Wilembewa na Yohani 13:1-38
13 Lomba Yesu eziŵilatu chikondwelelo cha Pasika chikaliyefwika kuti nthawe yake yofuma muli ichi chalo kuluta kwa Atata yakwana. Ndipo pakuti enzekonda ophunzila ŵake amene enze pano pa chalo, eŵakonda mpaka pamapeto a moyo wake.
2 Enze nkati mwa kulya chakulya cha nchingulo ndipo Mdyelekezi enze eika kale maganizo ofuna kupeleka Yesu mu ntima mwa Yudasi Sikaliyoti, mwana wa Simoni.
3 Yesu enzeziŵa kuti Atata epeleka vinthu vonse mmanja mwake komasoti kuti ewela kufumila kwa Mulungu komasoti kuti enzekuya kwa Mulungu.
4 Tetyo epanama pamene apo penzekulya chakulya cha nchingulo novula malaya ŵake akunja. Pavuli pake etola thaulo noimanga muluunda mwake.
5 Pechichita tetyo etila manzi mu dishi noyamba kusambika vipazi va ophunzila amene awo komasoti kuŵapukuta na yala thaulo yechimanga muluunda.
6 Pavuli pake efwika penze Simoni Petulo. Koma Petulo ekonsha Yesu kuti: “Ambuye, mwewo mufuna musambike vipazi vangu?”
7 Yesu eyankha kuti: “Vamene ivi vanuchita ungavimvwishelini palipano, koma pavuli pake uzamvwishe.”
8 Petulo enena kuti: “Shuwa, vikwanishikelini kuti musambike vipazi vangu.” Yesu emuyankha kuti: “Nikaleka kukusambika, paliye chako kuli newo.”
9 Simoni Petulo enena kuti: “Ambuye, osati munisambike vipazi veka, koma munisambikesoti manja na mutu kumo.”
10 Yesu emuuja kuti: “Wamene wasamba mmuŵili ofunika kusamba tyala vipazi veka, chifukwa muŵili wonse ni utuŵa. Ndipo mwewo nimwe atuŵa, koma osati monse.”
11 Yove enzeziŵa munthu wamene ekonza zakuti amupeleke. N’chifukwa chake enena kuti: “Sikuti monse nimwe atuŵa.”
12 Lomba pechisambika vipazi vawo novwalasoti malaya ŵake ŵala akunja, enkhalasoti pa thebo. Tetyo eŵakonsha kuti: “Kansi muziŵa chifukwa chanasambikila vipazi vanu?
13 Mwewo muniita kuti ‘Mphunzisi’ komasoti ‘Ambuye,’ nimwamene, chifukwa nine chendi Mphunzisi komasoti Ambuye.
14 Tetyo keno newo wamene nine Ambuye komasoti Mphunzisi, nasambika vipazi vanu, namwesoti mufunikila kusambikana vipazi.
15 Chifukwa nakupasani chisanzo kuti mwanachitila newo kuli mwewo, namwesoti mukochitasoti chimozi-mozi.
16 Shuwa nukuujani, kapolo opambanalini bwana wake, komasoti wotumiwa opambanalini wala wamutuma.
17 Keno vamene ivi muviziŵa, muzankhale okondwela mukovichita.
18 Nunenalini monse, nuziŵa ŵanasankha. Koma vamene ivi vachitika kuti lemba ikwanilishiwe yamene yunena kuti: ‘Munthu wamene enzekulya chakulya changu, waimya katende kake noniukila.’*
19 Kufumila lomba kuluta kusogolo, nikokuujilantuni vikaliyechitika, kuti vikazachitika muzakhulupilile kuti wala wemwenzeyembekezela ni newo.
20 Shuwa nukuujani, aliyense wamene walondela wanatuma newo, walondelasoti newo. Ndipo wamene walondela newo, walondelasoti enituma.”
21 Pechilaŵila vamene ivi, Yesu evutika ngako mu ntima, ndipo echitila umboni kuti: “Shuwa nukuujani, mmozi wa mwewo anipeleke.”
22 Ophunzila amene awo eyamba kuloleshana chifukwa enzeziŵalini kuti onena ŵani.
23 Mmozi wa ophunzila amene awo wamene Yesu enzemukonda enkhala pafupi na Yesu.*
24 Tetyo Simoni Petulo emunyang’anyishila mutu nomuuja kuti: “Tiuje kuti onena ŵani.”
25 Lomba wophunzila muyakine wamene uyo esamila panganga pa Yesu nomukonsha kuti: “Ambuye, munena ŵani?”
26 Yesu eyankha kuti: “Niwala wanikuti nipase nkate wanikuti nitoŵele. Tetyo pechitoŵela nkate wamene uyo, epasa Yudasi, mwana wa Simoni Sikaliyoti.
27 Yudasi pechilondela nkate wamene uyo, Satana eloŵa muli yove. Tetyo Yesu emuuja kuti: “Vawakonza kuti uchite, vichite mokulumija.”
28 Koma pa ŵanthu amene awo ŵenzenkhale nawo pa thebo, penzeve aliyense wamene enzeziŵa chifukwa chechimuujila vamene ivo.
29 Pakuti Yudasi enzesunga bokosi ya ndalama, ayakine enzeganiza kuti Yesu omuuja kuti, “Agule vinthu vonse venzefunikila pa chikondwelelo,” olo kuti apeleke kanthu kayakine kwa osauka.
30 Tetyo Yudasi pechilondela nkate wamene uyo, efuma nthawe yamene iyo ndipo wenze usiku.
31 Yudasi pechifuma, Yesu enena kuti: “Mwana wa munthu walemekezewa lomba, ndipo Mulungu walemekezewa kupitila muli yove.
32 Mulungu amulemekeze ndipo amulemekeze nthawe yamene ino.
33 Mwewo azishamwali ŵangu apa ntima,* ninkhale namwe kwa kanthawe katontho tyala. Muzanisakile-sakile, ndipo mokatijana na vala veniuja Ayuda kuti, ‘Kwanikuti nizalute muzakwanishelini kufwikako,’ lomba nuujasoti mwewo.
34 Nukupasani lamulo yanyowani kuti mukokondana. Molingana na mwanakukondelani newo, namwesoti mukokondana teti.
35 Onse azaziŵe kuti nimwe ophunzila ŵangu keno mukondana.”
36 Simoni Petulo emukonsha kuti: “Ambuye, mukuya kuni?” Yesu eyankha kuti: “Kwanikuya ungakwanishelini kunikonkhelela palipano, koma uzanikonkhe kusogolo.”
37 Petulo ekonshasoti kuti: “Ambuye ndaŵa yanji ningakukonkhelelenilini palipano? Nizapeleke moyo wangu chifukwa cha mwewo.”
38 Yesu eyankha kuti: “Kansi uzapeleke moyo wako chifukwa cha newo? Shuwa nukuuja wewo, kombwe akaliye lila unikane katatu.”
Malizu a m'nyansi
^ Olo kuti, “waniukila.”
^ Mu Chigiliki, “enkhala panganga pa Yesu.”
^ Mu Chigiliki, “Mwewo ŵana atontho-atontho.”