mulungu enena kuti, ‘Nizaweluze ntundu wamene uyo wati azautumikile monga akapolo, ndipo pavuli pake azafume nakuzanitumikila pa malo ŵano.’
8 Emupasasoti pangano ya mdulidwe. Pavuli pake evyala Isaki ndipo emuchita mdulidwe pa nsiku ya 8. Nayesoti Isaki evyala Yakobo ndipo Yakobo evyala mitu yala 12 ya mabanja.
9 Mitu yamene iyo ya mabanja ichitila nsanje Yosefe nomugulisa ku Iguputo. Mulungu enze naye,
10 ndipo emupulumusha mmavuto ŵake onse. Komasoti enzemukonda ndipo enzemuyavya kuti akochita vinthu mwanzelu pamenso pa Falawo mfumu ya Iguputo. Falawo wamene uyo epasa Yosefe udindo wakuti akololela Iguputo na ng’anda yake yonse.
11 Pavuli pake ku Iguputo na ku Kanani konse kwenze njala mwakuti kwenze mavuto akulu. Ndipo makolo ŵasu amene awo enzefwanalini chakulya.
12 Koma Yakobo echimvwa kuti ku Iguputo kuli chakulya, ndipo etuma ŵala makolo ŵasu pa ulwendo woyamba.
13 Pa ulwendo wachiŵili Yosefe eliulula kuli enekwake, ndipo Falawo eziŵa za enekwake a Yosefe na makolo ŵake.
14 Tetyo Yosefe etumija ŵanthu ku Kanani kuyatola atata ŵake Yakobo komasoti enekwake onse. Ndipo onse pamozi enzepo ŵanthu 75.
15 Tetyo Yakobo eluta ku Iguputo kwechifwila yove komasoti ŵala makolo ŵasu.
16 Pavuli pake vifupa vawo evitola noluta navo ku Sekemu. Eviika mmanda ŵechigula Abulahamu na ndalama za nsimbi kwa ŵana a Hamoli ku Sekemu kwamene uko.
17 Nthawe peivwendela yakuti lonjezo yechipeleka Mulungu kuli Abulahamu ikwanilishiwe, mbadwa za Yakobo zipaka ngako ku Iguputo.
18 Pavuli pake, mfumu iyakine yamene yenzeziŵalini vokhuza Yosefe iyamba kulamulila ku Iguputo.
19 Mfumu yamene iyi ichenjelela ŵanthu antundu wasu komasoti ikakamija makolo ŵasu amene awo kuti akotaya malucheche ŵawo na cholinga chakuti osati ankhale na moyo.
20 Mose evyalika pa nthawe yamene iyi, ndipo Mulungu enzemuwona kuti ni muweme. Yove elelewa m’ng’anda ya atata ŵake kwa myezi itatu.
21 Koma pechimusiya yeka, mwana mwanakazi wa Falao emutola nomulela monga ni mwana wake.
22 Tetyo Mose ephunzila nzelu zonse za Aiguputo. Yove enzelaŵila mwamphamvu komasoti enzechita vinthu vikulu-vikulu.
23 Pechikwanisha vyaka 40, eganiza zakuyawona enekwake, Aisilaeli.
24 Pechiwona mmozi wa enekwake amene awo otamanishiwa na munthu waku Iguputo, emuteteza ndipo ewejela popaya munthu wamene uyo waku Iguputo.
25 Mose enzeganiza kuti enekwake amene awo aziŵe kuti Mulungu oŵapulumusha pokatishila ntchito kwanja yake, koma ove aliyeziŵe mfundo yamene iyi.
26 Nsiku yokonkhapo yove elutasoti kuyaŵawona ndipo efwana Aisilaeli ayakine oniyatana. Mose eyeja kuŵayavya kuti akatijane ponena kuti, ‘Mwewo mwaŵanthu, ni pokwanu apa. Ndaŵa yanji muniyatana teti?’
27 Koma wamene uyo enzeniyata muyake emukankha nonena kuti, ‘Niŵani ekupasa udindo wakuti ukotilamulila komasoti kutiweluza?
28 Kansi ufuna kunipaya monga ni mwewipaila wala munthu waku Iguputo mailo?’
29 Pechimvwa vamene ivi, Mose ethaŵa nakuyankhala mu chalo cha a Midiyani. Kwamene uko evyala ŵana aŵili analume.
30 Papita vyaka 40, mngelo ewonekela kuli yove m’chipululu pa lupili ya Sinai, pachizambwa chaminga chamene chenzeyaka mulilo.
31 Mose pechiwona vamene ivi, edabwa ngako. Koma penzevwendela kuti awonesheshe, echimvwa mawu a Yehova akuti,
32 ‘Newo nine Mulungu wa makolo ŵako, Mulungu wa Abulahamu, wa Isaki na wa Yakobo.’ Mose eyamba kunjenjemela ndipo aliyefunesoti kufwika pafupi na chizambwa chamene icho kuti awonesheshe.
33 Yehova emuuja kuti, ‘Vula nsapato zako, chifukwa malo amene awo awapanama ni malo atuŵa.
34 Newo nawona kuti ŵanthu ŵangu amene ali ku Iguputo otamanishiwa ngako. Namvwa kumimila kwawo ndipo nawela kuzaŵapulumusha. Lomba nufuna nikutume ku Iguputo.’
35 Mose wamene uyo, wechikana ove nonena kuti, ‘Niŵani ekupasa udindo wakuti ukotilamulila komasoti kutiweluza?’ niye wechitumija Mulungu monga wolamulila na mpulumusi kupitila muli mngelo wamene ewonekela kuli yove pachizambwa chala chaminga.
36 Munthu wamene uyo eŵasogolela nofuma nawo ndipo echita vodabwisa na vizindikilo ku Iguputo, pa Nyanja Isweta komasoti m’chipululu kwa vyaka 40.
37 Wamene uyu ni Mose wamene euja Aisilaeli kuti, ‘Mulungu azakupaseni mneneli monga ni newo, kufumila pakati pa enekwanu.’
38 Wamene uyu niye enze na Aisilaeli m’chipululu pamozi na mngelo wamene elaŵila na yove komasoti makolo ŵasu pa lupili ya Sinai. Yove elondela mawu opatulika amene ni amphamvu kuti atipasile.
39 Koma makolo ŵasu ekana kumumvwila. Mmalomwake, emukankhila kumbali ndipo muntima mwawo ejokela ku Iguputo.
40 Euja Aloni kuti, ‘Tikonzele milungu kuti itisogolele chifukwa tuziŵalini vachitikila Mose wamene enzetisogolela pofuma ku Iguputo.
41 Tetyo ove ekonza fano ya mwana wa ng’ombe mmasiku amene awo. Pechichita tetyo eleta nsembe zopeleka kwa fano yamene iyo ndipo esangalala na ntchito ya manja ŵawo.
42 Tetyo Mulungu eŵaleka kuti atumikile magulu akululu monga ni mwakunenela malemba m’buku ya Aneneli. Malemba amene awo onena kuti, ‘Mwewo ŵanthu a ng’anda ya Isilaeli, kansi mwala m’chipululu mwenzepeleka kuli newo nsembe na vopeleka viyakine kwa vyaka 40?
43 Mwewo mwenzenyamula chitenti cha Moloki na nyenyezi ya mulungu oitiwa kuti Lefani, mafano ŵemwikonza kuti mukoŵalambila.Tetyo nizakupitikishileni kutali kupitilila ku Babulo.’
44 Makolo ŵasu amene awo enze na chitenti chaumboni m’chipululu. Echikonza pokonkheja malangizo ŵechipeleka Mulungu kwa Mose mokatijana na chithunzi chechiwona Mose wamene uyo.
45 Makolo ŵasu elondela chitenti chamene ichi kwa makolo ŵawo ndipo eloŵa nacho pamozi na Yoswa mu chalo chamene mwenze ŵanthu amitundu iyakine. Ŵanthu amene aŵa Mulungu eŵapitikisha pamenso pa makolo ŵasu ndipo chitenti chamene icho chinkhala mu chalo chamene ichi mpaka mu nthawe ya Davite.
46 Mulungu ewamila ntima Davite ndipo yove esenga mwayi wakuti amange ng’anda yakuti Mulungu wa Yakobo akonkhalamo.
47 Koma Solomo niye emangila Mulungu ng’anda.
48 Koma olo n’tetyo Wakululu Ngako onkhalalini mu ng’anda zomangiwa na manja, mokatijana na mawu a mneneli akuti,
49 ‘Yehova wanena kuti, Kululu ni mpando wangu wachifumu ndipo chalo ni chokandapo mendo ŵangu. Lomba kansi munganimangile ng’anda yotyani? Ndipo malo akuti newo ningapumulilepo ali kuni?
50 Kansi nikwanja yangulini ipanga vinthu vonse vamene ivi?
51 Ŵanthu ovuta mwewo komasoti osachita mdulidwe wa muntima na mmatu. Nthawe zonse mushushana na mzimu utuŵa. Muchita vinthu monga ni mwenzechitila makolo ŵanu.
52 Ni mneneli wotyani wamene makolo ŵanu aliye mutamanishe? Ove epaya ŵanthu amene elengezelatu za kuwela kwa wolungama wamene uyo, wamene mwewo mwemupeleka komasoti kumupaya.
53 Mwewo mulondela Chilamulo kupitila muli mngelo, koma muliye chikonkheje.”
54 Pechimvwa vamene ivi, ekalipa ngako ndipo eyamba kumukukutila menu.
55 Koma yove, pechizujiwa na mzimu utuŵa, eloleshesha kululu ndipo ewona ulemelelo wa Mulungu komasoti Yesu alipaname ku kwanja ngayo ya Mulungu.
56 Ndipo enena kuti: “Onani! Nuwona kululu kuliseguke, ndipo Mwana wa munthu wapanama ku kwanja ngayo ya Mulungu.”
57 Ove pechimvwa vamene ivi eŵilikija ngako alivale mmatu na manja ŵawo, ndipo onse eutukila penze yove.
58 Pavuli pake emufumya kunja kwa tauni noyamba kumutema na myala. Ndipo Mboni ziika malaya ŵawo akunja pafupi na mulumbwana muyakine zina yake Saulo.
59 Penzemutema na myala Sitefano esenga mopapatila kuti: “Ambuye Yesu, londelani mzimu wangu.”
60 Pavuli pake egwada noŵilikija na mawu amphamvu kuti: “Yehova osati muŵapase mulandu wa chimo yamene iyi.” Pechilaŵila vamene ivi echifwa.
