Kuli Tito 2:1-15
2 Koma wewo pitilija kulaŵila vinthu vukatijana na mfundo zachendi.
2 Analume achikulile osati akochita vinthu mopitilila malile, aliye masoŵela, oganiza luweme, achikhulupililo chotang’a, achikondi chikulu na opilila ngako.
3 Nawosoti anakazi achikulile ankhale na nkhalidwe yuyenelela Akhilisitu. Osati ankhale a tonjo, olo okonda ngako vinyu, koma ankhale aphunzisi a vinthu viweme,
4 na cholinga chakuti akolangiza* anakazi achisimbi kuti akokonda analume ŵawo, akokonda ŵana wawo,
5 akonkhala oganiza luweme, atuŵa okata ntchito zapang’anda,* aweme komasoti ogonjela analume ŵawo, kuti mawu a Mulungu osati anyozewe.
6 Komasoti upitilije kulimbikisa alumbwana kuti ankhale oganiza luweme.
7 Unkhale chisanzo pa ntchito ziweme mmbali zonse. Ukophunzisa vachendi* ndipo ukowonesha kuti uliye masoŵela.
8 Mawu ŵako akonkhala aweme amene angashushiwelini, kuti oshusha achite nsoni ndipo osati afwane chifukwa chotiyopejela.
9 Antchito akomvwila abwana ŵawo pa vinthu vonse ndipo akoŵakondwelesha. Osati akoŵashusha
10 olo kuŵaiŵila, koma ankhale okhulupilika pa chilichonse, kuti akowamililisha vakutiphunzisa Mpulumusi wasu Mulungu.
11 Mulungu wawonesha kuwama ntima kwake kukulu kwamene kuleta chipulumuso kuli ŵanthu, olo ankhale otyani.
12 Vamene ivi vutiphunzisa kukana kunkhala na moyo wosayopa Mulungu. Vutiphunzisasoti kuti osati tikokumbwila vinthu viipa va muli ichi chalo, koma kuti tinkhale oganiza luweme, achilungamo na olipeleka kwa Mulungu
13 patuyembekezela vinthu vokondwelesha komasoti kuwonekela kwa ulemelelo wa Mulungu nkulu komasoti kwa Mpulumusi wasu, Yesu Khilisitu,
14 wamene elipeleka mmalo mwa sewo kuti atilondeshe* ku moyo wochita vinthu vosamvwila malamulo va ntundu uliwonse komasoti kuti atituŵishe, kuti tinkhale ŵanthu ŵake apadela, olipeleka pa ntchito ziweme.
15 Upitilije kulaŵila vamene ivi, kulimbikisa nozuzula ŵanthu pokatishila ntchito ulamulilo wonse wawapasiwa. Osavomela kuti munthu aliyense akudelele.
Malizu a m'nyansi
^ Olo kuti, “akoŵakumbusha; kuŵaphunzisa.”
^ Olo kuti, “Osamalila ng’anda zawo.”
^ Olo kuti, “vituŵa.”
^ Mu Chigiliki, “atipelekele dipo; atiwombole.”
