Ntchito za atumwi 9:1-43
9 Koma Saulo epitilija kuyofya ophunzila ŵa Ambuye komasoti enzefunishisha kuŵapaya. Tetyo eluta kuli nkulu wa ansembe
2 kuyasenga makalata omuvomekeja kuti alute nawo ku malo opemphelela aku Damasiko. Esenga makalata amene awo kuti akayafwana muyakine aliyense wokonkheja Njila yamene iyo,* mwanalume olo mwanakazi akamumange nowela naye ku Yelusalemu.
3 Ali pa ulwendo wake wamene uyo, pechisala patontho kufwika ku Damasiko, mwazizizi echingowona kungweleŵela kofumila kululu kulimuzenguluke.
4 Pevichitika tetyo, epona pansi ndipo echimvwa mawu akuti: “Saulo, Saulo, ndaŵa yanji unitamanisha?”
5 Yove ekonsha kuti: “Ambuye, kansi nimwe ŵani?” Yove emuyankha kuti: “Nine Yesu, wautamanisha.
6 Nyamuka, uloŵe mu tauni yamene iyo, ndipo ukaujiwe vaufunikila kuchita.”
7 Ŵanthu ŵenze nawo pamozi pa ulwendo wamene uyo, echingopanama kusoŵa cholaŵila. Ove echimvwa chendi mawu amene awo koma aliyewone munthu aliyense.
8 Pavuli pake Saulo epanama, koma olo kuti enzelolesha enzewonalini chilichonse. Tetyo emukata kwanja nomupelekeja ku Damasiko.
9 Saulo enkhala masiku atatu asalola ndipo enzekulyalini olo kumwa chilichonse.
10 Ku Damasiko kwenze wophunzila muyakine zina yake Hananiya. Tetyo Ambuye elaŵila naye mmensomphenya kuti: “Hananiya!” Yove eyankha kuti: “Ninewo Ambuye.”
11 Pavuli pake Ambuye amene awo emuuja kuti: “Nyamuka ulute ku Nsewu Woyondoloka. Ukayafwika pa ng’anda ya Yudasi ukakonshe za munthu muyakine zina yake Saulo, waku Taliso. Yove opemphela,
12 ndipo mmensomphenya wawona munthu zina yake Hananiya wafwika nomukata pamutu kuti ayambesoti kulola.”
13 Koma Hananiya eyankha kuti: “Ambuye, namvwa za munthu wamene uyu kuli ŵanthu anyinji. Namvwa viipa vonse vechichitila atuŵa ŵanu ku Yelusalemu.
14 Ndipo palipano ansembe akulu-akulu amupasa mphamvu kuti amange onse oita pa zina yanu.”
15 Koma Ambuye emuuja kuti: “Nkhoya chifukwa munthu wamene uyo ni chiya changu chosankhiwa chonyamulila zina yangu kuluta nayo kuli ŵanthu amitundu iyakine komasoti kwa mafumu na Aisilaeli.
16 Pakuti nizamuwoneshe luweme mavuto onse ŵakuti azakumane nawo chifukwa cha zina yangu.”
17 Tetyo Hananiya eluta nakuyaloŵa m’ng’anda mwamene umo. Lomba emukata pamutu nonena kuti: “Nkwangu Saulo, Ambuye Yesu amene ewonekela kuli wewo pa nsewu wewipitila pakuza, anituma. Anituma kuli wewo kuti uyambesoti kulola komasoti uzujiwe na mzimu utuŵa.”
18 Nthawe yamene iyo tunthu tuwoneka monga ni mamba a nsomba twipona kufuma mmenso mwa Saulo ndipo eyambasoti kulola. Pavuli pake eluta kuyabatiziwa.
19 Pechilya chakulya efwanasoti mphamvu.
Yove enkhala pamozi na ophunzila ku Damasiko kwa masiku atontho.
20 Nthawe yamene iyo eyamba kulalikila za Yesu mmalo opemphelela, kuti wamene uyu ni Mwana wa Mulungu.
21 Koma ŵanthu onse amene emumvwa olaŵila edabwa ngako ndipo enzenena kuti: “Kansi munthu wamene uyu ni walalini enzetamanisha ŵanthu aku Yelusalemu oita pa zina yamene iyi? Kansi chechiwelela kuno ni kuzakatalini ŵanthu noluta nawo kuli ansembe akulu-akulu?”
22 Koma olo n’tetyo, Saulo epitilija kunkhala na mphamvu zinyinji ndipo enzesilija nzelu Ayuda aku Damasiko poŵafotokozela mfundo zomvwika zosimikijila kuti Yesu ni Khilisitu.
23 Papita masiku anyinji, Ayuda amene awo epangana kuti amupaye.
24 Koma Saulo eziŵa vechipangana vamene ivo. Ove enzelolesheshasoti mosamala mmagedi nzuŵa monse komasoti usiku kuti amupaye.
25 Tetyo usiku ophunzila ŵake emuika m’chitundu nomufumyila pawindo ya mpanda ndipo emuselushila kunja.
26 Pechifwika ku Yelusalemu eyeja-yeja kuti akatijane na ophunzila kwamene uko. Koma onse enzemuyopa, chifukwa enzekhulupililalini kuti ni wophunzila.
27 Tetyo Balanaba emuyavya poluta naye kuli atumwi. Ndipo eŵafotokozela luweme mwamene Saulo mwechiwonela Ambuye amene elaŵila naye pa nsewu. Eŵafotokozelasoti mwechilaŵilila Saulo motang’a ntima ku Damasiko mu zina ya Yesu.
28 Pevichitika tetyo, epitilija kunkhala nawo noyenda momasuka mu Yelusalemu, ndipo enzelaŵila motang’a ntima mu zina ya Ambuye.
29 Yove enzelaŵijana komasoti kushushana na Ayuda olaŵila Chigiliki. Koma ove eyamba kusakila njila yakuti amupayile.
30 Akwasu pechiziŵa vamene ivi, eluta naye ku Kaisaleya nomutumija ku Taliso.
31 Lomba mpingo waku Yudeya, ku Galileya na ku Samaliya konse wiyamba kunkhala pa ntendele ndipo wenze wotang’a. Chifukwa chakuti ophunzila enzeyopa Yehova komasoti enzetang’ishiwa na mzimu utuŵa, mpingo wamene uyo wenzekulila-kulila.
32 Petulo penzeyenda mu dela yonse yamene iyo, efwikasoti kuli atuŵa amene enzenkhala ku Luda.
33 Kwamene uko efwana munthu muyakine zina yake Eneya, wamene enzenkhala yone pa bedi yake kwa vyaka 8 chifukwa enze wozizila vizo.
34 Lomba Petulo emuuja kuti: “Eneya, Yesu Khilisitu okupojeka. Uka ndipo uwamye bedi yako.” Nthawe yamene iyo euka.
35 Ŵanthu onse aku Luda komasoti kuchidikha cha Shaloni pechimuwona, eyamba kukhulupilila Ambuye.
36 Ku Yopa kwenze wophunzila muyakine zina yake Tabita, zina yamene yumasuliliwa kuti Dolika.* Tabita enzechita vinthu vinyinji viweme komasoti enzepasa ayakine mphaso zinyinji zachifundo.
37 Lomba mmasiku amene awo yove elwala ndipo emwalila. Tetyo emusambika nakuyamuyoneka mu chipinda cha mmululu.
38 Pakuti Luda enzepafupi na Yopa, ophunzila amene awo pechimvwa kuti Petulo ali mu tauni yamene iyi, etuma ŵanthu aŵili kuyamusenga kuti: “Pulizi muwele kwasu mokulumija.”
39 Petulo pechimvwa vamene ivi, enyamuka noluta nawo pamozi. Pechifwika, emutola noluta naye mu chipinda chala cha mmululu. Anakazi onse amasiye ewela kuli yove olila ndipo enzemuwonesha vovwala vinyinji komasoti mikhanjo yenzesona Dolika penze nawo.
40 Petulo euja ŵanthu onse kuti afume, tetyo egwada nopemphela. Pavuli pake echunguluka nololesha thupi yamene iyo nonena kuti: “Tabita uka!” Tetyo mwanakazi wamene uyo esegula menso ndipo pechiwona Petulo, euka nonkhazikika.
41 Petulo emukata kwanja nomupanamika. Pechichita tetyo eita atuŵa amene awo komasoti ŵala anakazi amasiye ndipo onse ewona kuti Tabita ali moyo.
42 Vamene ivi veziŵika ku Yopa konse ndipo ŵanthu anyinji ekhulupilila Ambuye.
43 Petulo enkhala mphela ku Yopa kwa masiku atontho ndipo enzenkhala na munthu muyakine opuka vikumba zina yake Simoni.
Malizu a m'nyansi
^ Mawu akuti “Njila yamene iyo” otanthauza moyo wa Chikhilisitu komasoti vakukhulupilila Akhilisitu.
^ Zina yakuti “Dolika” ni ya Chigiliki yakuti “Tabita” ni ya Chialamu. Mazina onse amene aŵa otanthauza “Baŵala.”
