Wilembewa na Yohani 5:1-47
5 Pavuli pa vamene ivi, kwenze chikondwelelo cha Ayuda ndipo Yesu enyamuka kuluta ku Yelusalemu.
2 Ku Yelusalemu pa Gedi ya Mbelele pali damu yamene m’Chihebeli yuitiwa kuti Betizata. Mmbali mwa damu yamene iyo muli malukolo 5 amene ali na vipilala.
3 Mwamene umu mwenzeyona ŵanthu anyinji olwala, asalola, olemala komasoti ozizila vizo.
4 ——
5 Penzesoti mwanalume muyakine wamene enkhala olwala kwa vyaka 38.
6 Pechiwona munthu wamene uyu ali yone, komasoti pechiziŵa kuti wankhala olwala kwa nthawe ikulu, Yesu emukonsha kuti: “Kansi ufuna kupola?”
7 Munthu wolwala wamene uyo emuyankha kuti: “Mwewo akulu, paliye munthu akuti anivwivwike mu damu yamene iyi manzi akaŵinduka, ndipo nikafuna kuloŵamo muyakine onipitilila nakuya loŵa.”
8 Yesu emuuja kuti: “Nyamuka, takula machila ŵako amene aŵa noyamba kuyenda.”
9 Nthawe yamene iyo munthu wala epola ndipo etakula machila ŵake amene awo noyamba kuyenda.
Yamene iyi yenze nsiku ya Sondo.
10 Tetyo Ayuda eyamba kuuja munthu wala wamene epojekewa kuti: “Lelo ni nsiku ya Sondo ni vosaloleka kuti utakule machila amene aŵa.”
11 Yove eŵayankha kuti: “Munthu wamene uyo wanipojeka waniuja kuti, ‘Takula machila ŵako amene aŵa noyamba kuyenda.’”
12 Ove emukonsha kuti: “Niŵani wakuuja kuti, ‘Takula machila ŵako noyamba kuyenda’?”
13 Koma munthu wamene uyo aliyeziŵe kuti enze ŵani, chifukwa Yesu enze eloŵa mu chigulu cha ŵanthu amene enze pamene apo.
14 Pavuli pake Yesu ekumana na wala munthu m’kachisi nomuuja kuti: “Ona wapola lomba. Osati ukachimwesoti kuti chinthu chiyakine choyofya kupambana matenda osati chizakuchitikile.”
15 Munthu wala efuma nakuyauja ŵala Ayuda kuti Yesu niye wanipojeka.
16 Ayuda amene awo pechimvwa vamene ivi eyamba kutamanisha Yesu, chifukwa enzechita vinthu vamene ivi pa nsiku ya Sondo.
17 Koma yove eŵauja kuti: “Atata ŵangu akalikata mphela ntchito mpaka pano, nanesoti nikalikata mphela ntchito.”
18 Pa chifukwa chamene ichi Ayuda amene awo eyamba kusakila njila yangamupaile, chifukwa kuyangijila pa kufwaya lamulo ya nsiku ya Sondo, enzenenasoti kuti Mulungu ni Atata ŵake, noliyeja kuti olingana na Mulungu.
19 Tetyo poyankha Yesu eŵauja kuti: “Shuwa nukuujani Mwana angachitelini chilichonse chawaganiza payeka, koma tyala chawawona Atata ŵake ochita. Chifukwa vilivonse vakuchita Atata amene awo, Mwana ochitasoti vamene ivo kulingana na mwakuchitila Atata amene awo.
20 Atata amene awo okonda Mwana wawo ndipo omuwonesha vonse vakuchita ove. Ove azamuwoneshe ntchito zikulu kupambana zamene izi kuti mwewo mudabwe.
21 Molingana na Atata amene ousha akufwa noŵapasa moyo, nayesoti Mwana opeleka moyo kuli ŵanthu amene wafuna kuti aŵapase.
22 Atata oweluzalini munthu aliyense, koma apeleka udindo wonse woweluza kuli Mwana,
23 kuti onse alemekeze Mwana monga ni mwakulemekezela Atata. Aliyense wamene olemekezalini Mwana olemekezalinisoti Atata amene emutuma.
24 Shuwa nukuujani, aliyense wamene wamvwa mawu ŵangu nokhulupilila Mulungu wamene enituma, azafwane moyo wosasila ndipo azaweluziwelini koma wafuma ku imfwa noluta ku moyo.
25 Shuwa nukuujani, nthawe ikuza ndipo ni yamene ino, pamene akufwa azamvwe mawu a Mwana wa Mulungu ndipo amene omvwila azankhale na moyo.
26 Molingana na Atata amene ali na mphamvu zopeleka moyo, alolasoti Mwana kuti ankhale na mphamvu zopeleka moyo.
27 Amupasasoti mphamvu zoweluza, chifukwa yove ni Mwana wa munthu.
28 Osati mudabwe navo vamene ivi chifukwa nthawe ikuza yamene onse ali mmanda achikumbukilo azamvwe mawu ŵake
29 ndipo azafume. Amene enzechita viweme azauke kuti alondele moyo ndipo amene enzechita viipa azauke kuti aweluziwe.
30 Newo ningachitelini chilichonse chanaganiza paneka. Nuweluza mokatijana na vanamvwa ndipo chiweluzo changu ni cha chilungamo, chifukwa nuchitalini vofuna vangu, koma va wala enituma.
31 Keno nulichitila neka umboni niye kuti umboni wangu wamene uyo ni wachendilini.
32 Alipo muyakine wamene ochitila umboni wokhuza newo ndipo nuziŵa kuti umboni wamene uyo wakunichitila ni wachendi.
33 Mwewo mwetumija ŵanthu kwa Yohani ndipo yove wachitila umboni choonadi.
34 Koma newo nuvomekejalini umboni wofumila kwa munthu, koma nunena vamene ivi kuti mwewo mupulumuke.
35 Munthu wamene uyu enze laiti yuyaka komasoti yungweleŵela ndipo kwa nthawe itontho mwewo mwenze ofunishisha kukondwela ngako chifukwa cha kungweleŵela kwamene uko.
36 Koma newo nili na umboni upambana wa Yohani, chifukwa ntchito zechinipasa Atata ŵangu kuti nizikwanilishe, ntchito zamene izi zanuchita zuchitila umboni kuti Atata enituma chendi.
37 Komasoti Atata amene enituma anichitila umboni. Mwewo mukaliye mvwapo mawu ŵake nthawe iyakine iliyonse olo kuwona muŵili wake.
38 Mawu ŵakesoti aliyenkhazikike muli mwewo, chifukwa muliye khulupilile wechitumija Atata amene awo.
39 Mwewo mufufuza m’Malemba chifukwa muzafwane moyo wosasila kupitila m’Malemba amene awo ndipo Malemba amene awo niyesoti ochitila umboni za newo.
40 Koma mufunalini kuwela kuli newo kuti muzafwane moyo.
41 Nufunalini ulemelelo wofumila kuli ŵanthu,
42 koma nuziŵa chendi luweme kuti mmitima yanu muliye chikondi cha Mulungu.
43 Newo nawela mu zina ya Atata ŵangu koma muliye nilondele. Koma kuti muyakine wenze wawela mu zina yake, sembe mwamulondela wamene uyo.
44 Mungakhulupilile tyani pamene mulondela ulemelelo kufumila kuli ŵanthu ayanu, koma osayeja-yeja kuti mufwane ulemelelo wofumila kwa Mulungu yeka?
45 Osati muganize kuti newo nikakuyopejeleni kwa Atata. Alipo wamene okuyopejelani, wamene ni Mose wamudalila.
46 Ndipo kuti mwenze mwikhulupilila Mose, sembe mwenikhulupililasoti, chifukwa yove elemba vokhuza newo.
47 Koma keno mukhulupililalini vamene ivo vechilemba, lomba mungakhulupilile tyani mawu ŵangu?”
