Wilembewa na Yohani 11:1-57
11 Lomba penze munthu muyakine wamene enzelwala, zina yake Lazalo. Enze wa mmunzi wa Betaniya, kwawo kwa Maliya na nkwake Malita.
2 Maliya wamene uyu ni wala wamene etila Ambuye mafuta onunkhila nopukuta mendo ŵawo na sisi yake. Lazalo enzelwala wamene uyu enze mulongosi wake.
3 Tetyo azilongosi ŵake amene awo etumija uthenga kwa Yesu kuti: “Ambuye wala wamukonda olwala.”
4 Koma Yesu pechimvwa vamene ivi enena kuti: “Kulwala kwamene uku ni kwa imfwalini tyala, koma ni kwakuti Mulungu alondele ulemelelo komasoti kuti Mwana wa Mulungu alemekezeke chifukwa cha kulwala kwamene uko.”
5 Yesu enzekonda Malita na nkwake komasoti Lazalo.
6 Koma pechimvwa kuti Lazalo olwala enkhala mphela masiku ayakine aŵili kumalo kwamene uko kwenze.
7 Masiku aŵili amene awo pechisila, Yesu euja ophunzila ŵake kuti: “Tiyeni tilutesoti ku Yudeya.”
8 Ophunzila amene awo emuuja kuti: “Labi, kwalombapano Ayudeya enzefuna kukutemani na myala, lomba mufuna mulutesoti kwamene uku?”
9 Yesu eŵayankha kuti: “Kansi nzuŵa munkhalalini na ma awazi 12? Keno munthu oyenda nzuŵa paliye chumukhubulwisha, chifukwa owona kungweleŵela kwa ichi chalo.
10 Koma keno munthu oyenda usiku okhubulwa chifukwa muli yove muliye kungweleŵela.”
11 Pechinena vamene ivi, euja ophunzila ŵake amene awo kuti: “Muyasu Lazalo ali mu tulo, koma nikuya kwamene kuyamuusha.”
12 Pamene apo ophunzila amene awo enena kuti: “Ambuye, keno aliyone ankhale luweme.”
13 Apa Yesu enzetanthauza kuti Lazalo wamwalila. Koma ove enzeganiza kuti onena za tulo ngato-ngato.
14 Pavuli pake Yesu eŵauja mosapita mmbali kuti: “Lazalo wamwalila,
15 ndipo newo nukondwela chifukwa cha mwewo kuti nenzelini kwamene uku kuti mwewo mukhulupilile. Koma tiyeni tilute kuli yove.”
16 Tetyo Thomase, wamene enzeziŵikasoti kuti Didimo, euja ophunzila ayake amene awo kuti: “Nasesoti tiyeni tilute kuti tikafwile naye pamozi.”
17 Yesu pechifwika kwamene uko, efwana kuti Lazalo wasila masiku 4 ali mmanda*.
18 Munzi wa Betaniya wenze pafupi na Yelusalemu pa msenga wa makilomita pafupi-fupi atatu.*
19 Lomba Ayuda anyinji ewela kuli Malita na Maliya kuzaŵatonthoja chifukwa cha imfwa ya mulongosi wawo.
20 Tetyo Malita pechimvwa kuti Yesu akuza, eluta kuyamuchunguja, koma Maliya esala ku ng’anda.
21 Malita euja Yesu kuti: “Ambuye, kuti mwenze kuno, mulongosi wangu sembe aliye mwalile.
22 Koma olo n’tetyo, palipano nuziŵa kuti chilichonse chamungasenge kwa Mulungu, yove akupaseni.”
23 Yesu emuuja kuti: “Mulongosi wako auke.”
24 Malita enena kuti: “Nuziŵa kuti azauke pa kuuka kwa akufwa mu nsiku yosilijila.”
25 Yesu emuuja kuti: “Newo nine kuuka na moyo. Aliyense wokhulupilila newo, olo kuti amwalile azankhalesoti na moyo.
26 Komasoti aliyense wamene ali na moyo ndipo onikhulupilila azafwelini. Kansi ukhulupilila vamene ivi?”
27 Yove eyankha kuti: “Eye, Ambuye. Nukhulupilila kuti nimwe Khilisitu Mwana wa Mulungu, wenzeyembekezela ŵanthu kuti azawele muli ichi chalo.”
28 Pechilaŵila vamene ivi, eluta kuyaita nkwake Maliya nomuuja mwachisinsi kuti: “Mphunzisi wawela ndipo okuita.”
29 Maliya pechimvwa vamene ivo, enyamuka mokulumija noluta kwenze yove.
30 Pa nthawe yamene iyi Yesu enze akaliyeloŵa mmunzi mwamene umo. Yove enze akali ku malo kwechikumana na Malita.
31 Ayuda ŵenze nawo pamozi m’ng’anda mwamene umo, amene enzemutonthoja pechiwona Maliya onyamuka mokulumija nofuma kunja, emukonkhelela. Ove enzeganiza kuti akuya ku manda* kuti akalile kwamene uko.
32 Maliya pechifwika kwala kwenze Yesu nomuwona, egwada noŵelama mpaka chinso chake pansi pafupi na mendo a Yesu. Pavuli pake emuuja kuti: “Ambuye, kuti mwenze kuno sembe mulongosi wangu aliye mwalile.”
33 Yesu pechimuwona olila komasoti Ayuda ŵechiwela nawo pamozi olilasoti, eyamba kulila povutika mu ntima na kumvwa chisoni.
34 Pavuli pake ekonsha kuti: “Mwamuika kuni?” Ove enena kuti: “Ambuye tiyeni mukawone.”
35 Yesu eponesha misozi.
36 Pamene apo Ayuda amene awo eyamba kunena kuti: “Onani, enzemukonda ngako chendi!”
37 Koma ayakine mwa ove enena kuti: “Kansi wamene uyu, wamene esegula menso a munthu wala asalola, sembe aliye kwanishe kuchita chinthu chiyakine kuti muyake wamene uyu osati amwalile?”
38 Pavuli pake Yesu pechililasoti povutika mu ntima, efwika ku manda kwamene uko* ngako-ngako yenze nkhwema, ndipo eivala na chimwala.
39 Yesu enena kuti: “Chosani chimwala chamene ichi.” Malita, mulongosi wa womwalila wamene uyo euja Yesu kuti: “Ambuye, apa lomba payakine wayamba kununkha, chifukwa lelo ni nsiku ya 4 kufumila pechiikiwa mmanda.”
40 Yesu emuuja kuti: “Kansi niliye kuuje kuti keno ungakhulupilile uzawone ulemelelo wa Mulungu?”
41 Tetyo echosa chimwala chamene icho. Pavuli pake Yesu elolesha kululu nonena kuti: “Atata, nukutembejani kuti munimvwa.
42 N’chendi, nuziŵa kuti munimvwa nthawe zonse koma nulaŵila vamene ivi chifukwa cha gulu ya ŵanthu amene aŵa apanama pano, kuti akhulupilile kuti mwewo mwinituma newo.”
43 Pechilaŵila vamene ivi, eŵilikija mokweja mawu kuti: “Lazalo, fuma!”
44 Munthu wala wamene enze wakufwa efuma. Mendo na manja ŵake enze ozeŵejewa na nyula za malilo, chinso chakesoti chenze chomanga na nyula. Tetyo Yesu eŵauja kuti: “M’masuleni kuti akwanishe kuyenda.”
45 Tetyo Ayuda anyinji amene ewela kuli Maliya nowona vamene ivo vechichita Yesu emukhulupilila.
46 Koma ayakine a ove eluta kwa Afalisi kuyaŵauja vechichita Yesu.
47 Pevichitika tetyo ansembe akulu-akulu na Afalisi eungana mu Khoti Ikulu ya Ayuda* nonena kuti: “Kansi tichite tyani pamene apa? Chifukwa munthu wamene uyu ochita vizindikilo vinyinji.
48 Keno tingamulekelele, onse azamukhulupilile ndipo Aloma azawele kuzatola malo* ŵasu na ntundu wasu.”
49 Koma mmozi wa ove, Kayafa, wamene enze nkulu wa ansembe chaka chamene icho, enena kuti: “Paliye chamuziŵa mwewo,
50 ndipo muwonalini kuti n’voyavya kuli mwewo kuti munthu mmozi afwile ŵanthu onse mmalo mwakuti ntundu wonse uwonongeke.”
51 Vamene ivi vechinena aliye viganize mwa yove yeka, koma chifukwa enze nkulu wa ansembe chaka chamene icho, elosela kuti Yesu azafwile ntundu wamene uyo.
52 Ndipo osati kufwila ntundu tyala, koma kuti aunganijesoti pamozi ŵana a Mulungu amene emwajikana.
53 Ndipo kufumila nsiku yamene iyo epangana zakuti amupaye.
54 Tetyo, Yesu enzeyenda-yendalinisoti mowonekela kuli Ayuda. Koma efuma kwamene uko noluta mu dela iyakine yapafupi na chipululu, mu tauni yamene yenzeitiwa kuti Efulayimu. Ndipo enkhala kwamene uko pamozi na ophunzila ŵake.
55 Lomba nthawe ya Pasika wa Ayuda yenze ivwendela ndipo ŵanthu anyinji efuma mminzi noluta ku Yelusalemu kuti akachite mwambo wa kulituŵisha, nthawe ya Pasika wamene uyo ikaliye fwika.
56 Ove enze sakila Yesu ndipo enzepanama m’kachisi mwamene umo nokambilana kuti: “Muganiza tyani? Kansi yove awelelini kuchikondwelelo chamene ichi?”
57 Koma ansembe akulu-akulu na Afalisi elamula kuti aliyense wamene angaziŵe kuli Yesu, aulule kuti ove akamukate.
Malizu a m'nyansi
^ Olo kuti, “mmanda achikumbukilo.”
^ Mu Chigiliki, “masitadiya pafupi-fupi 15.”
^ Olo kuti, “ku manda achikumbukilo.”
^ Olo kuti, “ku manda achikumbukilo amene awo.”
^ Mu Chigiliki, “Sanihedilini.”
^ Kutanthauza kachisi.
