Wilembewa na Yohani 1:1-51
1 Pachiyambi, penze muyakine wamene enzeziŵika kuti Mawu, ndipo Mawu wamene uyo enze na Mulungu komasoti Mawu wamene uyo enze mulungu.*
2 Wamene uyo enze na Mulungu kufumila pachiyambi.
3 Vinthu vonse vinkhalako kupitila muli yove ndipo paliye chinthu olo chimozi chamene chinkhalapo paliye yove.
4 Moyo winkhalapo kupitila muli yove ndipo moyo wamene uyo wenze kungweleŵela kosanikila ŵanthu.
5 Kungweleŵela kwamene uko kusanika mu mfinzi koma mfinzi yamene iyo iliye gonjese kungweleŵela kwamene uko.
6 Kwiwela munthu muyakine wamene etumiwa monga nthumi ya Mulungu. Zina yake enze Yohani.
7 Munthu wamene uyu ewela monga ni mboni, kuti azachitile umboni za kungweleŵela kwamene uko na cholinga chakuti ŵanthu osiyana-siyana akhulupilile kupitila muli yove.
8 Yove enzelini kungweleŵela, koma echingowela kuzachitila umboni za kungweleŵela kwamene uko.
9 Kungweleŵela ngako-ngako kwamene kusanikila ŵanthu osiyana-siyana kwenze kwisala patontho kuwela mu chalo.
10 Yove enze m’chalo ndipo chalo chinkhalapo kupitila muli yove, koma chalo chamene icho chiliye muziŵe.
11 Yove ewela mu chalo cha kwawo, koma ŵanthu ngawo-ngawo a kwawo aliye mulondele.
12 Koma olo n’tetyo onse amene emulondela, epasiwa mphamvu na yove kuti ankhale ŵana a Mulungu, chifukwa chakuti enzekhulupilila zina yake.
13 Ove aliyevyalike kufumila ku ŵanthu olo, chifukwa cha kufuna kwa ŵanthu olosoti chifukwa cha kufuna kwa munthu, koma evyalika kufumila kwa Mulungu.
14 Tetyo Mawu wamene uyo enkhala na muŵili wa nyama ndipo enzenkhala pakati pasu. Sewo tiwona ulemelelo wake, ulemelelo wolingana na wakulondela mwana wovyalika yeka kufumila kwa atata ŵake. Mulungu enzemuwamila ntima ngako* komasoti yove enzephunzisa choonadi.
15 (Yohani enzechitila umboni za yove, mwakuti enzechita kuŵilikija kuti: “Uyu niye wala wenenzenena kuti, ‘Wamene akuza mvuli mwangu ni nkulu kupambana newo, chifukwa enkhalapo newo nikaliye vyalika.’”)
16 Chifukwa chakuti enze na kuwama ntima kukulu, nthawe zonse tenzelondela kuwama ntima kukulu ngako.
17 Pakuti Chilamulo chipelekewa kupitila mwa Mose, kuwama ntima kukulu komasoti choonadi vinkhalako kupitila mwa Yesu Khilisitu.
18 Paliye munthu wamene ewonapo Mulungu kufumila kale yonse, koma mulungu wovyalika yeka wamene ali pafupi na Atata* niye efotokoza vokhuza Mulungu.
19 Yohani epeleka umboni, Ayuda pechitumija ansembe na Alevi kufumila ku Yelusalemu kuyamukonsha kuti: “Kansi niwe ŵani?”
20 Yove evomela ndipo aliyekane. Enena kuti: “Newo ninelini Khilisitu.”
21 Ove emukonsha kuti: “Lomba niwe ŵani? Niwe Eliya payakine?” Yove eyankha kuti: “Yayi.” “Olo payakine niwe Mneneli?” Yove eyankha kuti: “Yayi!”
22 Tetyo ove emukonsha kuti: “Lomba niwe ŵani? Tiuje kuti tikakwanishe kupeleka yankho kuli atituma. Wewo wamunecho unena kuti niwe ŵani?”
23 Yove enena kuti: “Nine Mawu a muyakine wamene oŵilikija m’chipululu kuti, ‘Yondololani njila ya Yehova,’ monga ni mwechinenela mneneli Yesaya.”
24 Ŵanthu amene awo etumiwa na Afalisi.
25 Tetyo emukonsha kuti: “Lomba ndaŵa yanji ubatiza ŵanthu keno niwelini Khilisitu, Eliya olo Mneneli?”
26 Yohani eŵayankha kuti: “Newo nubatiza mmanzi. Pakati panu papanama muyakine wamene mwewo mumuziŵalini.
27 Yove niye akuza mvuli mwangu ndipo newo ninelini woyenelela kumasula nthambo za nsapato zake.”
28 Vinthu vamene ivi vichitikila ku Betaniya, kusilya kwa Yolodano, kwenze batizila ŵanthu Yohani.
29 Nsiku yokonkhapo ewona Yesu owela kuli yove, ndipo enena kuti: “Onani Mwana wa mbelele wa Mulungu wamene ofumya uchimo wa chalo!
30 Uyu niye wala wenenzenena kuti: ‘Wamene akuza mvuli mwangu ni nkulu kupambana newo, chifukwa enkhalapo newo nikaliye vyalika.’
31 Newosoti nenzemuziŵalini, koma chifukwa chanubatizila ŵanthu mmanzi ni chakuti yove awonekele kuli Aisilaeli.”
32 Yohani echitilasoti umboni kuti: “Niwona mzimu uwela monga ni nkhunda kufumila kululu ndipo winkhala mphela pali yove.
33 Newosoti nenzemuziŵalini, koma Mulungu wamene enituma kuzabatiza mmanzi eniuja kuti: ‘Ukazawona mzimu uwela nonkhala pa munthu muyakine, wamene uyo niye obatiza na mzimu utuŵa.’
34 Newo niwona chendi vamene ivo ndipo nachitila umboni kuti yove ni Mwana wa Mulungu.”
35 Nsiku yokonkhapo Yohani enze panamesoti na ophunzila ŵake aŵili,
36 ndipo pechiwona Yesu oyenda, enena kuti: “Onani, Mwana wa mbelele wa Mulungu!”
37 Ophunzila aŵili amene awo pechimvwa kuti olaŵila vamene ivi, ekonkhelela Yesu.
38 Pavuli pake Yesu echeuka, ndipo pechiwona kuti omukonkhelela, yove eŵakonsha kuti: “Kansi musakila-sakila chinji?” Ove eyankha kuti: “Labi, (zina yamene iyi ikamasuliliwa yutanthauza kuti, “Mphunzisi”) Kansi munkhala kuni?”
39 Yove eŵauja kuti: “Tiyeni mukakuwone.” Tetyo eluta kuyawona kwenzenkhala ndipo enkhala pamozi nsiku yamene iyo. Apa nthawe yenze cha mma 4 koloko nchingulo.*
40 Andileya nkwake wa Simoni Petulo enze mmozi wa aŵili amene awo, amene echimvwa vechinena Yohani nokonkhelela Yesu.
41 Poyamba yove ekumana na nkwake wa Simoni ndipo emuuja kuti: “Sewo tafwana Mesiya” (zina yamene iyi ikamasuliliwa yutanthauza “Khilisitu”),
42 ndipo eluta naye kwa Yesu. Yesu pechimulolesha enena kuti: “Wewo niwe Simoni mwana wa Yohani, zina yako inkhale Kefa” (yamene kumasulila kwake ni “Petulo”).
43 Nsiku yokonkhapo, Yesu eganiza zakuti alute ku Galileya. Tetyo ekumana na Filipo nomuuja kuti: “Unkhale wophunzila wangu.”
44 Filipo enze waku Besaida, tauni yenzefumila Andileya na Petulo.
45 Pavuli pake Filipo ekumana na Natanayeli nomuuja kuti: “Sewo tafwana Yesu, mwana wa Yosefe, waku Nazaleti. Chilamulo cha Mose komasoti vechilemba aneneli vunena za yove.”
46 Koma Natanayeli emukonsha kuti: “Kansi mu Nazaleti mungafume munthu aliyense muweme?” Filipo emuuja kuti: “Tiye ukamuwone.”
47 Yesu pechiwona Natanayeli akuza kuli yove enena kuti: “Onani Muisilaeli wachendi, wamene muli yove muliye chinyengo.”
48 Natanayeli emukonsha kuti: “Mwaniziŵa tyani?” Yesu emuyankha kuti: “Filipo akaliye kuita, newo nakuwona pewenze pala pansi pa chimuti cha nkhuyu.”
49 Natanayeli emuyankha kuti: “Labi, nimwe Mwana wa Mulungu, ndipo nimwe Mfumu ya Isilaeli.”
50 Yesu emuyankha kuti: “Kansi wakhulupilila chifukwa chakuti nakuuja kuti nakuwona pewenze pansi pa chimuti cha nkhuyu? Uzawone vinthu vikulu kupambana vamene ivi.”
51 Pavuli pake emuuja kuti: “Shuwa nukuujani mwewo mwa ŵanthu, muzawone kululu kuliseguke, angelo a Mulungu okwela noseluka kuluta kuli Mwana wa munthu.”
Malizu a m'nyansi
^ Olo kuti, “enze monga ni mulungu.”
^ Olo kuti, “enzemuwonesha kuwama ntima kukulu.”
^ Olo kuti, “panganga pa Atata.” Vamene ivi vuwonesha kuti enzekondewa mwapadela.
^ Mu Chigiliki, “awazi ya 10,” kuŵelenga kufumila cha mma 6 koloko mmawa.
