Wilembewa na Yohani 14:1-31
14 “Mitima yanu osati ivutike. Khulupililani Mulungu, khulupililanisoti newo.
2 M’ng’anda ya Atata ŵangu muli malo anyinji onkhalamo. Kuti muliye malo sembe nakuujani, chifukwa nikuya kuyakuwamyilani malo.
3 Lomba nikaluta kuyakuwamyilani malo amene awo, nizawelesoti kuzakutolani kuluta kwasu, kuti kwanikuti nikankhale newo namwesoti mukankhale kwamene uko.
4 Ndipo kwanikuya newo, njila yake muiziŵa.”
5 Thomase ekonsha kuti: “Ambuye, sewo tuziŵalini kwamukuya. Lomba njila yake tingaiziŵe tyani?”
6 Yesu emuuja kuti: “Newo nine njila, choonadi na moyo. Paliye ofwika kwa Atata osapitila muli newo.
7 Mwewo mwaŵanthu kuti muniziŵa, sembe mwaziŵasoti Atata ŵangu. Kufumila lomba muŵaziŵe ndipo mwaŵawona kale.”
8 Filipo emuuja kuti: “Ambuye, tiwonesheni Atata amene awo kuti tisimikijile.”
9 Yesu emuuja kuti: “Kansi wewo Filipo uniziŵalini mphela olo kuti mwewo mwaŵanthu nankhala namwe nthawe ikulu yonse yamene iyi? Wamene wawona newo wawonasoti Atata. Lomba Ndaŵa yanji wewo unena kuti, ‘Tiwonesheni Atata’?
10 Kansi ukhulupililalini kuti Atata na newo nise okatijana? Vinthu vanukuujani nulaŵilalini va mmaganizo mwangu, koma Atata amene ni okatijana na newo niye ochita ntchito zawo kupitila muli newo.
11 Khulupilila vananena kuti newo na Atata nise okatijana, keno yayi, ukhulupilile chifukwa tyala cha ntchito zamene izi.
12 Shuwa nukuujani, aliyense wokhulupilila newo, nayesoti azachite ntchito zanuchita newo, ndipo azachite ntchito zikulu kupambana zamene izi chifukwa newo nikuya kwa Atata.
13 Komasoti chilichonse chamukuti muzasenge mu zina yangu, newo nizachichite, kuti Atata alemekezewe kupitila muli Mwana wawo.
14 Keno mungasenge chilichonse mu zina yangu, newo nizachichite.
15 Keno munikonda, muzasunge malamulo ŵangu.
16 Newo nizasenge Atata ndipo azakupaseni muyakine woyavya* kuti azankhale namwe mpaka kale-kale.
17 Woyavya wamene uyo ni mzimu wa choonadi wamene chalo chingaulondelelini, chifukwa chuuwonalini olo kuuziŵa. Mwewo muuziŵa chifukwa unkhala muli mwewo ndipo uli muli mwewo.
18 Nikusiyenilini monga ni ŵana amasiye. Nizawele kuli mwewo.
19 Kwasala kanthawe katontho ndipo chalo chizaniwonelinisoti. Koma mwewo muzaniwone, chifukwa nili na moyo ndipo namwesoti muzankhale na moyo.
20 Pa nsiku yamene iyo muzaziŵe kuti newo nine wokatijana na Atata komasoti kuti mwewo na newo nise okatijana.
21 Aliyense wamene ali na malamulo ŵangu ndipo oŵakonkheja, niye onikonda. Komasoti wamene onikonda, Atata ŵangu azamukondesoti. Nanesoti nizamukonde ndipo nizaliwoneshele luweme kuli yove.”
22 Yudasi muyakine, osati Sikaliyoti, emukonsha kuti: “Ambuye, ndaŵa yanji mufuna kuliwoneshela luweme kuli sewo koma osati kuli ichi chalo?”
23 Yesu emuyankha kuti: “Keno munthu onikonda, azasunge mawu ŵangu ndipo Atata ŵangu azamukonde komasoti tizalute kuli ove na kuyankhala nawo pamozi.
24 Wamene onikondalini osungalini mawu ŵangu, ndipo mawu amene aŵa ŵamukumvwa ni ŵangulini koma ni ŵa Atata amene enituma.
25 Nakuujani vamene ivi panikali na mwewo.
26 Koma woyavya, wamene ni mzimu utuŵa wakuti azatumije Atata ŵangu mu zina yangu, azakuphunziseni komasoti kukukumbushani vinthu vonse venikuujani.
27 Nukusiyilani ntendele ndipo nikupaseni ntendele wangu. Nuupelekalini kuli mwewo monga ni mwachuupelekela chalo. Mitima yanu osati ivutike olo kuchita wowa.
28 Mwamvwa penenzekuujani kuti, ‘Nikuya ndipo nizawelesoti kuli mwewo.’ Keno munikonda, sembe mwakondwela kuti nikuya kwa Atata ŵangu, chifukwa Atata ni akulu kupambana newo.
29 Tetyo nakuujani vikaliyechitika, kuti vikachitika mukhulupilile.
30 Nilaŵilelini namwe vinyinji chifukwa wotonga wa chalo akuza ndipo aliye mphamvu pali newo.
31 Koma kuti chalo chiziŵe kuti nukonda Atata, nuchita vinthu mokatijana na vechinilamula Atata amene awo. Panamani, tiyeni tifumeko kuno.”
Malizu a m'nyansi
^ Olo kuti, “azakupaseni wotang’isha.”
