Wilembewa na Yohani 6:1-71
6 Pavuli pa vamene ivi, Yesu etauka ku silya iyakine ya nyanja ya Galileya,* olo kuti nyanja ya Tibeliyo.
2 Ndipo gulu ikulu ya ŵanthu yenzemukonkhelela chifukwa yenzewona vizindikilo venzechita yove popojeka ŵanthu olwala.
3 Tetyo Yesu ekwela mulupili ndipo enkhala pansi pamozi na ophunzila ŵake.
4 Lomba chikondwelelo cha Ayuda cha Pasika chenze chivwendela.
5 Yesu pechilolesha nowona gulu ikulu ya ŵanthu yuwela kuli yove, ekonsha Filipo kuti: “Kansi mitanda ya nkate yolyesha ŵanthu onse amene aŵa tingeigula kuni?”
6 Koma yove elaŵila vamene ivi pofuna tyala kumuyesa chifukwa enzeziŵa kale venzefuna kuchita.
7 Filipo emuyankha kuti: “Mitanda ya nkate ya ndalama zokwana madinali 200 ingakwanelini olo kuti tichite aliyense apasiweko tyala patontho.”
8 Mmozi wa ophunzila ŵake, Andileya nkwake wa Simoni Petulo enena kuti:
9 “Pano pali kamulumbwana kamene kali na mitanda 5 ya nkate wa balele na tunsomba tuŵili. Koma kansi vamene ivi vingakwanile chigulu chonse chamene ichi cha ŵanthu?”
10 Yesu enena kuti: “Ŵaujeni ŵanthu amene aŵa kuti ankhale pansi.” Pamalo pamene apo penze uzu unyinji. Tetyo analume pafupi-fupi 5.000 enkhala chendi pansi.
11 Lomba Yesu etola mitanda yala ya nkate. Pechipemphela eiyaŵa kuli ŵanthu onse ŵala enzenkhale pansi. Echitasoti chimozi-mozi na twala tunsomba ndipo ŵanthu amene awo echilya monga ni mwechifunila aliyense.
12 Ŵanthu onse amene awo pechikuta, yove euja ophunzila ŵake kuti: “Unganijani vonse vasala, kuti osati pawonongeke chilichonse.”
13 Tetyo etola-tola vonse ndipo vizula vitundu 12 kufumila pa mitanda yala 5, ya nkate wa balele yamene onse echilya noikangila.
14 Ŵanthu amene awo pechiwona chizindikilo chamene icho chechichita, eyamba kunena kuti: “Mosakaikila wamene uyu ni mneneli wala wechinena kuti azawele pa chalo.”
15 Pavuli pake Yesu pechiziŵa kuti ŵanthu ofuna awele kuzamukata kuti amupase ufumu, efumapo nolutasoti kulupili yeka-yeka.
16 Chakunchingulo ngako ophunzila ŵake eluta ku nyanja.
17 Ove ekwela bote noyamba kutauka nyanja kuloŵela ku Kapelenawo. Pa nthawe yamene iyi kwenze mfinzi ndipo Yesu enze akaliyewela mphela kuli ove.
18 Komasoti nyanja yenze iyamba kuchita mafunde chifukwa kwenze kuntha mphepo yamphamvu.
19 Koma pechichapa makilomita pafupi-fupi 5 olo 6,* ewona Yesu oyenda panyanja kuvwendela kuli bote yamene iyo ndipo ove echita wowa.
20 Koma Yesu eŵauja kuti: “Ninewo, osati muchite wowa!”
21 Pavuli pake emuvomeja kuti akwele bote yawo, ndipo nthawe yamene iyo bote yala ichiyafwika ku ntunthu kwenzekuya.
22 Nsiku yokonkhapo ŵanthu amene enze kusilya iyakine ya nyanja yamene iyo ewona kuti paliye bote iliyonse. Pamalo pamene apo penze bote imozi itontho, koma Yesu aliyekwele bote yamene iyo pamozi na ophunzila ŵake chifukwa ophunzila ŵake amene awo eluta paŵeka.
23 Koma mabote ofumila ku Tibeliyo efwika pafupi na pamalo pechilyela ŵanthu amene awo nkate wala Ambuye pechipemphela.
24 Tetyo gulu ya ŵanthu yamene iyo peiwona kuti Yesu komasoti ophunzila ŵake kuliye, ikwela mabote ŵawo noluta ku Kapelenawo kuyasakila-sakila Yesu.
25 Pechimufwana kusilya kwa nyanja yamene iyo emukonsha kuti: “Labi, mwafwika nthawe yanji kuno?”
26 Yesu eŵayankha kuti: “Shuwa nukuujani, sikuti munisakila-sakila chifukwa chakuti mwiwona vizindikilo yayi, koma chifukwa chakuti mwichilya mikate nokuta.
27 Osati mukokata ntchito kuti mufwane tyala chakulya chamene chuwonongeka, koma kuti mufwane chakulya chunkhalisha, chamene chuleta moyo wosasila. Mwana wa munthu azakupaseni chakulya chamene ichi chifukwa Atata, Mulungu yeka, waika chidindo chake pali yove chomuvomekeja.”
28 Tetyo ŵanthu amene awo emukonsha kuti: “Kansi tingachite tyani kuti tikochita vakufuna Mulungu?”
29 Yesu eŵayankha kuti: “Vakufuna Mulungu kuti mukochita ni vakuti mukowonesha chikhulupililo muli wechituma yove.”
30 Lomba ove emukonsha kuti: “Kansi mwewo muchite chizindikilo chotyani kuti sewo tichiwone nokukhulupililani? Muchite ntchito yotyani?
31 Makolo ŵasu echilya mana m’chipululu, monga ni mwakunenela Malemba kuti: ‘Eŵapasa chakulya chofumila kululu kuti alye.’”
32 Pavuli pake Yesu enena kuti: “Shuwa nukuujani, Mose aliye kupaseni chakulya chofumila kululu, koma Atata ŵangu okupasani chakulya ngacho-ngacho chofumila kululu.
33 Chifukwa chakulya chawapeleka Mulungu ni yove wamene wawela kufumila kululu nopeleka moyo m’chalo.”
34 Tetyo ove emuuja kuti: “Ambuye, mukotipasa chakulya chamene ichi nthawe zonse.”
35 Lomba Yesu eŵauja kuti: “Newo nine chakulya chupasa moyo.* Aliyense wowela kuli newo azamvwelini njala olo patontho, ndipo wokhulupilila muli newo azamvwelini njota.
36 Koma pala nakuujani kuti, olo kuti mwaniwona, mukhulupililalini mphela.
37 Aliyense wati azanipase Atata azawele kuli newo, ndipo akuti azawele kuli newo nizamupitikishelini.
38 Chifukwa niwela kufumila kululu kuzachita vofuna va wala enituma, osati vofuna vangu.
39 Chifunilo cha wala enituma ni chakuti, osati nitaye aliyense pa onse awanipasa, koma kuti nizaŵaushe pa nsiku yosilijila.
40 Vakufuna Atata ŵangu ni vakuti aliyense wovomekeja Mwana komasoti kumukhulupilila ankhale na moyo wosasila, ndipo newo nizamuushe pa nsiku yosilijila.”
41 Pechichita tetyo, Ayuda amene awo eyamba kung’ung’uzika chifukwa yove enena kuti: “Newo nine chakulya chofumila kululu.”
42 Ove eyamba kunena kuti: “Kansi uyu ni Yesulini mwana wa Yosefe, wamene atata ŵake na amayi ŵake tuŵaziŵa? Lomba ndaŵa yanji apa onena kuti, ‘Nifumila kululu’?”
43 Poyankha Yesu enena kuti: “Osang’ung’uzika mwewo.
44 Paliye munthu angawele kuli newo peka-peka keno Atata amene enituma akamuleta ndipo newo nizamuushe pa nsiku yosilijila.
45 Vilembewa m’Mabuku ŵa Aneneli kuti: ‘Onse azaphunzisiwe na Yehova.’ Aliyense wamene wamvwa kwa Atata ndipo waphunzila owela kuli newo.
46 Paliye munthu ewonapo Atata kupatulapo tyala yove wamene efumila kwa Mulungu, wamene uyu eŵawona Atata.
47 Shuwa nukuujani, aliyense wokhulupilila azafwane moyo wosasila.
48 Newo nine chakulya chupasa moyo.
49 Makolo ŵanu echilya mana m’chipululu koma emwalila mphela.
50 Ichi ni chakulya chofumila kululu, chakuti aliyense alyeko kuti osati amwalile.
51 Newo nine chakulya cha moyo chofumila kululu. Keno muyakine angalye chakulya chamene ichi azankhale na moyo wosasila. Ndipo chakulya chati nizapeleke kuti chalo chifwane moyo ni nyomfu wangu uyu.”
52 Pavuli pake Ayuda amene awo eyamba kushushana ŵeka-ŵeka kuti: “Kansi munthu wamene uyu angakwanishe tyani kutipasa nyomfu wake kuti tilye?”
53 Tetyo Yesu eŵauja kuti: “Shuwa nukuujani, mukaleka kulya nyomfu wa Mwana wa munthu komasoti kumwa milopa yake, muzafwanelini moyo.*
54 Aliyense wamene akulya nyomfu wangu na kumwa milopa yangu azafwane moyo wosasila ndipo nizamuushe pa nsiku yosilijila.
55 Chifukwa nyomfu wangu ni chakulya ngacho-ngacho ndipo milopa yangu ni vakumwa ngavo-ngavo.
56 Aliyense wamene akulya nyomfu wangu na kumwa milopa yangu, yove na newo tunkhala okatijana.
57 Atata a moyo enituma newo ndipo newo nili na moyo chifukwa cha Atata. Molingana na vamene ivi, wamene akulya nyomfu wangu azankhale na moyo chifukwa cha newo.
58 Chamene ichi ni chakulya chamene chifumila kululu. Ni chosiyana na chakulya chechilya makolo ŵanu koma nomwalila mphela. Aliyense walya chakulya chamene ichi azankhale na moyo wosasila.”
59 Elaŵila vinthu vamene ivi penzephunzisa mmalo opemphelela* ku Kapelenawo.
60 Pechimvwa vamene ivi, anyinji mwa ophunzila ŵake enena kuti: “Mawu amene aŵa ni osokoneza. Ni ŵani angamvwishile vamene ivi?”
61 Koma Yesu pechiziŵa kuti ophunzila ŵake ong’ung’uzika chifukwa cha vamene ivo vechilaŵila, eŵakonsha kuti: “Kansi mawu amene aŵa mwakhumudwa nawo?
62 Lomba vizankhale tyani mukazawona Mwana wa munthu okwela kuluta kwenze poyamba?
63 Mzimu niye upasa moyo koma nyomfu uliye ntchito iliyonse. Mawu amene aŵa ŵanakuujani ni mzimu komasoti ni moyo.
64 Koma pali ayakine a mwewo amene okhulupililalini.” Kufumila pachiyambi, Yesu enzeziŵa amene enzemukhulupililalini komasoti wamene akuti azamupeleke.
65 Yove epitilija kunena kuti: “N’chifukwa chake nikuujani kuti paliye munthu angawele kuli newo peka-peka Atata akamulola.”
66 Chifukwa cha vamene ivi, ophunzila ŵake anyinji emusiya nojokela ku vinthu vechisiya ndipo enzeyendanayelini soti.
67 Lomba Yesu ekonsha ophunzila ŵake 12 ŵala kuti: “Kansi namwesoti mufuna kuluta?”
68 Simoni Petulo eyankha kuti: “Ambuye, tingalutesoti kwa ŵani? Mwewo niye muli na mawu oyavya munthu kuti azafwane moyo wosasila.
69 Sewo takhulupilila ndipo taziŵa kuti mwewo nimwe Ntuŵa wechitumija Mulungu.”
70 Yesu eŵauja kuti: “Newo nikusankhani mwewo 12, n’tetyolini? Koma lomba mmozi wa mwewo ni wolaŵilila ayake viipa.”*
71 Ngako-ngako enzenena za Yudasi mwana wa Simoni Sikaliyoti, chifukwa wamene uyu niye echizamupeleka, olo kuti enze mmozi wa ophunzila 12 ŵala.
Malizu a m'nyansi
^ M’Baibolo, “nyanja ya Galileya” yutomolewasoti na mazina akuti, nyanja ya Kineleti komasoti nyanja ya Genesalete.
^ Mu Chigiliki, “Masitadiya pafupi-fupi 25 olo 30.”
^ Mu Chigiliki, ”nkate wa moyo.”
^ Mu Chigiliki, “muliye moyo mwa mwewo mweka.”
^ Mabaibolo ayakine onena kuti, “enzephunzisa pamalo wenzechitila misonkhano.”
^ Olo kuti, “ni mdyelekezi.”
