Kalata ya Yakobo 3:1-18
3 Akwasu, osati pankhale aphunzisi anyinji pakati panu, poziŵa kuti tizalondele chiweluzo chikulu ngako.
2 Pala tonse tuphoniya* nthawe zinyinji. Keno munthu ophoniyalini pa mawu, niye kuti ni wangwilo ndipo angakwanishe kulamulilasoti muŵili wake wonse.
3 Tikamangilila nthambo pakamwa pa mahosi kuti akotimvwila, tukwanisha kulamulilasoti miŵili yawo yonse.
4 Ganizilanisoti za mabote. Olo kuti ni akulu ngako ndipo oyenda mokankhiwa na mphepo ya mphamvu, munthu wamene oyendesha oŵaphendusha na pulanga itontho ngako kuti alute kwawafuna yove.
5 Nayosoti lilimi ni kachizo katontho, koma yulitumba ngako. Ganizilani mwamene kamulilo katontho mokayashila sanga ikulu.
6 Lilimisoti ni mulilo. Pa vizo vonse va muŵili wasu, lilimi ni yozula na vinthu vosalungama chifukwa yuipisha muŵili wonse komasoti yuyasha moyo wonse wa munthu* ndipo ili na mulilo wa Gehena.*
7 Ŵanthu angakwanishe kuteka ntundu uliwonse wa nyama zakusanga, tunyoni, nyama zukalaŵa komasoti vamoyo va m’nyanja ndipo ankhala ochita vamene ivi.
8 Koma paliye munthu angakwanishe kuteka lilimi. Lilimi yulamulilikalini ndipo yuwononga komasoti ni yozula na poizoni yupaya.
9 Lilimi tuikatishila ntchito potamanda Yehova, wamene ni Atata, komasoti na lilimi yamene iyo tutembelela ŵanthu amene elengewa “mu chifanizilo cha Mulungu.”
10 Pakamwa pamozi pamene apo pofuma mawu otamanda komasoti otembelela.
Akwasu vinthu vufunikalini kuchitika mwanjila yamene iyi.
11 Kansi nyenje ingafumye manzi aweme* komasoti manzi oŵaŵa pa chisengu chimozi?
12 Akwasu, kansi chimuti cha nkhuyu chingatwale maolivi, olo kansi chimuti cha mpesa chingatwale nkhuyu? Olo nyenje ya manzi a munyu ingafumyelini manzi aweme.
13 Kansi pakati panu pali aliyense wanzelu na omvwisha vinthu? Keno alipo awoneshe vamene ivi pochita vinthu viweme pa moyo wake. Akochita vinthu vonse mofasa, yamene ni nkhalidwe yuwela chifukwa cha nzelu.
14 Koma keno muli na nsanje ikulu mmitima yanu na kukonda mikangano,* osati mulitumbe chifukwa kuchita vamene ivo ni kutalijila wenye choonadi.
15 Yamene iyi ni nzelulini yofumila kululu, koma ni ya pano pa chalo, yauchinyama komasoti yauchiŵanda.
16 Chifukwa pamene pali nsanje na ntima wokonda mikangano,* ponkhalasoti chisokonezo na vinthu viipa va ntundu uliwonse.
17 Koma nzelu yofumila kululu, choyamba ni ituŵa, pavuli pake ya ntendele, yololela, yokonzeka kumvwila, yozula na chifundo na vitwazi viweme, iliye sankho, komasoti iliye chinyengo.
18 Komasoti chilungamo ni chitwazi chamene ŵanthu oleta ntendele okomola mu ntendele.
Malizu a m'nyansi
^ Olo kuti, “tuphoniyesha vinthu.”
^ Olo kuti, “yuyasha chilichonse chakuchita munthu pa moyo wake.”
^ Onani matanthauzo a mawu ayakine.
^ Mu Chigiliki, “owama.”
^ Mabaibolo ayakine onena kuti, “na ntima wolikonda.”
^ Mabaibolo ayakine onena kuti, “ntima wolikonda.”