Wilembewa na Yohani 19:1-42
19 Pavuli pake Pilato etola Yesu nomukwapula.
2 Ndipo masodja eŵila chisote chachifumu cha minga nomuvwalika ku mutu. Emuvwalikasoti malaya akunja asweta-asweta.
3 Lomba enzeluta kuli yove nonena kuti: “Muli tyani mwewo Mfumu ya Ayuda!” Komasoti enzemuniyata makhofi kumenso.
4 Pilato efumasoti panja noŵauja kuti: “Onani! Nimufumye pano panja pali mwewo kuti muziŵe kuti niliye mufwane na mulandu.”
5 Tetyo Yesu efuma panja alivwale chisote chachifumu chala chaminga na malaya akunja asweta-asweta. Lomba Pilato eŵauja kuti: “Onani! Mwanalume wala ni uyu!”
6 Koma ansembe akulu-akulu na akamalonda pechimuwona, eŵilikija kuti: “Apanyikiwe wamene uyo! Apanyikiwe wamene uyo!”* Pilato eŵauja kuti: “Mutoleni mukamupanyike mweka,* chifukwa newo niliye mufwane na mulandu uliwonse.”
7 Ayuda amene awo emuyankha kuti: “Sewo tili na chilamulo, ndipo mokatijana na chilamulo chamene icho yove ofunikila kufwa chifukwa oliyeja monga ni mwana wa Mulungu.”
8 Pilato pechimvwa vamene ivo vechilaŵila echita wowa ngako,
9 tetyo eloŵasoti m’ng’anda yala ya gavana nokonsha Yesu kuti: “Kansi wafumila kuni?” Koma Yesu aliye muyankhe.
10 Lomba Pilato emukonsha kuti: “Kansi ufunalini kulaŵila nane? Kansi uziŵalini kuti nili na mphamvu zokumasula komasoti kukupanyika?”*
11 Yesu emuyankha kuti: “Sembe muliye nkhale na mphamvu iliyonse pali newo kuti muliye pasiwe kufumila kululu. N’chifukwa chake munthu wamene wanipeleka kuli mwewo ali na chimo ikulu ngako.”
12 Chifukwa cha vamene ivi Pilato eyeja-yeja mphela kusakila-sakila njila yakuti amumasulile. Koma Ayuda amene awo eŵilikija kuti: “Mukamumasula munthu wamene uyu, niye kuti nimwelini muyake wa Kaisala. Munthu aliyense wamene oliyeja mfumu ni woshushana na Kaisala.”
13 Lomba Pilato pechimvwa mawu amene aŵa efumya Yesu panja, ndipo yove enkhala pampando wotongela milandu, pamalo amene enzeitiwa kuti Malo a Myala koma pa Chihebeli enzeitiwa kuti Gabʹba·tha.
14 Nsiku yamene iyi yenze Nsiku Yokonzekela Pasika ndipo nthawe yenze cha mma 12 koloko nzuŵa.* Lomba yove euja Ayuda amene awo kuti: “Onani! Mfumu yanu ni yamene iyi!”
15 Koma ove eŵilikija kuti: “Musilijane naye! Musilijane naye! Apanyikiwe wamene uyo!”* Pilato eŵakonsha kuti: “Kansi nipanyike mfumu yanu?” Ansembe akulu-akulu eyankha kuti: “Tiliye mfumu iyakine koma Kaisala.”
16 Pavuli pake emutwala kuli ove kuti akamupaye pomupanyika pa chimuti.
Tetyo Yesu enze mmanja mwawo.
17 Yove enyamula yeka chimuti chotamanilapo* nofuma kuluta ku malo amene enzeitiwa kuti Chibade koma mu Chihebeli enzeitiwa kuti Gologota.
18 Kwamene uko emupanyika pachimuti pamozi na analume ayakine aŵili, muyakine ku mbali iyi, muyakine ku mbali iyakinesoti Yesu pakati.
19 Pilato elembasoti zina ya udindo noiika pachimuti chamene icho chotamanilapo.* Elemba kuti: “Yesu Mnazaleti, Mfumu ya Ayuda.”
20 Ayuda anyinji eŵelenga zina yamene iyi ya udindo, chifukwa malo amene awo ŵechipanyikiwa Yesu enze pafupi na tauni ndipo eilemba mu Chihebeli, mu Chilatini na mu Chigiliki.
21 Koma ansembe akulu-akulu amene awo ŵa Ayuda euja Pilato kuti: “Osati mulembe kuti, ‘Mfumu ya Ayuda,’ koma mulembe kuti, ‘Yove enena kuti, ‘Nine Mfumu ya Ayuda.’”
22 Koma Pilato eŵayankha kuti: “Vanalemba, nalemba.”
23 Masodja amene awo pechimukhomelela Yesu pachimuti, etola malaya ŵake akunja noŵayaŵa mbali 4, kuti nsodja aliyense atole mbali imozi. Etolasoti malaya a nkati. Koma malaya a nkati amene awo enzeve nsono, esonewa kufumila palulu mpaka pansi.
24 Tetyo ove ekambilana kuti: “Malaya amene aŵa osati tiŵang’ambe koma tiyeni tichite madjiki kuti tiwone angatole malaya amene aŵa.” Vamene ivi vichitika kuti lemba ikwanilishiwe yamene yunena kuti: “Ove eyaŵana vovwala vangu, ndipo echita madjiki pa vovwala vangu.” Tetyo masodja amene awo echita chendi vamene ivo.
25 Koma pafupi na chimuti chotamanilapo* cha Yesu, penze paname amayi ŵake na nsaza wa amayi ŵake amene awo, Maliya nkazi wa Kulopa, komasoti Maliya waku Magadala.
26 Tetyo Yesu pechiwona amayi ŵake amene awo na wophunzila wala wenzekonda ali paname pafupi, euja amayi ŵake kuti: “Amama, kufumila lelo uyu ankhale mwana wanu.”
27 Pavuli pake euja wophunzila wamene uyo kuti: “Kufumila lelo, aŵa ankhale amayi ŵako.” Kufumila pa nthawe yamene iyo wophunzila wamene uyo eŵatola noluta nawo ku ng’anda kwake.
28 Pavuli pake Yesu pechiziŵa kuti vonse vachitika, kuti malemba akwanilishiwe enena kuti: “Nikumvwa njota.”
29 Pamalo pamene apo penze nongo yozula na vinyu wowawasha. Tetyo etola chinkhupule nochivwivwika mu vinyu wowawasha wamene uyo ndipo echiika kukamuti ka hisope* nochifwisha pakamwa pake.
30 Pechilondela vinyu wowawasha wamene uyo, Yesu enena kuti: “Nakwanilisha vofuna vanu!” ndipo ejolika nosilijika.
31 Pakuti yenze Nsiku Yokonzekela, Ayuda amene awo aliyefune kuti vitanda vinkhale mphela pavimiti votamanilapo pa nsiku ya Sondo, (chifukwa Sondo ya nsiku yamene iyi yenze ikulu), lomba ove esenga Pilato kuti aŵavomeje kutyola mendo a ŵanthu amene awo epanyikiwa noselusha vitanda vawo.
32 Tetyo masodja ewela notyola mendo a munthu woyamba komasoti a wala muyakine wechipanyikiwa naye pamozi.
33 Koma pechifwika penze Yesu efwana kuti wafwa kale tetyo aliyemutyole mendo.
34 Koma mmozi wa masodja amene awo emulasa na mkondo mmaŵambo ndipo nthawe yamene iyo pefuma milopa na manzi.
35 Munthu wamene ewona vamene ivo niye wapeleka umboni wamene uyu ndipo umboni wake wamene uyo ni wachendi. Yove oziŵa kuti onena vachendi kuti namwesoti mukhulupilile.
36 Ngako-ngako vamene ivi vichitika kuti lemba ikwanilishiwe yamene yunena kuti: “Azatyolelini* chifupa chake olo chimozi tyala.”
37 Komasoti lemba iyakine yunena kuti: “Ove azaloleshe kuli munthu wamene emulasa.”
38 Pavuli pa vinthu vamene ivi, Yosefe waku Alimateya wamene enze wophunzila wachisinsi wa Yesu chifukwa choyopa Ayuda, esenga Pilato kuti akachose thupi ya Yesu ndipo Pilato emuvomeja. Tetyo efwika nochosa thupi yamene iyo.
39 Nikodemo wamene ewela kuli yove usiku pala poyamba, ewelasoti ali takule mule woyavija na aloye, wopitilila makhedji 32.
40 Tetyo ove etola thupi ya Yesu noizeŵeja na nyula za malilo zonunkhila, mokatijana na mwambo wenzekonkheja Ayuda poika malilo.
41 Lomba kumalo kwamene uko kwechimupanyikila, kwenze munda mwamene mwenze manda* anyowani ndipo enze akaliye ikamo munthu kufumila pachiyambi.
42 Pakuti yenze Nsiku Yokonzekela Chikondwelelo cha Ayuda, ndipo manda amene awo enze pafupi, ove eika Yesu mwamene umo.
Malizu a m'nyansi
^ Olo kuti, “Apayiwe popanyikiwa pachimuti!”
^ Olo kuti, “Mutoleni mukamupaye mweka pomupanyika pachimuti.”
^ Olo kuti, “komasoti zolamula kuti akupaye pokupanyika pachimuti.”
^ Mu Chigiliki, “awazi ya 6 kuŵelenga kufumila mma 6 koloko mmawa.”
^ Olo kuti, “Apayiwe popanyikiwa pachimuti!”
^ Onani matanthauzo a mawu ayakine.
^ Onani matanthauzo a mawu ayakine.
^ Onani matanthauzo a mawu ayakine.
^ Onani matanthauzo a mawu ayakine.
^ Olo kuti, “Azafyayelini.”
^ Olo kuti, “manda achikumbukilo.”
