Kalata ya Yakobo 5:1-20
5 Mvwani mwewo ŵanthu achuma. Lilani moŵilikija chifukwa cha masauso amene akuza kuli mwewo.
2 Chuma chanu chawola ndipo vovwala vanu valyewa na njenjete.*
3 Golide na siliva wanu vawonongeka na nguwe. Nguwe yamene iyo izankhale umboni wokushushani ndipo izalye nyonfu wanu. Vamwasunga vizankhale monga ni mulilo mmasiku osilija.
4 Mvwani! Malipilo ŵamuliye peleke kuli ŵanthu amene ekata ntchito yoweja mminda yanu oŵilikija, ndipo Yehova wa magulu a nkhondo a kululu wamvwa kuŵilikija kosenga thandizo kwa ŵanthu amene awo oweja.
5 Mwankhala na moyo wosasoŵa chilichonse ndipo chino chalo mwachilyela. Mwalya ndipo mwaina monga ni nyama yamene ikuyapaiwa.
6 Mwaweluza komasoti kupaya munthu wolungama. Yove okushushani.
7 Tetyo lezani ntima akwasu, mpaka kunkhalapo kwa Ambuye. Ganizilani mwakuchitila mulimi. Yove oyembekezela mphela vitwazi va ntengo wapatali vofumila mu lito. Oyembekezela moleza ntima mpaka kulokwa kwa mvula yoyamba komasoti yosilijila.
8 Namwesoti nkhalani oleza ntima. Tang’ishani mitima yanu, chifukwa kunkhalapo kwa Ambuye kwavwendela.
9 Akwasu osati mukodandaula za ayakine,* kuti osati muweluziwe. Onani, Woweluza wapanama pa muliyango.
10 Akwasu, pa nkhani yotamana na mavuto komasoti kuleza ntima, konkhejani chisanzo cha aneneli amene elaŵila mu zina ya Yehova.
11 Monga ni mwamuziŵila, ŵanthu amene epilila tuŵawona kuti ni olemela.* Mwechimvwa za kupilila kwa Yobu ndipo muziŵa madaliso ŵechimupasa Yehova. Muwona mweka kuti Yehova ni wachikondi chikulu komasoti wachifundo.
12 Koma kupambana vonse akwasu, lekani kulapa, potomola kululu, pano pa chalo olo kulapa kuyakine kulikonse. Koma mukanena kuti “Eye,” akonkhala chendi eye ndipo mukanena kuti “Yayi,” akonkhala chendi yayi kuti osati munkhale ŵanthu oyenelela kuweluziwa.
13 Kansi pakati panu pali aliyense wamene okumana na mavuto? Apitilije kupemphela. Kansi pali aliyense wamene osangalala? Aimbe nyimbo zotamanda Mulungu.
14 Kansi pakati panu pali aliyense wamene olwala? Aite akulu a mpingo, ndipo ove amupemphelele nomuzoleka mafuta mu zina ya Yehova.
15 Pemphelo ya chikhulupililo izapojeke munthu wamene uyo olwala* ndipo Yehova azamutang’ishe. Komasoti keno echita machimo, azakhululukiliwe.
16 Tetyo muululilane machimo ŵanu patuŵa nopemphelelana, kuti mupojekewe. Pemphelo yopapatila ya munthu wolungama yukata ntchito mwamphamvu ngako.*
17 Eliya enze munthu mongasoti ni sewo, koma olo n’tetyo pechipemphela kufumila pansi pa ntima kuti mvula osati ilokwe, mvula iliyelokwe chendi mu chalo chamene icho kwa vyaka vitatu na miyezi 6.
18 Pavuli pake epemphelasoti ndipo mvula ilokwa kufumila kululu mwakuti nthaka ifumya vitwazi vake.
19 Akwasu, keno munthu muyakine pakati panu waleka choonadi chifukwa choluŵilishiwa, lomba munthu muyakine nomujosha,
20 ziŵani kuti wamene wajosha munthu wochimwa wamene uyo pa njila yake iipa, wamupulumusha ku imfwa ndipo Mulungu azakhululukile wochimwa wamene uyo machimo anyinji.
Malizu a m'nyansi
^ Mawu a Chigiliki amene eŵamasulila kuti “njenjete” otanthauza ntundu uyakine wa tudoyo tuchita monga ni nsenene (ayakine akuti nyense) twamene tudjeta vovwala.
^ Olo kuti, “Osati mukong’ung’uzika za ayakine.”
^ Olo kuti, “osangalala.”
^ Mabaibolo ayakine onena kuti, “woŵeŵa wamene uyo.”
^ Mu Chigiliki, “yunkhala ya mphamvu ngako payukata ntchito.”
