Kalata ya Yakobo 1:1-27
1 Newo Yakobo, kapolo wa Mulungu na wa Ambuye Yesu Khilisitu, nulembela mabanja 12 amene emwajikana mmadela osiyana-siyana.
Londelani moni!
2 Akwasu, mukosangalala ngako pamukumana na mayeselo osiyana-siyana,
3 chifukwa monga ni mwamuziŵila, chikhulupililo chanu chikankhala mphela chotang’a pamuyesewa, muphunzila kunkhala opilila.
4 Koma lolani kuti kupilila kwamene uko kusilije kukata ntchito yake, kuti munkhale okwanila na muliye chophoniya pa mbali iliyonse olo payakine kuti munkhale na minkhalidwe yonse iweme.
5 Tetyo keno muyakine osoŵa nzelu, akosenga kwa Mulungu ndipo azamupase, chifukwa yove opeleka na ntima wonse kuli onse komasoti opeleka paliye kutotofya.*
6 Koma akosenga na chikhulupililo, osati akokaikila olo patontho, chifukwa wamene okaikila ali monga ni funde yapanyanja yamene yutolewa na mphepo noŵinduka-ŵinduka.
7 Munthu woteti osati ayembekezele kuti azalondele kanthu kufumila kwa Yehova.
8 Yove ni wokaikila-kaikila ndipo vochita vake vonse vuchinja-chinja.
9 Nkwasu wamene ni wonyozeka asangalale* chifukwa walemekezewa na Mulungu,
10 ndipo wachuma akondwele chifukwa waphunzila kunkhala wolichefya, chifukwa molingana na maluŵa akusanga, yove azafote.
11 Zuŵa ikafuma ikupya ngako nofotesha vomela ndipo maluŵa a vomela vamene ivo ombwela mwakuti kuwama kwake kusila. Molingana na vamene ivi munthu wachuma wamene uyo azafwe akali nkati mosakila chuma.
12 Wosangalala ni munthu wamene opilila mayeselo, chifukwa akazavomekejewa azalondele mphoto* ya moyo, yechilonjeza Yehova kuli onse amene opitilija kumukonda.
13 Munthu akankhala pa mayeselo osati akonena kuti: “Mulungu oniyesa.” Chifukwa Mulungu angayesewelini na vinthu viipa ndipo yove oyesalini munthu na vinthu viipa.
14 Koma munthu aliyense oyesewa na chilako-lako chake chamene chumukopa nomukasha.
15 Lomba chilako-lako chikatola vumo chuvyala chimo. Ndipo chimo ikachitika yuleta imfwa.
16 Akwasu apantima, osati muluŵilishiwe.
17 Mphaso iliyonse iweme komasoti yangwilo yufumila kululu. Yuseluka kufumila kwa Atata a vosanikila vakululu, amene ochinjalini monga ni chinfule chamene chuchinja-chinja.
18 Mwa kufuna kwake, yove etivyala petikhulupilila mawu ŵake amene ni choonadi. Echita vamene ivi kuti tinkhale vitwazi voyambilila pa volengewa vake.
19 Akwasu apantima, ziŵani ivi: Munthu aliyense akonkhala wokonzeka kumvwishila, akoganizila poyamba akaliyelaŵila komasoti osati akokulumija kukalipa,
20 chifukwa munthu wamene wakalipa ochitalini vinthu mokatijana na chilungamo cha Mulungu.
21 Tetyo lekani nkhalidwe iliyonse iipa ndipo chosani viipa vilivonse* vamene vasala muli mwewo. Molichefya vomekejani kuti mawu amene angakwanishe kukupulumushani akomolewe muli mwewo.
22 Koma mukochita vakunena mawu, osati kumvwa tyala, nolisempha na maganizo awenye.
23 Chifukwa keno munthu akumvwa tyala mawu, koma osachita, olingana na munthu wamene ololesha chinso chake pa chilola.
24 Yove olilolesha nofumapo ndipo nthawe yamene iyo oluŵa kuti ni munthu wotyani.
25 Koma wamene ololeshesha mulamulo yangwilo yamene yuleta ufulu ndipo opitilija kuiloleshesha, azankhale wosangalala na vakuchita chifukwa chakuti ni munthulini wamene akumvwa tyala noluŵa, koma wamene ochita vamene ivo vawamvwa.
26 Keno munthu oganiza kuti olambila Mulungu, koma okwanishalini kulamulila lilimi yake, olisempha* ndipo kulambila kwake kuliye pindu.
27 Kulambila* kutuŵa komasoti kwamene ni kosaipishiwa kwa Mulungu na Atata ŵasu ni uku: Kusamalila ŵana amasiye na anakazi amasiye amene okumana na mavuto* komasoti kupewa kuti ichi chalo chikuchitisheni kunkhala na maŵala.
Malizu a m'nyansi
^ Olo kuti, “opeleka paliye kufwanila aliyense vifukwa.”
^ Mu Chigiliki, “alitamandile.”
^ Mu Chichigiliki, “chisote cha nsimbi chuwoneka monga ni nkhata.”
^ Mabaibolo ayakine onena kuti, “viipa vinyinji ngako.”
^ Mu Chigiliki, “osempha ntima wake.”
^ Olo kuti, “Chipembezo.”
^ Mu Chigiliki, “mmasauso ŵawo.”
