Wilembewa na Yohani 2:1-25
2 Pa nsiku yachitatu, ku Kana waku Galileya kwenze phwando ya ukwati ndipo amayi ŵake a Yesu enzesoti kwamene uko.
2 Yesu na ophunzila ŵake eitiwasoti ku phwando yamene iyo ya ukwati.
3 Vinyu pewisila, amayi ŵake a Yesu emuuja kuti: “Vinyu waŵasilila.”
4 Koma Yesu euja amayi ŵake amene awo kuti: “Lomba sewo vutikhuza tyani amama?* Nthawe yangu ikaliye kwana.”
5 Amayi ŵake amene awo euja enzetumikila kuti: “Muchite chilichonse changakuujeni.”
6 Pa malo pamene apo penze nongo zamyala zokwana 6, mokatijana na malamulo ŵa Ayuda a kulituŵisha. Nongo iliyonse yenze ya malita pafupi-fupi 44 mpaka 66.
7 Tetyo Yesu eŵauja kuti: “Zujani nongo izi na manzi.” Ove ezuja chendi mpaka pakamwa.
8 Pavuli pake eŵauja kuti: “Lomba tapankoni patontho mukapeleke kuli wololela phwando yamene iyi.” Ndipo ove eluta chendi kuyapeleka.
9 Wololela phwando wala elaula manzi amene awo ŵechiyalusha vinyu. Pakuti aliyeziŵe kwewifuma (olo kuti otumikila amene etapa manzi amene awo enzeziŵa), wololela phwando wamene uyo eita mkwati
10 nomuuja kuti: “Munthu aliyense ofumya vinyu uweme poyamba ndipo ŵanthu akakolwa, niye pakufumya usawama ngako. Koma wewo wasunga vinyu uweme mpaka nthawe ino.”
11 Yesu echita vamene ivi ku Kana waku Galileya monga chiyambi cha vizindikilo vake. Yove ewonesha ulemelelo wake ndipo ophunzila ŵake eyamba kumukhulupilila.
12 Vamene ivi pevichitika, Yesu, amayi ŵake, enekwake na ophunzila ŵake eluta ku Kapelenawo, koma aliyenkhaleko masiku anyinji.
13 Lomba Pasika wa Ayuda wenze wivwendela, tetyo Yesu enyamuka noluta ku Yelusalemu.
14 Kwamene uko efwana ogulisa ng’ombe, mbelele na nkhunda komasoti osintha ndalama alinkhale mmipando yawo m’kachisi.
15 Tetyo ekonza chinshamu cha vinthambo nopitikisha onse amene enze na mbelele komasoti ng’ombe mu kachisi mwamene umo. Ekhutula ndalama za ŵanthu amene enzesintha ndalama nogadabula mathebo ŵawo.
16 Lomba euja ogulisa nkhunda amene awo kuti: “Fumyani ivi muno! Mulekeletu kuyalusha ng’anda ya Atata ŵangu kunkhala ng’anda ya malonda!”*
17 Ophunzila ŵake ekumbukila vakunena Malemba kuti: “Kulipeleka kwangu pa ng’anda yanu kuzankhale monga ni mulilo wamene uyaka mu ntima mwangu.”
18 Koma Ayuda amene awo enena kuti: “Utiwoneshe chizindikilo chotyani chuwonesha kuti uli na ulamulilo wochitila vinthu vamene ivi?
19 Yesu eŵayankha kuti: “Wishani kachisi wamene uyu ndipo newo nizaumange mmasiku atatu.”
20 Lomba Ayuda amene awo enena kuti: “Kachisi wamene uyu wimangiwa kwa vyaka 46, lomba wewo ukuti uzaumange mmasiku atatu?”
21 Koma yove enzenena za kachisi wa muŵili wake.
22 Tetyo pechiuka kwa akufwa, ophunzila ŵake ekumbukila kuti enzenena vamene ivi ndipo ekhulupilila Malemba komasoti mawu ŵechinena Yesu.
23 Lomba penze mu Yelusalemu pa chikondwelelo cha Pasika, ŵanthu anyinji emukhulupilila* pechiwona vizindikilo venzechita.
24 Koma Yesu aliye ŵakhulupilile ngako chifukwa onse enzeŵaziŵa,
25 ndipo enzefunikilalini kuti muyakine achite muuja vokhuza munthu, chifukwa yove enzeziŵa vili mu ntima mwa munthu.
Malizu a m'nyansi
^ Amene aŵa ni mawu opita mmbali owonesha kuti munthu okana ndipo owoneshalini kuti eyankha amayi ŵake amene awo mwachipongwe.
^ Olo kuti, “maketi.”
^ Mu Chigiliki, “ekhulupilila zina yake.”