Wilembewa na Yohani 20:1-31
20 Nsiku yoyamba ya sondo yamene iyo, Maliya waku Magadala eluta kumanda kwamene uko* mmawa ngako, kukali mfinzi, ndipo ewona kuti mwala wafumyiwa kale pa manda amene awo.*
2 Tetyo eutuka kuluta kwa Simoni Petulo na kwa wophunzila muyakine, wala wenzekonda ngako Yesu. Yove eŵauja kuti: “Ambuye aŵafumya mwala mmanda,* ndipo tuziŵalini kwaŵaika.”
3 Tetyo Petulo na wophunzila wala muyakine enyamuka kuluta kumanda kwamene uko.
4 Onse aŵili eyambila pamozi kuutuka, koma wophunzila wala muyakine enzeutuka ngako kupambana Petulo ndipo enze woyambilila kuyafwika kumanda kwamene uko.
5 Pechiŵelama nosonjelela nkati mwamene umo, ewona nyula zili pansi, koma aliye loŵemo.
6 Pavuli pake Simoni Petulo wamene enzewela mvuli mwake efwikasoti, ndipo eloŵa mmanda mwamene umo. Mwamene umo ewona zala nyula zili pansi.
7 Nyula yechimuzeŵejela kumutu iliye ikiwe pamozi na nyula zala ziyakine, koma eipeta-peta noiyika payeka.
8 Pavuli pake wala wophunzila wamene eyambilila kufwika kwala kumanda eloŵasoti nkati mwamene umo, ndipo ewona nokhulupilila vechiujiwa.
9 Ove enze akaliye mvwisha vakunena malemba kuti Yesu ofunikila kuuka kwa akufwa.
10 Tetyo ophunzila amene awo ejokela ku ng’anda kwawo.
11 Koma Maliya esala alipaname panja pafupi na manda amene awo, uku olila. Penzelila tetyo, eŵelama kuti awone mmanda mwamene umo
12 ndipo ewona angelo aŵili amene enzevwale vituŵa alinkhale penze thupi ya Yesu. Mmozi enkhala pansi kumutu ndipo muyakine enkhala kumendo.
13 Ove emukonsha kuti: “Mayi ndaŵa yanji mulila?” Mwanakazi wamene uyo eŵayankha kuti: Atola Ambuye wangu, ndipo nuziŵalini kwaŵaika.”
14 Pechilaŵila vamene ivi, echunguluka ndipo ewona Yesu alipaname pamene apo, koma aliyeziŵe kuti ni Yesu.
15 Yesu ekonsha mwanakazi wamene uyo kuti: “Wewo Mayi, ndaŵa yanji ulila? Kansi usakila ŵani?” Poganiza kuti niye enzesamalila munda wamene uyo, yove emuyankha kuti: “Mwewo akulu keno ni mwewo mwamufumya, pulizi niujeni kwamwamuika ndipo newo nikamutole.”
16 Yesu emuuja kuti: “Maliya!” Yove echunguluka nomuuja m’Chihebeli kuti: “Lab boʹni!” (kutanthauza kuti “Mphunzisi!”)
17 Yesu emuuja kuti: “Osati unikangamile chifukwa nthawe yakuti nilute kwa Atata ikaliyekwana. Koma nkhoya kuli enekwangu ndipo ukaŵauje kuti, “Newo nikuya kwa Atata ŵangu na Atata ŵanu, kuli Mulungu wangu na Mulungu wanu.’”
18 Maliya waku Magadala eluta kuli ophunzila amene awo ndipo eŵauja kuti: “Newo naŵawona Ambuye!” Ndipo eŵauja vala vechimuuja Yesu.
19 Nchingulo mwa nsiku yamene iyo, yamene yenze nsiku yoyamba ya sondo, ophunzila amene awo eungana pamozi. M’ng’anda yamene iyo yechiungana ekhoma viseko chifukwa enzeyopa Ayuda. Koma Yesu eloŵa nopanama pakati pawo ndipo eŵauja kuti: “Ntendele unkhale namwe.”
20 Pechilaŵila vamene ivi, eŵawonesha manja ŵake na mmaŵambo mwake. Tetyo ophunzila amene awo ekondwela pechiwona Ambuye amene awo.
21 Yesu eŵaujasoti kuti: “Ntendele unkhale namwe. Molingana na mwechinitumila Atata, nanesoti nukutumani.”
22 Pechilaŵila vamene ivi, efuzilila umphuye pali ove noŵauja kuti: “Londelani mzimu utuŵa.
23 Mukakhululukila munthu wamene wachita chimo, niye kuti Mulungu wamukhululukila kale. Koma mukaleka khululukila munthu wamene wachita chimo, niye kuti Mulungu aliye mukhululukile.”
24 Koma Thomase wamene enzeziŵikasoti kuti Didimo, mmozi wa ophunzila 12 ŵala enzelini nawo pamozi Yesu pechiwela.
25 Tetyo ophunzila ayakine amene awo emuuja kuti: “Sewo taŵawona Ambuye!” Koma yove eŵayankha kuti: “Nikaleka wona vilonda va misomali mmanja mwawo noika chikumo changu mu vilonda vamene ivo va misomali komasoti kuika kwanja yangu mmaŵambo mwawo, shuwa newo nikhulupililelini.”
26 Papita masiku 8, ophunzila ŵake amene awo enzesoti m’ng’anda ndipo Thomase enze nawo pamozi. Yesu eloŵa olo kuti viseko venze vokhoma ndipo epanama pakati pawo nonena kuti: “Ntendele unkhale namwe.”
27 Pavuli pake euja Thomase kuti: “Ika chikumo chako apa komasoti lolesha mmanja mwangu umu. Leta kwanja yako ukate mmaŵambo mwangu umu ndipo uleke kukaikila* koma unikhulupilile.”
28 Thomase eyankha kuti: “Mbuye wangu komasoti Mulungu wangu!”
29 Yesu emukonsha kuti: “Kansi wakhulupilila chifukwa chakuti waniwona? Osangalala ni ŵala amene okhulupilila olo kuti akaliye wona.”
30 Kulaŵila chendi, Yesu echitasoti vizindikilo viyakine vinyinji pamenso pa ophunzila amene awo, vamene viliye lembewe mu mpukutu uno.
31 Koma vamene ivi valembewa kuti mukhulupilile kuti Yesu ni Khilisitu, Mwana wa Mulungu, komasoti chifukwa chakuti mwakhulupilila, munkhale na moyo mu zina yake.
Malizu a m'nyansi
^ Olo kuti, “kumanda achikumbukilo kwamene uko.”
^ Olo kuti, “pa manda achikumbukilo amene awo.”
^ Olo kuti, “mmanda achikumbukilo.”
^ Mu Chigiliki, “kunkhala wosakhulupilila.”
