Wilembewa na Yohani 21:1-25
21 Vamene ivi pevisila, Yesu ewonekelasoti kuli ophunzila amene awo kunyanja ya Tibeliyo.* Kuwonekela kwake kwamene uku kwenze teti.
2 Simoni Petulo, Thomase (wamene enzeitiwa kuti Didimo), Natanayeli waku Kana waku Galileya, ŵana a Zebedayo na ophunzila ŵake ayakine aŵili onse amene aŵa enze pamozi.
3 Lomba Simoni Petulo enena kuti: “Newo nikuya kuyapaya nsomba.” Amene awosoti ayakine enena kuti: “Nasesoti tilute nawe.” Ove eluta chendi nokwela bote, koma nkati mwa usiku wamene uyo aliye paye kalikonse.
4 Koma pekwenzekucha, Yesu epanama mmbali mwa nyanja, koma ophunzila amene awo aliyeziŵe kuti enze Yesu.
5 Pavuli pake Yesu eŵakonsha kuti: “Ŵanamwe, kansi muli na chakulya* chilichonse?” Ove emuyankha kuti, “Yayi!”
6 Yove eŵauja kuti: “Teyani kombe kumbali ya ku kwanja ngayo kwa bote yamene iyo ndipo mufwane kanthu kayakine.” Tetyo eteya chendi kombe wamene uyo, koma aliye kwanishesoti kuukweŵela m’bote chifukwa cha kupaka kwa nsomba.
7 Pevichitika tetyo, wophunzila wala wenzekonda ngako Yesu euja Petulo kuti: “Ni Ambuye!” Simoni Petulo pechimvwa kuti ni Ambuye, evwala malaya ŵake akunja, chifukwa enze aliye vwale bwino-bwino, ndipo elumphila m’nyanja.
8 Koma ophunzila ayakine amene awo ewela m’bote itontho okweŵa kombe wozula na nsomba, chifukwa enzelini patali ngako na kuntunthu. Enze pansenga wa mamita pafupi-fupi 90 ŵeka.
9 Pechifwika kuntunthu ewona mulilo wamalasha ndipo penze nsomba komasoti ewona nkate.
10 Yesu eŵauja kuti: “Letani kuno ziyakine mwa nsomba zamene izo zamwapaya.”
11 Tetyo Simoni Petulo eloŵa m’bote mwamene umo nokweŵela kuntunthu kombe wozula na nsomba zikulu-zikulu zokwana 153. Koma olo kuti mwenze nsomba zinyinji tetyo, kombe wamene uyo uliye kezuke.
12 Yesu eŵauja kuti: “ Welani muzalye chakulya cha mmawa.” Paliye olo mmozi wa ophunzila amene awo wamene etang’a ntima nomukonsha kuti: “Nimwe ŵani? Chifukwa enzeziŵa kuti ni Ambuye.
13 Yesu eluta kuyatola nkate noŵayaŵila, ndipo echitasoti chimozi-mozi na nsomba.
14 Kamene aka kenze kachitatu kuti Yesu awonekele kuli ophunzila ŵake amene awo pavuli pakuti waushiwa kwa akufwa.
15 Pechisilija kulya chakulya cha mmawa chamene icho, Yesu ekonsha Simoni Petulo kuti: “Simoni mwana wa Yohani, kansi unikonda newo kupambana ivi?” Yove emuyankha kuti: “Eye Ambuye, mwewosoti muziŵa kuti nukukondani ngako.” Yove emuuja kuti: “Lyesha ŵana ŵangu ambelele.”
16 Pavuli pake emukonsha kachiŵili kuti: “Simoni mwana wa Yohani, kansi unikonda newo?” Yove emuyankha kuti: “Eye Ambuye, mwewosoti muziŵa kuti nukukondani ngako.” Pamene apo enena kuti: “Ŵetela ŵana ŵangu Ambelele.”
17 Emukonshasoti kachitatu kuti: “Simoni mwana wa Yohani, kansi newo unikonda ngako?” Petulo echimvwa chisoni powona kuti omukonsha kachitatu kuti: “Kansi newo unikonda ngako?” Tetyo yove enena kuti: “Ambuye mwewo muziŵa vinthu vonse. Muziŵasoti luweme kuti nukukondani ngako.” Yesu emuuja kuti: “Lyesha ŵana ŵangu ambelele.
18 Shuwa nukuuja wewo, pewenze mulumbwana, wenzevwala weka noluta kwaufuna. Koma ukazakalamba uzatambulule manja ŵako mwakuti munthu muyakine azakuvwalike ndipo azakutakule noluta nawe kwausafuna.”
19 Elaŵila vamene ivi pofuna kuwonesha ntundu wa imfwa yakuti azalemekeze nayo Mulungu. Pechilaŵila vamene ivi emuuja kuti: “Pitilija kunikonkhelela.”
20 Petulo echunguluka nowona wala wophunzila wenzekonda Yesu oŵakonkhelela. Wophunzila wamene uyu ni wala wamene esamila panganga pa Yesu pachakulya chala cha nchingulo nomukonsha kuti: “Ambuye niŵani wamene ofuna kukupelekani?”
21 Tetyo pechimuwona, Petulo ekonsha Yesu kuti: “Ambuye, lomba uyu azachite chinji?”
22 Yesu enena kuti: “Keno newo ningafune kuti ankhale mphela na moyo mpaka nizawele, kansi wewo vukukhuza tyani? Wewo pitilija tyala kunikonkhelela.”
23 Tetyo vimvwika pakati pa akwasu kuti wophunzila wamene uyu azamwalilelini. Koma olo n’tetyo Yesu aliye muuje kuti azamwalilelini, koma enena kuti: “Keno newo ningafune kuti ankhale mphela na moyo mpaka nizawele, kansi wewo vukukhuza tyani?”
24 Wophunzila wamene uyu niye ochitila umboni vinthu vamene ivi. Yove niyesoti elemba vinthu vamene ivi ndipo tuziŵa kuti umboni wakupeleka ni wachendi.
25 Pali vinthu viyakinesoti vinyinji vechichita Yesu. Sembe kuti vonse vilembewa momvwika luweme, nuganiza kuti mipukutu yamene iyo ilembewa sembe iliye kwane muno m’chalo.
Malizu a m'nyansi
^ M’Baibolo, “nyanja ya Tibeliyo” yuitiwasoti na mazina akuti, nyanja ya Kineleti, nyanja ya Genesaleti komasoti nyanja ya Galileya.
^ Olo kuti, “kansi muli na nsomba iliyonse.”