Wilembewa na Yohani 15:1-27
15 “Newo nine chimuti cha mpesa ngacho-ngacho ndipo Atata ŵangu ni mulimi.
2 Ove otenda msambo uliwonse muli newo wamene utwalalini vitwazi ndipo uliwonse wamene utwala vitwazi outuŵisha poutheulila kuti utwale vitwazi vinyinji.
3 Mwewo nimwe atuŵa kale chifukwa cha mawu ŵanakuujani.
4 Munkhale okatijana na newo ndipo nanesoti ninkhale okatijana na mwewo. Molingana na msambo wamene utwalalini vitwazi paweka, peka-peka keno ulilundikije mphela ku mpesa wamene uyo, namwesoti mungatwalelini vitwazi peka-peka keno mulilundikije kuli newo.
5 Newo nine chimuti cha mpesa, mwewo nimwe misambo yake. Aliyense wamene alilundikije kuli newo nanesoti nonkhala wolundikija kuli yove, otwala vitwazi vinyinji chifukwa mungakwanishelini kuchita chilichonse paliye newo.
6 Keno munthu opitilijalini kunkhala alilundikije kuli newo, oponyewa kunja monga ni misambo ndipo oyuma. Ŵanthu ounganija misambo yotetyo noiponya pamulilo ndipo ikupya.
7 Mukapitilija kunkhala okatijana na newo ndipo mawu ŵangu akankhala muli mwewo, mungakwanishe kusenga chilichonse chamufuna ndipo chizachitike kuli mwewo.
8 Atata olemekezeka mukapitilija kutwala vitwazi vinyinji komasoti keno muwonesha kuti nimwe ophunzila ŵangu.
9 Molingana na Atata amene onikonda nanesoti nukukondani. Tetyo pitilijani kuchita vinthu vamene vingachitishe kuti nikokukondani mphela.
10 Keno musunga malamulo ŵangu muzachitishe kuti nthawe zonse nikokukondani, molingana na newo wamene nusunga malamulo ŵa Atata nochitisha kuti nthawe zonse akonikonda.
11 Nakuujani vinthu vamene ivi kuti munkhale na chisagalalo chanili nacho newo komasoti kuti chisangalalo chanu chizule ngako.
12 Nakulamulani kuti mukokondana molingana na mwanukukondelani newo.
13 Paliye wamene ali na chikondi chikulu kupambana cha munthu wamene wapeleka moyo wake chifukwa cha azishamwali ŵake.
14 Keno muchita vanukulamulani munkhale azishamwali ŵangu.
15 Nukuitanilinisoti kuti akapolo chifukwa kapolo oziŵalini vakuchita abwana ŵake. Koma nakuitani kuti azishamwali chifukwa nakuziŵishani vinthu vonse vanamvwa kwa Atata ŵangu.
16 Ni mwewolini mwinisankha, koma newo nikusankhani kuti mupitilije kutwala vitwazi vinyinji, komasoti kuti vitwazi vanu vamene ivo osati visile, kuti chilichonse chamungasenge Atata mu zina yangu akupaseni.
17 Nukulamulani vinthu vamene ivi na cholinga chakuti mukokondana.
18 Keno chalo chuzondana namwe, mukokumbukila kuti chiyamba kuzondana na newo chikaliyezondana na mwewo.
19 Kuti mwenze mbali ya chalo, sembe chalo chakukondani monga mbali yake. Pakuti mulilini mbali ya chalo, koma newo nikusankhani kufumila m’chalo, pa chifukwa chamene ichi chalo chuzondana namwe.
20 Mukokumbukila mawu ŵala ŵenikuujani: Kapolo angankhalelini nkulu kupambana abwana ŵake. Keno etamanisha newo namwesoti azakutamanisheni. Keno asunga mawu ŵangu azasungesoti mawu ŵanu.
21 Koma azakuchitileni vinthu vonse vamene ivi chifukwa cha zina yangu, chifukwa omuziŵalini etuma newo.
22 Kuti niliyewele kuzalaŵila nawo, sembe aliye chimo. Koma lomba angakanelini chimo yawo.
23 Aliyense wamene ozondana na newo ozondanasoti na Atata ŵangu.
24 Kuti niliyechite ntchito pamenso pawo zakaliyechitapo ove, sembe aliye chimo. Koma lomba aniwona ndipo azondana na newo komasoti azondana na Atata ŵangu.
25 Vamene ivi vachitika kuti mawu amene elembewa mu Chilamulo akwanilishiwe. Mawu ŵake ni akuti: ‘Enizonda paliye chifukwa.’
26 Akazafwika woyavya wanikuti nizakutumijileni kufumila kwa Atata, wamene ni mzimu wa choonadi wofumila kwa Atata, wamene uyo azanichitile umboni,
27 ndipo namwesoti muzanichitile umboni, chifukwa mwankhala nane kufumila pachiyambi.”
