Wilembewa na Yohani 3:1-36
3 Penze Mfalisi muyakine zina yake Nikodemo, wolamulila wa Ayuda.
2 Yove eluta kwa Yesu usiku nomuuja kuti: “Labi, tuziŵa kuti mwewo nimwe mphunzisi wofumila kwa Mulungu, chifukwa tuziŵa kuti paliye munthu wamene angakwanishe kuchita vizindikilo vamuchita mwewo keno Mulungu alilini naye.”
3 Poyankha Yesu emuuja kuti: “Shuwa nukuuja, munthu angakwanishelini kuwona Ufumu wa Mulungu keno angaleke vyalikasoti.”*
4 Nikodemo ekonsha kuti: “Munthu angavyalike tyani ali nkulu kale? Kansi angakwanishe kuloŵa mmala mwa amayi ŵake novyalikasoti?”
5 Yesu eyankha kuti: “Shuwa nukuuja, munthu angakwanishelini kuloŵa mu Ufumu wa Mulungu keno angaleke vyalika mwa manzi na mzimu.
6 Chamene chavyalika kufumila mmuŵili ni cha nyama, ndipo chamene chavyalika kufumila mu mzimu ni chauzimu.
7 Osadabwa chifukwa chakuti nakuuja kuti: Mwewo mwaŵanthu mufunika kuvyalikasoti.
8 Mphepo yukunthila kwayufuna ndipo munthu akumvwa kuunga kwake koma oziŵalini kwayufumila na kwayukuya. N’chimozi-mozi na aliyense wamene wavyalika kufumila mu mzimu.”
9 Poyankha Nikodemo enena kuti: “Vamene ivi vingakwanishike tyani?”
10 Yesu emukonsha kuti: “Kansi pala niwelini mphunzisi wa Aisilaeli, lomba vukwanishika tyani kuti osati uziŵe vinthu vamene ivi?
11 Shuwa nukuuja, vatuziŵa sewo tuvilaŵila, ndipo vatawona tuvichitila umboni. Koma mwewo mulondelalini umboni watupeleka.
12 Keno nakuujani vinthu va pano pa chalo koma mwewo mukhulupililalini mphela, lomba mungakhulupilile tyani keno ningakuujeni vinthu vakululu?
13 Ndipo paliye munthu wamene ekwela kululu koma Mwana wa munthu yeka, wamene eseluka kufumila kululu kwamene uko.
14 Molingana na Mose wamene eimya njoka mmululu m’chipululu, nayesoti Mwana wa munthu ofunika kukwejewa mmululu
15 kuti aliyense wamene omukhulupilila ankhale na moyo wosasila.
16 Chifukwa Mulungu ekonda ngako chalo mwakuti etwala Mwana wake wovyalika yeka, kuti aliyense wamene omukhulupilila osati awonongewe koma ankhale na moyo wosasila.
17 Mulungu aliye tumije Mwana wake m’chalo kuti mwana wamene uyo azachiweluze, koma kuti chalo chamene icho chipulumushiwe kupitila muli yove.
18 Aliyense wamene omukhulupilila ofunikalini kuweluziwa. Koma aliyense wamene omukhulupililalini waweluziwa kale, chifukwa aliye khulupilile zina ya Mwana wovyalika yeka wa Mulungu.
19 Kungweleŵela kwafwika m’chalo koma mmalo mokonda kungweleŵela ŵanthu okonda mfinzi pakuti ntchito zawo ni ziipa, n’chifukwa chake azaweluziwe.
20 Munthu wamene ochita vinthu viipa ozondana na kungweleŵela, ndipo ofwikalini pongweleŵela kuti ntchito zake osati ziwonekele.
21 Koma aliyense wamene ochita vinthu viweme owela pongweleŵela, kuti ntchito zake ziwonekele kuti ezichita mokatijana na chifunilo cha Mulungu.”
22 Vamene ivi pevisila Yesu na ophunzila ŵake eluta mudela yaku munzi ya ku Yudeya. Yove enkhala nawo kwamene uko kwa nthawe itontho ndipo enzebatiza ŵanthu.
23 Koma nayesoti Yohani enzebatiza ŵanthu ku Ainoni pafupi na Salimu, chifukwa kwamene uko kwenze manzi anyinji ndipo ŵanthu enzeluta kuyabatiziwa.
24 Pa nthawe yamene iyi Yohani enze akaliye ikiwa mu djeli.
25 Lomba ophunzila a Yohani eyamba kukangana na Muyuda muyakine pa nkhani yokhuza kunkhala ntuŵa pamenso pa Mulungu.
26 Pavuli pake eluta kwa Yohani nomuuja kuti: “Labi, munthu wala wemwenze naye kusilya kwa Yolodano, wamene mwenzemuchitila umboni, nayesoti obatiza ndipo ŵanthu onse oluta kuli yove.”
27 Poyankha Yohani enena kuti: “Munthu angalondelelini kanthu kalikonse peka-peka akapasiwa kufumila kululu.
28 Mwewosoti nimwe mboni pa veninena kuti: ‘Newo ninelini Khilisitu, koma nitumijiwa monga womuwamyila njila.’
29 Munthu wamene ali na mkwatibwi ni mkwati. Koma muyake wa mkwati, akapanama nomvwishila vakulaŵila, okondwela ngako chifukwa cha mawu a mkwati wamene uyo. Tetyo newo nukondwela ngako.
30 Yove ofunika akoyangijilika, koma newo nikochepa-chepa.”
31 Wofumila kululu opambana ayakine onse. Wofumila pano pa chalo ni wa pa chalo ndipo olaŵila vinthu va pano pa chalo. Koma wofumila kululu ni wopambana ayakine onse.
32 Yove ochitila umboni vinthu vamene waviwona novimvwa, koma paliye munthu wamene okhulupilila umboni wake.
33 Wamene wakhulupilila umboni wake wamene uyo wasimikijila* kuti Mulungu onena vachendi.
34 Wamene etumiwa na Mulungu olaŵila mawu a Mulungu, chifukwa yove akafuna kupeleka mzimu opelekalini mokakamijika.*
35 Atata okonda Mwana ndipo epeleka vinthu vonse mmanja mwake.
36 Wamene okhulupilila Mwana wamene uyo azalondele moyo wosasila. Asamvwila Mwana wamene uyo azalondelelini moyo wamene uyu, koma ukali wa Mulungu uzankhale mphela pali yove.
Malizu a m'nyansi
^ Mabaibolo ayakine onena kuti, “keno aliye vyalike kufumila kululu.”
^ Olo kuti, “waika chidindo chake pa umboni wamene uyo.”
^ Olo kuti, “akafuna kupeleka mzimu ochitalini kupima pa sikelo.”
