Wilembewa na Yohani 10:1-42
10 “Shuwa nukuujani, oloŵa m’chiŵaya cha mbelele mochita kukwela pa malo ayakine osati kuloŵa na pamuliyango wamene uyo ni kawalala komasoti ni wolonda vinthu vayakine.
2 Koma wamene oloŵa na pamuliyango ni chiŵeta wa mbelele zamene izo.
3 Kamalonda wa pamuliyango omusegulila ndipo mbelele zumvwila mawu ŵake. Mbelele zake oziita mazina nozisogolela pofuma nazo.
4 Akafumya mbelele zake zonse kunja ozisogolela ndipo mbelele zamene izo zumukonkhelela, chifukwa zuziŵa mawu ŵake.
5 Zizakonkhelelelini mulwendo koma zizamuthaŵe, chifukwa zuziŵalini mawu ŵa alwendo.”
6 Yesu enena fanizo yamene iyi kuli ove, koma ove aliye mvwishe tanthauzo ya vamene ivo venzeŵauja.
7 Tetyo Yesu eŵaujasoti kuti: “Shuwa nukuujani newo nine mulyango wazuloŵela mbelele.
8 Onse amene awela notala wenye kuti ni achiŵeta ngawo-ngawo, ni akawalala komasoti olonda vinthu va ayakine ndipo mbelele ziliye ŵamvwile.
9 Newo nine mulyango. Aliyense wamene oloŵa kupitila muli newo azapulumuke ndipo akoloŵa nofuma kuyafwana nsipu.
10 Kawalala owela na cholinga chofuna kuiŵa, kupaya nowononga. Koma newo nawela kuti mbelele zinkhale na moyo komasoti kuti zinkhale nawo utali.
11 Newo nine chiŵeta muweme. Chiŵeta muweme opeleka moyo wake chifukwa cha mbelele.
12 Munthu waganyu wamene ni chiŵetalini ndipo mbelele zamene izo ni zakelini, akawona mphumphi ikuza osiya mbelele zamene izo nothaŵa. Tetyo mphumphi yamene iyo yuzikata ndipo zumwajika.
13 Ochita vamene ivi chifukwa yove ni waganyu ndipo oikilakolini nzelu ku mbelele zamene izo.
14 Newo nine chiŵeta muweme. Mbelele zangu nuziziŵa ndipo nazosoti zuniziŵa,
15 monga ni mwavilili kuti Atata oniziŵa ndipo nanesoti nuŵaziŵa Atata. Tetyo nupeleka moyo wangu chifukwa cha mbelele zamene izo.
16 Nili na mbelele ziyakine zamene ni za m’chiŵayalini chamene ichi. Zamene izosoti nufunikila kuzileta ndipo zizamvwe mawu ŵangu. Zizankhale gulu imozi ndipo chiŵeta wazine azankhale mmozi.
17 Atata onikonda chifukwa chakuti nupeleka moyo wangu kuti nikaulondelesoti.
18 Paliye munthu wamene ochosa moyo wangu, koma nuupeleka mwakufuna kwangu. Nili na mphamvu zoupeleka komasoti nili na mphamvu zoulondelasoti. Atata ŵangu niye enilamula kuti nichite vamene ivi.”*
19 Apasoti Ayuda eyaŵanika chifukwa cha mawu amene aŵa.
20 Anyinji a ove enzenena kuti: “Wamene uyu ali na chiŵanda ndipo ni wosiluka. Ndaŵa yanji mumumvwishila?”
21 Ayakine enena kuti: “Amene aŵa ni mawulini a munthu ali na chiŵanda yayi. Kansi chiŵanda chingasegule menso a ŵanthu asalola?”
22 Pa nthawe yamene iyo mu Yelusalemu mwichitika Chikondwelelo Chopeleka Kachisi kwa Mulungu. Yamene iyi yenze nthawe yozizila ngako,
23 ndipo Yesu enzeyenda m’kachisi mwamene umo mulukolo ya vipilala ya Solomo.
24 Pavuli pake Ayuda emuzenguluka noyamba kumuuja kuti: “Kansi utivutishe maganizo mpaka nthawe yanji? Keno niwe chendi Khilisitu, tiuje mosapita mbali.”
25 Yesu eŵayankha kuti: “Nakuujani kale, koma mwewo mukhulupililalini. Ntchito zanuchita newo mu zina ya Atata ŵangu zunichitila umboni.
26 Koma mwewo mukhulupililalini chifukwa nimwelini mbelele zangu.
27 Mbelele zangu zikumvwa mawu ŵangu. Newo nuziziŵa ndipo mbelele zamene izo zunikonkhelela.
28 Nizazipase moyo wosasila ndipo zizawonongekelini komasoti paliye akuti azanilonde mmanja mwangu.
29 Mbelele zanipasa Atata ni zofunika kupambana vinthu viyakine vonse, ndipo paliye angazilonde mmanja mwa Atata.
30 Newo na Atata nise amozi.”*
31 Apasoti Ayuda amene awo etola myala kuti amuteme.
32 Yesu eŵauja kuti: “Nakuwoneshani ntchito zinyinji ziweme zofumila kwa Atata. Lomba mufuna kunitema chifukwa cha ntchito yotyani mwa zamene izi?”
33 Ayuda amene awo emuyankha kuti: “Tufunalini kukutema chifukwa cha ntchito iweme, koma chifukwa chonyoza Mulungu. Wewo niwe munthu tyala koma uliyeja kuti niwe mulungu.”
34 Yesu eŵakonsha kuti: “Kansi mu Chilamulo chanu aliye lembemo kuti, ‘Newo nanena kuti: “Mwewo nimwe milungu”’?*
35 Keno ŵanthu amene eshushiwa na mawu a Mulungu amene osilalini mphamvu, eŵaita kuti milungu,’
36 kansi mwewo muuja newo wamene Atata enituŵisha nonitumija m’chalo kuti, ‘Unyoza Mulungu,’ chifukwa nanena kuti, ‘Nine Mwana wa Mulungu’?
37 Keno nuchitalini ntchito za Atata ŵangu, osati munikhulupilile.
38 Koma keno nuzichita, olo kuti munikhulupililalini, khulupililani ntchito zamene izo, kuti muziŵe nopitilija mphela kuziŵa kuti Atata na newo nise okatijana.”
39 Tetyo eyejasoti kuti amukate, koma yove eŵajeŵa.
40 Yove etaukasoti Yolodano noluta kwenzebatizila Yohani poyamba ndipo enkhala kwamene uko.
41 Ŵanthu anyinji ewela kuli yove noyamba kunena kuti: “Yohani aliyechite chizindikilo chilichonse, koma vonse vechilaŵila Yohani vokhuza munthu wamene uyu venze vachendi.”
42 Tetyo ŵanthu anyinji emukhulupilila kwamene uko.
Malizu a m'nyansi
^ Mu Chigiliki, “Nilondela lamulo yamene iyi kufumila kwa Atata ŵangu.”
^ Olo kuti, “nise okatijana.”
^ Olo kuti, “nimwe olingana na mulungu.”