Kuli Tito 1:1-16
1 Newo Paulo, kapolo wa Mulungu na ntumwi wa Yesu Khilisitu, nili na chikhulupililo chokatijana na cha ŵanthu osankhiwa na Mulungu. Komasoti nuziŵa luweme choonadi chokhuza kulipeleka kwatili nako kwa Mulungu.
2 Vinthu vamene ivi tunkhala navo chifukwa cha chiyembekezo cha moyo wosasila, chechilonjeza Mulungu kale-kale wamene angatalelini wenye.
3 Koma pa nthawe yake, echitisha kuti mawu ŵake aziŵike kupitila mu ntchito yolalikila yenipasiwa mokatijana na Mpulumusi wasu, Mulungu.
4 Nulembela wewo Tito, mwana wangu ngaye-ngaye wamene uli na chikhulupililo cholingana na changu:
Kuwama ntima kukulu na ntendele vofumila kwa Mulungu Atata ŵasu na Khilisitu Mpulumusi wasu, vinkhale muli wewo.
5 Nikusiya ku Kelete kuti uwamye vinthu vophoniyeka komasoti kuti uike akulu mu tauni iliyonse, mokatijana na malangizo ŵenikupasa.
6 Nkulu ofunikila kunkhala aliye chifukwa chomuyopejela, mwanalume wa mwanakazi mmozi, wa ŵana okhulupilila komasoti asayopejelewa kuti ali na minkhalidwe iipa olo asalamulilika.
7 Pakuti ni ntumiki* wa Mulungu, wololela ofunikila kunkhala aliye chifukwa chomuyopejela. Osati ankhale wakumvwa vake veka, wokalipa kamangu, wakumwa walwa mwauchakolwa, wankhanza olo wokonda kufwana vinthu mwachinyengo.
8 Koma ankhale wolondela luweme alwendo, wokonda viweme, woganiza luweme, wachilungamo, wokhulupilika komasoti wolilesha.
9 Ankhalesoti wokata mwamphamvu mawu okhulupilika pakuphunzisa mwaluso, kuti akwanishe kulimbikisa ŵanthu na mfundo za chendi komasoti kuzuzula oshusha.
10 Chifukwa pali ŵanthu anyinji amene olamulilikalini, olaŵila vosayavya komasoti oluŵilisha ayakine, ndipo pakati pa ŵanthu amene aŵa palisoti amene olimbikisa mdulidwe.
11 Ŵanthu amene aŵa ofunikila kuleshewa, chifukwa pofuna kufwana vinthu mwachinyengo, owononga mphela mabanja pophunzisa vinthu vamene ni vosafunikila kuŵaphunzisa.
12 Mmozi wa ove, wamenesoti ni mneneli wawo enena kuti: “Akelete ni ŵanthu a wenye nthawe zonse, vinyama vaukali vakusanga komasoti ni malesi olungwa.”
13 Umboni wamene uyu ni wachendi. Chifukwa cha vamene ivi, upitilije kuŵazuzula mwamphamvu kuti ankhale na chikhulupililo chotang’a.
14 Osati akomvwishila nthano zachiyuda komasoti kukonkheja malamulo a ŵanthu amene aleka choonadi.
15 Vinthu vonse n’vituŵa kuli ŵanthu atuŵa. Koma kuli ŵanthu oipishiwa komasoti aliye chikhulupililo kuliye chituŵa, chifukwa maganizo ŵawo na chikumbuntima chawo n’voipishiwa.
16 Onena patuŵa kuti oziŵa Mulungu, koma omukana na vochita vawo chifukwa ni aipa, osamvwila komasoti oyenelelalini ntchito iliyonse iweme.
Malizu a m'nyansi
^ Mu Chigiliki, “ntumiki wololela ng’anda.”
