Kalata ya Yakobo 4:1-17
4 Kansi nkhondo na ndewo vamene vuchitika pakati panu vufumila kuni? Kansi vufumilalini mu vilako-lako va muŵili wanu vamene vulimbana kuti vikolamulila miŵili yanu?*
2 Mufunishisha, koma mulondelalini vamene ivo vamufunishisha. Mupitilija kupaya ŵanthu komasoti mukumbwila mwa nsanje koma mufwanalini kanthu. Mupitilija kukangana komasoti kuchita nkhondo. Muliye londele chifukwa chakuti muliyesenge.
3 Mukasenga, mulondelalini chifukwa musenga muli na cholinga chiipa, kuti mukhutilishe vilako-lako vamiŵili yanu.
4 Achigololo mwewo,* kansi muziŵalini kuti kuchita ushamwali na chalo nikuliika pa udani na Mulungu? Tetyo aliyense wamene ofuna kunkhala shamwali wa chalo olichitisha kuti ankhale mdani wa Mulungu.
5 Olo kansi muganiza kuti lemba yunena paliye chifukwa kuti: “Mzimu wamene unkhazikika muli sewo ukumbwila mwa nsanje vinthu vosiyana-siyana”?
6 Koma olo n’tetyo, kuwama ntima kukulu kwakupeleka Mulungu kupambana nkhalidwe yamene iyi. N’chifukwa chake lemba yunena kuti: “Mulungu oshusha olikuja, koma olichefya oŵawonesha kuwama ntima kwake kukulu.”
7 Tetyo gonjelani Mulungu, koma shushani Mdyelekezi ndipo azakuthaŵeni.
8 Vwendelani kuli Mulungu ndipo yovesoti azakuvwendeleni. Tuŵishani manja ŵanu mwewo ochimwa, ndipo tuŵishani mitima yanu mwewo okaikila-kaikila.
9 Mvwani chisoni ndipo lilani. Kuseka kwanu kunkhale kulila ndipo chisangalalo chanu chinkhale chisoni.
10 Mulichefye pamenso pa Yehova ndipo yove azakukwejeni.
11 Akwasu, muleke kulaŵililana viipa. Aliyense wamene olaŵilila viipa nkwake olo kumuweluza, olaŵilila viipa komasoti kuweluza lamulo. Lomba keno uweluza lamulo, uchitalini vayunena lamulo koma niwe woweluza.
12 Koma Wopeleka Malamulo komasoti Woweluza alipo mmozi tyala, wamenesoti angakwanishe kupulumusha nowononga. Lomba wewo niwe ŵani kuti ukoweluza muyako?
13 Mvwani mwewo amene munena kuti: “Lelo olo mailo tilute ku tauni yakuti-yakuti ndipo tikasile chaka kwamene uko. Tikachite malonda kwamene uko nofwana pindu.”
14 Mulaŵila vamene ivi koma muziŵalini kuti moyo wanu uzankhale tyani mailo. Chifukwa muli monga ni fulele wamene uwoneka tyala kwa kanthawe katontho pavuli pake nosila.
15 Mmalo mwake mukolaŵila kuti: “Yehova akalola, tinkhale na moyo ndipo tichite vakuti-vakuti.”
16 Koma mwewo mukonda kumeka komasoti kulitumba. Kulitumba konse kotetyo ni kuipa.
17 Tetyo keno munthu oziŵa kuchita chiweme koma ochichitalini, ochimwa.
