Wilembewa na Yohani 12:1-50
12 Kwasala masiku 6 kuti Pasika ayambe, Yesu efwika ku Betaniya kwamene kwenze Lazalo, wechiusha Yesu kwa akufwa.
2 Tetyo emupikila chakulya cha nchingulo kwamene uko, ndipo Malita enzeŵatumikila. Lazalo enze mmozi mwa ŵanthu ŵenzekulya nawo pamozi.
3 Lomba Maliya etola mafuta onunkhila. Mafuta amene awo enze nado ngaye-ngaye, odula ngako, okwana magilamu 327. Maliya etila mafuta amene awo pa vipazi va Yesu nopukuta vipazi vamene ivo na sisi yake. M’ng’anda monse mwamene umo mwichingoti phuu kavumba kaweme ka mafuta amene awo.
4 Koma Yudasi Sikaliyoti, mmozi wa ophunzila ŵake, wamene enze esala patontho kumupeleka enena kuti:
5 “Ndaŵa yanji mafuta onunkhila amene aŵa aliyegulisiwe madinali 300 nopeleka ndalama zamene izo kuli ŵanthu osauka?”
6 Sikuti enena vamene ivi chifukwa enzedela nkhaŵa osauka, koma chifukwa chakuti enze kawalala. Yove enzesunga bokosi ya ndalama ndipo enzeiŵa ndalama zenzeponyewa m’bokosi yamene iyo.
7 Lomba Yesu eŵauja kuti: “Musiyeni, achite mwambo wamene uyu pokonzekela nsiku yanikuti nizaikiwe mmanda.
8 Osauka amene awo muli nawo nthawe zonse, koma newo muzankhalelini nane nthawe zonse.”
9 Pavuli pake gulu ikulu ya Ayuda iziŵa kuti Yesu ali kwamene uko. Tetyo ifwika osati chifukwa cha Yesu yeka, koma kuti izawonesoti Lazalo wechiusha yove kwa akufwa.
10 Tetyo ansembe akulu-akulu epangana kuti apayesoti Lazalo,
11 chifukwa Ayuda anyinji enzeluta kwamene uko nokhulupilila Yesu chifukwa cha Lazalo wamene uyo.
12 Nsiku yokonkhapo, gulu ikulu ya ŵanthu amene ewela kuchikondwelelo chamene icho echimvwa kuti Yesu akuza ku Yelusalemu kwamene uko.
13 Tetyo etola misambo yakanjeza nofuma kuyamuchinguja. Ndipo eyamba kuŵilikija kuti: “Mpulumuseni Wodalisiwa ni wamene akuza mu zina ya Yehova, wamene ni Mfumu ya Isilaeli!”
14 Yesu pechifwana bulu ntontho ekwela pa bulu wamene uyo mokatijana na Malemba amene onena kuti:
15 “Osati uyope mwana mwanakazi wa Ziyoni. Ona! Mfumu yako ikuza ilikwele mwana mwanalume wa bulu.”
16 Poyamba ophunzila ŵake amene awo aliye kwanishe kumvwisha vamene ivi. Koma Yesu pechipasiwa ulemelelo, ove ekumbukila kuti vechimuchitila ŵanthu amene awo venze volingana ndendende na vilembewa vokhuza yove.
17 Lomba ŵanthu anyinji amene enzepo yove pechiita Lazalo kuti afume mmanda* nomuusha, epitilija kumuchitila umboni.
18 N’chifukwa chakesoti ŵanthu anyinji eluta kuyamuchinguja, chifukwa echimvwa kuti echita chizindikilo chamene ichi.
19 Tetyo Afalisi eyamba kukambilana kuti: “Apa lomba muwona mweka kuti paliye chatupindulapo. Onani! Chalo chonse chumukonkhelela.”
20 Pakati pa ŵanthu amene ewela kuzalambila kuchikondwelelo kwamene uko penzesoti Agiliki.
21 Ove eluta kwa Filipo wamene kwawo kwenze ku Besaida waku Galileya, ndipo eyamba kumusenga kuti: “Mwewo akulu, sewo tufuna tiwone Yesu.”
22 Filipo eluta kuyauja Andileya vamene ivo ndipo Andileya na Filipo eluta kuyauja Yesu.
23 Koma Yesu eŵayankha kuti: “Nthawe yakuti Mwana wa munthu alemekezewe yakwana.
24 Shuwa nukuujani, kambewu ka tiligu kakaleka kuponela pa lito nakufwa konkhala mphela kamozi kamene ako. Koma kakafwa kotwala vitwazi vinyinji.
25 Aliyense wamene okonda moyo wake ouwononga, koma aliyense wamene ozonda moyo wake muli chino chalo outeteza kuti azafwane moyo wosasila.
26 Keno munthu ofuna kunitumikila anikonkhelele ndipo kwanikuti nizankhale ntumiki wangu azankhalesoti kwamene uko. Aliyense wotumikila newo, Atata azamulemekeze.
27 Moyo wangu uvutika lomba, kansi nilaŵile chinji? Atata nipulumusheni ku nthawe yovuta yamene iyi. Koma olo n’tetyo nthawe yamene iyi yufunikila kunifwika pakuti n’chifukwa chake niwela.
28 Atata lemekezani zina yanu.” Pechilaŵila tetyo mawu emvwika kufumila kululu akuti: “Nailemekeza ndipo nizailemekezesoti.”
29 Tetyo gulu ya ŵanthu amene enzepaname pamene apo echimvwa vamene ivi ndipo eyamba kunena kuti leza wagunda. Ayakine enzenena kuti: “Mngelo walaŵila naye.”
30 Yesu eŵauja kuti: “Mawu amene aŵa aliyemvwike chifukwa cha newo, koma chifukwa cha mwewo.
31 Lomba chalo ichi chuweluziwa, wolamulila wa ichi chalo aponyewe kunja lomba.
32 Koma newo nikazakwejewa mmululu pano pa chalo, nizaite* ŵanthu osiyana-siyana kuwela kuli newo.”
33 Enzenena vamene ivi pofuna kuwonesha mwakuti azafwile pakangopita nthawe itontho.
34 Lomba gulu yamene iyo ya ŵanthu imuyankha kuti: “Sewo tichimvwa m’Chilamulo kuti Khilisitu azankhale kosasila. Lomba mwewo munena tyani kuti Mwana wa munthu ofunikila kukwejewa mmululu? Kansi Mwana wa munthu wamene uyo ni ŵani?”
35 Yesu eŵauja kuti: “Kungweleŵela kunkhale mphela pakati panu kwa kanthawe katontho. Yendani pamukali na kungweleŵela kwamene uko, kuti mfinzi osati ikufwikeni. Aliyense wamene oyenda mu mfinzi oziŵalini kwakuya.
36 Pamukali na kungweleŵela kwamene uko, woneshani kuti mukhulupilila kungweleŵela kwamene uko, kuti munkhale ŵana ŵake akungweleŵela.”
Yesu pechinena vamene ivi, efuma nakuyafisama.
37 Olo kuti echita vizindikilo vinyinji pamenso pawo, ove enzemukhulupililalini,
38 mwakuti mawu a mneneli Yesaya ekwanilishiwa. Yove enena kuti: “Yehova, kansi ni ŵani ekhulupilila vinthu vechimvwa kuli sewo?* Ndipo kansi kwanja ya Yehova iwoneshewa kuli ŵani?”
39 Chifukwa chamene chichitisha kuti osati akhulupilile niyesoti chechinena mneneli Yesaya kuti:
40 “Wachitisha menso ŵawo kuti osati akolola ndipo wayumisha mitima yawo, kuti osati akowona na menso ŵawo amene awo, kuti mitima yawo osati imvwishe vinthu nochinja kuti newo niŵapojeke.”
41 Yesaya elaŵila vamene ivi chifukwa ewona ulemelelo wa Khilisitu, ndipo enena za yove.
42 Koma olo n’tetyo, penze ŵanthu ayakine amene emukhulupilila olosoti olamulila anyinji. Koma aliyevomekeje patuŵa, chifukwa enzeyopa kuti Afalisi angaŵafumye mmalo opemphelela.
43 Ove enzekonda ngako ulemelelo wa ŵanthu kupambana ulemelelo wa Mulungu.
44 Koma Yesu eŵilikija kuti: “Aliyense wamene onikhulupilila okhulupililalini newo neka, koma okhulupililasoti wamene enituma.
45 Aliyense wawona newo wawonasoti wamene enituma.
46 Nawela monga kungweleŵela m’chalo, kuti aliyense wokhulupilila newo osati apitilije kunkhala mu mfinzi.
47 Keno munthu wamvwa mawu ŵangu koma osaŵasunga, newo ningamuweluzelini, chifukwa niliyewele kuzaweluza chalo, koma kuzachipulumusha.
48 Aliyense woninyalanyaza komasoti wamene olondelalini mawu ŵangu, ali naye mmozi womuweluza. Mawu analaŵila newo niye akuti azamuweluze pa nsiku yosilijila.
49 Chifukwa nikaliye laŵilapo vongoganiza paneka, koma Atata enituma amene awo enipasa lamulo pa vanufunikila kuphunzisa na vanufunikila kulaŵila.
50 Ndipo nuziŵa kuti lamulo yake ni yoyavya ŵanthu kuzafwana moyo wosasila. Tetyo vanulaŵila, nuvilaŵila mokatijana na vechiniuja Atata.”
Malizu a m'nyansi
^ Olo kuti, “mmanda achikumbukilo.”
^ Olo kuti, “nizadonse.”
^ Olo kuti, “vechimvwa mu lipoti yasu.”
