Wilembewa na Yohani 17:1-26
17 Yesu pechilaŵila vinthu vamene ivi, elolesha kululu nonena kuti: “Atata, nthawe yakwana. Lemekezani mwana wanu, kuti mwana wanu akulemekezeni.
2 Mwewo mwapasa mwana wanu ulamulilo pa ŵanthu onse kuti onse ŵamwamupasa mwewo, aŵapase moyo wosasila.
3 Moyo wosasila azaufwane akophunzila na kuziŵa za mwewo, Mulungu yeka wamene ni wa chendi, komasoti za Yesu Khilisitu wemwituma mwewo.
4 Nakulemekezani pano pa chalo, chifukwa nasilija kukata ntchito yemwinipasa.
5 Lomba Atata, niloleni kuti ninkhale pambali panu ndipo munipase ulemelelo wenenze nawo pambali panu chalo chikaliyenkhalako.
6 Ŵanthu ŵemwitola m’chalo nonipasa, newo naŵaziŵisha zina yanu. Enze ŵanu, koma mwiŵapeleka kuli newo ndipo ove amvwila mawu ŵanu.
7 Lomba aziŵa kuti vonse vemwinipasa ni vofumila kuli mwewo,
8 chifukwa mawu ŵemwinipasa naŵapeleka kuli ove. Ove aŵalondela ndipo aziŵa chendi kuti newo niwela monga nthumi yanu ndipo akhulupilila kuti ni mwewo mwinituma.
9 Tetyo nuŵapemphelela. Nupemphelelalini chalo, koma nupemphelela ŵanthu ŵamwanipasa, chifukwa ni ŵanu.
10 Vinthu vonse vanili navo ni vanu ndipo vinthu vanu vonse ni vangu. Newo nalemekezeka pakati pa ŵanthu ŵamwanipasa.
11 Newo nipitilijelini kunkhala muli ichi chalo chifukwa nikuza kuli mwewo, koma ove amene aŵa akali muli ichi chalo. Atata Atuŵa, aloleleni chifukwa cha zina yanu yamwanipasa, kuti ankhale amozi* monga ni mwatilili sewo.
12 Penenze nawo pamozi, nenzeŵalolela chifukwa cha zina yanu yamwanipasa. Newo naŵateteza mwakuti paliye aliyense wa ove wamene wawonongeka kupatulapo mwana wachiwonongeko, kuti lemba ikwanilishiwe.
13 Koma lomba nikuza kuli mwewo, ndipo nulaŵila vamene ivi panili m’chalo kuti ove ankhale na chisangalalo chozula ngako monga ni chanili nacho newo.
14 Ove naŵapasa mawu ŵanu, koma chalo chuzondana nawo chifukwa alilini mbali ya chalo, molingana na newo wamene nililini mbali ya chalo.
15 Nusengalini kuti muŵafumye m’chalo, koma kuti muŵateteze kwa Satana.
16 Ove alilini mbali ya chalo, molingana na newo wamene nililinisoti mbali ya chalo.
17 Atuŵisheni pokatishila ntchito choonadi. Mawu ŵanu ni choonadi.
18 Mwewo mwitumija newo m’chalo. Molingana na vamene ivi, nanesoti naŵatumija m’chalo.
19 Ndipo newo nulituŵisha chifukwa cha ove, kuti nawosoti atuŵishiwe na choonadi.
20 Nupemphelelalini aŵa ŵeka, koma nupemphelelasoti amene okhulupilila newo pavuli pomvwishila vakuphunzisa ove.
21 Nuchita vamene ivi kuti onse amene aŵa ankhale amozi monga ni mwatilili okatijana mwewo na newo Atata, kuti nawosoti ankhale okatijana na sewo na cholinga chakuti chalo chikhulupilile kuti mwewo mwinituma chendi.
22 Naŵapasa ulemelelo wemwinipasa, kuti ove ankhale amozi monga ni mwatililisoti sewo kunkhala amozi.
23 Newo ninkhale wokatijana na ove, mwewo munkhale wokatijana na newo, kuti ove ankhale mu nkatijano ngawo-ngawo,* kuti chalo chiziŵe kuti mwewo mwinituma newo komasoti kuti muŵakonda monga ni mwamunikondela newo.
24 Atata, newo nufuna kuti aŵa ŵamwanipasa azankhale pamozi na newo kwanikuti nizankhale newo, kuti azawone ulemelelo wangu wamwanipasa mwewo, chifukwa mwinikonda mukaliyepanga chalo.
25 Atata Wolungama, kulaŵila chendi chalo chukuziŵanilini, koma newo nukuziŵani ndipo aŵa aziŵa kuti mwewo mwinituma.
26 Newo nachitisha kuti ove aziŵe zina yanu ndipo nipitilije kuŵaziŵisha zina yamene iyi kuti nawosoti akowonesha chikondi monga ni chemwiniwonesha mwewo, kuti nanesoti ninkhale wokatijana na ove.”