Wilembewa na Yohani 18:1-40
-
Yudasi epeleka Yesu (1-9)
-
Petulo ekatishila ntchito chibemba (10, 11)
-
Yesu eluta naye kwa Anasi (12-14)
-
Petulo ekana Yesu koyamba (15-18)
-
Yesu ewonekela pamenso pa Anasi (19-24)
-
Petulo ekana Yesu kachiŵili komasoti kachitatu (25-27)
-
Yesu ewonekela pamenso pa Pilato (28-40)
-
“Ufumu wangu ni wa umulini m’chalo” (36)
-
18 Pechisilija kulaŵila vinthu vamene ivi, Yesu efuma pamozi na ophunzila ŵake notauka chidikha cha Kidiloni kuluta kwenze munda. Yove na ophunzila ŵake amene awo eloŵa mmunda mwamene umo.
2 Yudasi wala emupeleka, enzeŵaziŵasoti malo amene awo chifukwa nthawe zinyinji Yesu enzekumana kwamene uko na ophunzila ŵake.
3 Tetyo Yudasi etola gulu ya masodja komasoti akamalonda ofumila kuli ansembe akulu-akulu na kwa Afalisi. Ove efwika kwamene uko alitakule malampi,* matochi na visulo va nkhondo.
4 Pakuti Yesu enzeziŵa vonse vikuti vimuchitikile, eŵavwendela noŵakonsha kuti: “Musakila ŵani?”
5 Ove emuyankha kuti: “Yesu Mnazaleti.” Yove enena kuti: “Ni newo.” Yudasi wala emupeleka, enzesoti pamene apo.
6 Koma pechiŵauja kuti: “Ni newo,” ove ejokela kuvuli nopona pansi.
7 Pavuli pake eŵakonshasoti kuti: “Musakila ŵani?” Ove eyankha kuti: “Yesu Mnazaleti.”
8 Yesu enena kuti: “Nakuujani kuti ni newo. Tetyo keno mufuna newo aŵa alekeni alute.”
9 Vamene ivi vichitika kuti mawu ŵechinena yove akwanilishiwe akuti: “Pa ŵanthu onse ŵemwinipasa niliye tayepo olo mmozi.”
10 Pavuli pake, Simoni Petulo, wamene enze na chibemba, echisolola notema nacho kapolo wa nkulu wa ansembe mpaka etendelatu kwatu yake ya ku kwanja ngayo. Kapolo wamene uyo zina yake enze Makasi.
11 Koma Yesu euja Petulo kuti: “Joshela chibemba chamene icho muchinecho. Kansi nufunikilalini kumwa va m’kapu yanipasa Atata?”
12 Pavuli pake ŵala masodja, nkulu wa masodja na akamalonda ŵa Ayuda ekata Yesu nomumanga.
13 Poyamba eluta naye kwa Anasi, chifukwa enze asivyala ŵake a Kayafa, wamene enze nkulu wa ansembe m’chaka chamene icho.
14 Kayafa wamene uyu ni wala elangiza Ayuda kuti venze voyavya kuli ove kuti munthu mmozi afwile ŵanthu onse.
15 Lomba Simoni Petulo, komasoti wophunzila muyakine enzekonkhelela Yesu. Wophunzila wamene uyo enzeziŵana na nkulu wa ansembe, tetyo eloŵa pamozi na Yesu mmalo a m’ng’anda ya nkulu wa ansembe.
16 Koma Petulo epanama kunja pamuliyango. Tetyo wophunzila wamene enzeziŵana na wala nkulu wa ansembe, eluta na kuyalaŵila na kamalonda wa pamuliyango nomuloŵesha Petulo.
17 Msimbi wantchito wamene enze kamalonda wa pamuliyango pamene apo ekonsha Petulo kuti: “Kansi namwesoti nimwelini mmozi wa ophunzila a munthu wamene uyu?” Yove enena kuti: “Yayi ni newolini.”
18 Lomba akapolo na akamalonda enzepaname pafupi na mulilo wa malasha wechikunjika, chifukwa kwenzezizila ndipo enzeyota mulilo wamene uyo. Nayesoti Petulo epanama nawo pamozi noyamba kuyota mulilo wamene uyo.
19 Lomba wansembe nkulu ekonsha Yesu za ophunzila ŵake komasoti venzephunzisa.
20 Yesu emuyankha kuti: “Nalaŵila patuŵa m’chalo ichi. Nthawe zonse nenzephunzisa m’malo opemphelela na m’kachisi, kwenzeungana Ayuda onse, ndipo niliye laŵile chilichonse kumbali.
21 Ndaŵa yanji mukonsha newo? Konshani amene echimvwa venenzeŵauja. Onani! Onse amene aŵa oziŵa veninena.”
22 Pechilaŵila vamene ivi, mmozi wa akamalonda wamene enzepaname pafupi na Yesu emuniyata mbama nonena kuti: “Ungamuyankhe teti wansembe nkulu?”
23 Yesu emuyankha kuti: “Keno nalaŵila chilichonse chophoniyeka, peleka umboni wa chinthu chamene icho chanaphoniya. Koma keno vamene ivi vanalaŵila ni vachendi, ndaŵa yanji waniniyata?”
24 Pavuli pake Anasi etumija Yesu kwa Kayafa nkulu wa ansembe ndipo enzemumange.
25 Pa nthawe yamene iyi Simoni Petulo enzepaname pamene apo ndipo enzeyota mulilo. Lomba ove emukonsha kuti: “Kansi nawesoti niwelini mmozi wa ophunzila ŵake?” Yove ekana nonena kuti: “Yayi ni newolini.”
26 Mmozi wa akapolo ŵa nkulu wa ansembe, wamenesoti enze pokwawo na munthu wala wechitenda kwatu Petulo enena kuti: “Nakuwona mwala mmunda wenze naye pamozi, nutala wenye payakine?”
27 Koma Petulo ekanasoti ndipo nthawe yamene iyo kombwe elila.
28 Lomba ove etola Yesu kufuma naye kwa Kayafa noluta naye ku ng’anda ya gavana. Mwamene umo mwenze mmawa ngako. Koma ove aliye loŵe m’ng’anda ya gavana wamene uyo poyopa kuipishiwa. Ove enzefuna kuti akakwanishe kulya Pasika.
29 Tetyo Pilato efuma noŵakonsha kuti: “Kansi mumupasa mulandu wanji munthu wamene uyu?”
30 Ove emuyankha kuti: “Munthu wamene uyu kuti ochitalini vinthu viipa* sembe tiliye wele naye kuli mwewo.”
31 Lomba Pilato eŵauja kuti: “Mutoleni mukamuweluze mweka mokatijana na chilamulo chanu.” Ayuda amene awo emuuja kuti: “Tiliye ulamulilo wopaya munthu aliyense.”
32 Vamene ivi vichitika kuti mawu ŵechilaŵila Yesu owonesha mwakuti azafwile, akwanilishiwe.
33 Tetyo Pilato eloŵasoti m’ng’anda ya gavana noita Yesu ndipo emukonsha kuti: “Kansi niwe Mfumu ya Ayuda?”
34 Yesu eyankha kuti: “Kansi mukonsha vamene ivi chifukwa chakuti mufuna chendi kuziŵa, olo payakine chifukwa chakuti ayakine akuujani vokhuza newo?”
35 Pilato eyankha kuti: “Kansi newo nine Muyuda? Ŵanthu antundu wakoletu komasoti ansembe akulu-akulu niye akupeleka kuli newo. Kansi wichita chinji?”
36 Yesu eyankha kuti: “Ufumu wangu ni wa munolini m’chalo. Kuti Ufumu wangu ni wa muno m’chalo, sembe atumiki ŵangu aniyata nkhondo kuti osati nipelekewe kuli Ayuda. Koma Ufumu wangu ni wofumilalini muno m’chalo.”
37 Pilato emukonsha kuti: “Chabwino, koma kansi niwe mfumu?” Yesu eyankha kuti: “Munena mweka kuti nine mfumu. Nivyalika komasoti niwela m’chalo kuti nizachitile umboni choonadi. Aliyense wamene ali kumbali ya choonadi omvwishila mawu ŵangu.”
38 Pilato emukonsha kuti: “Choonadi n’chinji?”
Pechingokonsha konsho yamene iyi efuma panja nolutasoti kwala kwenze Ayuda, ndipo eŵauja kuti: “Newo nufwanalini chophoniya chilichonse muli munthu wamene uyu.”
39 Pala mwewo mulisoti na mwambo wakuti nikokumasulilani munthu mmozi pa Pasika. Lomba kansi mufuna kuti nikumasulileni Mfumu ya Ayuda?”
40 Ŵanthu amene awo eŵilikijasoti kuti: “Wamene uyo yayi, koma Balaba!” Koma Balaba wamene uyu enze chigaŵenga.
Malizu a m'nyansi
^ Olo kuti, “malaiti ŵenzekatishila ntchito kale.”
^ Olo kuti, “sembe kuti ni chigaŵengalini.”
