Wilembewa na Yohani 16:1-33
16 “Nakuujani vinthu vamene ivi kuti chikhulupililo chanu osati chisile.
2 Ŵanthu azakufumyeni mmalo opemphelela. Ndipo nthawe ikuza yamene aliyense akuti azakupayeni azaganize kuti wachita utumiki wopatulika kwa Mulungu.
3 Koma azachite vamene ivi chifukwa oniziŵalini komasoti oziŵalini Atata.
4 Koma olo n’tetyo, nakuujani vinthu vamene ivi kuti nthawe yakuti vichitike ikazakwana muzakumbukile kuti nikuujani.
Vinthu vamene ivi niliye kuujeni pachiyambi chifukwa nenze namwe pamozi.
5 Lomba nikuya kuli wamene enituma, koma paliye aliyense wa mwewo wamene onikonsha kuti, ‘Mukuya kuni?’
6 Koma chifukwa chakuti nakuujani vinthu vamene ivi, chisoni chazula mmitima yanu.
7 Kulaŵila chendi nikuya kuti mwewo mupindule. Chifukwa keno ningaleke kuluta niye kuti wala woyavya awelelini kuli mwewo. Koma nikaluta nikamutumije kuli mwewo.
8 Ndipo yove akazawela azapeleke umboni wosimikijilika muli ichi chalo wonena za chimo, za chilungamo komasoti za chiweluzo.
9 Poyamba azapeleke umboni wonena za chimo, chifukwa ove onikhulupililalini.
10 Pavuli pake azapeleke umboni wonena za chilungamo, chifukwa newo nikuya kwa Atata ndipo mwewo muzaniwonelinisoti.
11 Posilijila azapeleke umboni wonena za chiweluzo, chifukwa wolamulila wa chino chalo waweluziwa.
12 Nikali na vinthu vinyinji vakuti nikuujeni, koma pakali pano mungakwanishelini kuvimvwisha vamene ivo.
13 Koma woyavya wamene uyo akazawela, wamene ni mzimu wa choonadi, azakusogoleleni mu choonadi chonse. Chifukwa azalaŵilelini vongoganiza payeka, koma azalaŵile vawamvwa ndipo azalalikile kuli mwewo vinthu vamene vikuza.
14 Yove azanilemekeze chifukwa azalalikile kuli mwewo vinthu vawalondela kufumila kuli newo.
15 Vinthu vonse vali navo Atata ni vangu. Chifukwa chake nunena kuti woyavya wamene uyo azalalikile kuli mwewo vinthu vawalondela kufumila kuli newo.
16 Kwa kanthawe katontho muzaniwonelinisoti, ndipo kwa kanthawe katontho muzaniwone.”
17 Pechilaŵila vamene ivi, ayakine mwa ophunzila ŵake amene awo eyamba kukonshana kuti: “Kansi otanthauza chinji pakutiuja kuti, ‘Kwa kanthawe katontho muzaniwonelinisoti ndipo kwa kanthawe katontho muzaniwone,’ komasoti kuti, ‘chifukwa nikuya kwa Atata’?”
18 Ove enzenena kuti: “Kansi otanthauza chinji pakunena kuti, ‘kwa kanthawe katontho’? Tuziŵalini vakunena.”
19 Yesu eziŵa kuti ofuna kumukonsha, tetyo eŵakonsha kuti: “Kansi mukonshana vamene ivi chifukwa nanena kuti: ‘‘Kwa kanthawe katontho muzaniwonelini, komasoti kuti kwa kanthawe katontho muzaniwone’?
20 Shuwa nukuujani, muzaponeshe misozi nolila moŵilikija, koma chalo ichi chizasangalale. Muzamvwe chisoni koma chisoni chanu azachiyalushe chisangalalo.
21 Mwanakazi povyala otamana ngako chifukwa nthawe yake yakwana. Koma mwana akavyalika okumbukilalinisoti kuŵaŵa konse kwala chifukwa chokondwela kuti mwana wavyalika pa chalo.
22 Chimozi-mozisoti mwewo, pali pano muli na chisoni. Koma nizakuwonenisoti ndipo mitima yanu izakondwele. Paliyesoti akuti azachitishe kuti muleke kukondwela.
23 Pa nsiku yamene iyo muzanikonshelinisoti makonsho. Shuwa nukuujani, keno mungasenge chilichonse kwa Atata mu zina yangu azakupaseni.
24 Mpaka pano mukaliyesengako chilichonse mu zina yangu. Sengani ndipo muzalondele kuti chisangalalo chanu chizule ngako.
25 Nalaŵila vamene ivi kuli mwewo mmafanizo. Nthawe ikuza pamene nizalaŵilelinisoti na mwewo pokatishila ntchito mafanizo, koma nizakuujeni vokhuza Atata momvwika luweme.
26 Pa nsiku yamene iyo muzasenge kanthu kwa Atata mu zina yangu. Nutanthauzalini kuti nizakusengeleni yayi.
27 Atata amene awo okukondani chifukwa mwenikonda ndipo mwakhulupilila kuti newo niwela monga nthumi ya Mulungu.
28 Niwela muli ichi chalo monga nthumi yofumila kwa Atata. Lomba nufuma m’chalo ichi ndipo nikuya kwa Atata.”
29 Ophunzila ŵake amene awo enena kuti: “Ambuye, lomba tumvwisha vamunena chifukwa mukatishilalini ntchito mafanizo.
30 Taziŵa lomba kuti mwewo muziŵa vinthu vonse ndipo pofunikilalinisoti kuti munthu akukonsheni makonsho. Pa chifukwa chamene ichi tukhulupilila kuti mwefumila chendi kwa Mulungu.”
31 Yesu eŵayankha kuti: “Kansi lomba mukhulupilila?
32 Shuwa nukuujani, nthawe ikuza ndipo yafwika kale, pamene monse mumwajikane, aliyense kuluta ku ng’anda kwake ndipo munisiye neka. Koma ninkhalelini neka, chifukwa Atata ali nane.
33 Newo nakuujani vamene ivi kuti munkhale mu ntendele chifukwa cha newo. Mu chalo umu mukumane na mavuto akulu ngako, koma tang’ani ntima. Newo nachigonjesa chalo.”