Ntchito za atumwi 8:1-40
8 Saulo evomekeja kuti Sitefano apaiwe.
Nsiku yamene iyo, mpingo wamene wenze ku Yelusalemu wiyamba kutamanishiwa ngako. Tetyo ophunzila onse, kupatulapo atumwi ŵeka, emwajikana noluta mmadela a Yudeya na Samaliya.
2 Koma ŵanthu ayakine oyopa Mulungu etola Sitefano nakuyamuika mmanda, ndipo emulila ngako.
3 Saulo eyamba kutamanisha mpingo mwa nkhanza. Enzeloŵa m’ng’anda iliyonse nokweŵela panja analume na anakazi kumo, ndipo enzeŵatwala ku djeli.
4 Koma olo n’tetyo, ŵanthu ŵala emwajikana enzelalikila uthenga uweme wa mawu a Mulungu mmadela ŵechiluta.
5 Filipo eluta mu tauni ya Samaliya noyamba kulalikila vokhuza Khilisitu kuli ŵanthu a kwamene uko.
6 Ŵanthu anyinji enzemvwishila venzelaŵila Filipo. Onse enzemvwishila komasoti kuwona vizindikilo venzechita yove.
7 Kwamene uko kwenze ŵanthu anyinji enze na mizimu iipa ndipo yenzeŵilikija nofuma. Ŵanthu anyinji ozizila vizo komasoti olemala enzepojekewa.
8 Tetyo ŵanthu amu tauni yamene iyo ekondwela ngako.
9 Mu tauni yamene iyo mwenzesoti munthu muyakine zina yake Simoni. Ivi vikaliyechitika yove enzechita vamasenga nodabwisa ŵanthu onse amu Samaliya ndipo enzelitumba ngako.
10 Ŵanthu onse, ŵana na akulu kumo, enzechita naye chidwi ndipo enzenena kuti: “Munthu wamene uyu ali na mphamvu ikulu ya Mulungu.”
11 Enzechita naye chidwi chifukwa kwa nthawe itali eŵadabwisa na vamasenga vake vamene ivo.
12 Koma ove pechikhulupilila Filipo wamene enzelalikila uthenga uweme wa Ufumu wa Mulungu komasoti unena za zina ya Yesu Khilisitu, enzebatiziwa analume na anakazi kumo.
13 Komasoti wala Simoni enkhala wokhulupilila. Pechibatiziwa, enzesiyanalini na Filipo kulikonse. Mwakuti enzedabwa kuwona vizindikilo komasoti ntchito zamphamvu na vinthu vikulu-vikulu venzechitika.
14 Atumwi ku Yelusalemu pechimvwa kuti ŵanthu aku Samaliya alondela mawu a Mulungu, eŵatumijila Petulo na Yohani.
15 Ove eluta chendi kwamene uko ndipo eŵapemphelela kuti alondele mzimu utuŵa.
16 Pa nthawe yamene iyi aliyense enze echingobatiziwa mu zina ya Ambuye Yesu koma enze akaliye londela mzimu utuŵa.
17 Tetyo atumwi amene awo eyamba kukata ŵanthu amene awo pamutu, ndipo elondela mzimu utuŵa.
18 Tetyo Simoni pechiwona kuti atumwi akakata ŵanthu amene awo olondela mzimu utuŵa, enzefuna kuŵapasa ndalama.
19 Yove enena kuti: “Nanesoti munipaseko mphamvu yamene iyi, kuti aliyense waningakate pamutu akolondela mzimu utuŵa.”
20 Koma Petulo emuuja kuti: “Ndalama zako zamene izo uwonongeke nazo pamozi, chifukwa uganiza kuti mphaso ya mahala ya Mulungu ungaigule na ndalama.
21 Ntchito yamene iyi yukukhuzalini ndipo uliye mbali iliyonse chifukwa ntima wako ni wachilungamolini pamenso pa Mulungu.
22 Tetyo lapa viipa vamene ivi vawachita ndipo usenge Yehova mopapatila kuti keno n’vokwanishika, akukhululukile chifukwa cha maganizo amene aŵa aipa ali mu ntima mwako.
23 Nawona kuti niwe poizoni woŵaŵa* komasoti kapolo wa vinthu vachinyengo.”
24 Simoni eyankha kuti: “Nipempheleleni kwa Yehova mopapatila kuti vonse vamene ivi vamwalaŵila osati vinichitikile.”
25 Tetyo pechisilija kuchitila umboni mokwanila komasoti kulaŵila mawu a Yehova, ejokela ku Yelusalemu. Pojokela enzelalikila uthenga uweme mminzi inyinji yaku Samaliya.
26 Koma mngelo wa Yehova elaŵila na Filipo kuti: “Nyamuka ndipo ulute ku mmwela, ku nsewu wofumila ku Yelusalemu kuluta ku Gaza.” (Wamene uyu ni nsewu wa m’chipululu.)
27 Tetyo enyamuka noluta ndipo ekumana na nduna yaku Itiyopiya. Munthu wamene uyu enze na udindo ukulu ndipo enzeyavya Kandake, mfumu inakazi ya Itiyopiya. Enzelolelasoti chuma chonse cha mfumu inakazi yamene iyo. Yove eluta ku Yelusalemu kuyalambila Mulungu.
28 Lomba enze pa ulwendo wojokela kwawo alinkhale m’galeta yake ndipo enzeŵelenga moŵilikija ulosi wa mneneli Yesaya.
29 Tetyo mzimu wiuja Filipo kuti: “Nkhoya ukavwendelele galeta yake yamene iyo.”
30 Filipo eutuka noyenda mmbali mwa galeta yamene iyo ndipo emumvwa oŵelenga moŵilikija ulosi wa mneneli Yesaya. Filipo emukonsha kuti: “Kansi mumvwisha vamene ivo vamuŵelenga?”
31 Yove eyankha kuti: “Ningamvwishe tyani paliye wonimasulila?” Tetyo esenga Filipo kuti akwele nonkhala naye mu galeta mwamene umo.
32 Mawu amene aŵa a m’Malemba ŵenzeŵelenga, enze akuti: “Eluta naye kumalo ayakine kuti akamupaye monga ni mbelele. Ndipo molingana na mwana wa mbelele wamene wangonkhala chelele pakufuna kumugela usako, yove aliyesegule pakamwa pake.
33 Penzemuchitisha nsoni, aliyemuchitile vachilungamo. Kansi niŵani angafotokoze luweme mbadwo wa makolo ŵake? Chifukwa moyo wake wachosewa pano pa chalo.”
34 Tetyo nduna yamene iyo ikonsha Filipo kuti: “Pulizi niujeni, kansi mneneli wamene uyu onena za ŵani? Za yove olo za munthu muyakine?”
35 Pamene apo, Filipo eyamba kumuuja uthenga uweme unena za Yesu, ndipo eyambila pa lemba yamene iyi.
36 Penzeyenda tetyo mu nsewu mwamene umo, efwana manzi anyinji ndipo nduna yala inena kuti: “Onani, awoŵala manzi! Kansi chunilesha kubatiziwa ni chinji?”
37 ——
38 Pechichita tetyo elamula kuti galeta yamene iyo ipaname. Pavuli pake Filipo na nduna yala eseluka noloŵa mmanzi, ndipo Filipo ebatiza nduna yamene iyo.
39 Pechifuma mmanzi mwamene umo mzimu wa Yehova wifumyapo Filipo mokulumija ndipo nduna yala iliye muwonesoti, koma ipitilija ulwendo wake yusangalala.
40 Koma Filipo epezeka kuti ali ku Asidodi, ndipo eyamba kulalikila uthenga uweme mmatauni onse amudela yamene iyi mpaka echiyafwika ku Kaisaleya.
Malizu a m'nyansi
^ Mu Chigiliki, “ndulu yoŵaŵa.”
