Wilembewa na Yohani 7:1-52
7 Vamene ivi pevisila, Yesu epitilija kukata ntchito yake* mu Galileya. Yove aliyefune kuchita vamene ivi mu Yudeya chifukwa Ayuda enzefunishisha kumupaya.
2 Koma Chikondwelelo cha Misasa cha Ayuda chenze chivwendela.
3 Lomba enekwake emuuja kuti: “Mulute ku Yudeya kuti nawosoti ophunzila ŵanu akawone vamuchita.
4 Chifukwa paliye munthu wamene ochita vinthu mwachisinsi pakufuna kuziŵika kuli ŵanthu. Keno mwewo muchita vinthu vamene ivi muliwoneshele patuŵa muli ichi chalo.”
5 Enekwake amene awo enzemukhulupililalini.
6 Yesu eŵauja kuti: “Nthawe yangu ikaliyefwika mphela, koma kuli mwewo nthawe iliyonse yunkhala iweme.
7 Chalo chiliye chifukwa chakuti chingazondane na mwewo, koma chuzondana na newo chifukwa nuchitila umboni kuti chuchita ntchito ziipa.
8 Mwewo nyamukani mulute kuchikondwelelo kwamene uko, newo nilutekolini pakalipano, chifukwa nthawe yangu ikaliyekwana.”
9 Pechiŵauja vamene ivi, yove esala ku Galileya.
10 Koma enekwake amene awo pechinyamuka kuluta ku chikondwelelo kwamene uko, nayesoti enyamuka. Aliyelute mowonekela koma mojeŵa.
11 Lomba Ayuda eyamba kumusakila-sakila ku chikondwelelo kwamene uko. Ove enzenena kuti: “Kansi munthu wamene wala ali kuni?”
12 Ndipo ŵanthu enzelaŵila vinthu vinyinji vokhuza yove mu gulu yonse yamene iyo. Ayakine enzenena kuti: “Wamene wala ni munthu muweme.” Koma ayakine enzenena kuti: “Yayi ni munthulini muweme wamene wala. Yove oluŵilisha ŵanthu anyinji.”
13 Koma paliye enzelaŵila patuŵa vokhuza yove chifukwa enzeyopa Ayuda.
14 Chikondwelelo chamene icho pechifwika pachimake, Yesu eloŵa m’kachisi ndipo eyamba kuphunzisa.
15 Ayuda amene awo edabwa nokonsha kuti: “Kansi munthu wamene uyu eŵaziŵa* tyani Malemba amene aŵa pakuti aliyeluteko ku sikulu?”*
16 Yesu eŵayankha kuti: “Vanuphunzisa newo ni vangulini, koma ni va wala enituma.
17 Keno munthu ofuna kuchita vakufuna Mulungu, azaziŵe kuti vanuphunzisa vufumila kwa Mulungu, olo keno vanulaŵila vufumila mmaganizo mwangu.
18 Wolaŵila vam’maganizo mwake olifunila yeka ulemelelo. Koma wofunila ulemelelo yove wamene emutuma, wamene uyu ni wachendi ndipo muli yove muliye chosalungama.
19 Mose ekupasani Chilamulo, n’tetyolini? Koma lomba paliye olo mmozi wa mwewo wamene omvwila Chilamulo chamene icho. Lomba ndaŵa yanji mufuna kunipaya?”
20 Gulu yamene iyo ya ŵanthu iyankha kuti: “Uli na chiŵanda wewo. Ni ŵani ofuna kukupaya?”
21 Poyankha Yesu eŵauja kuti: “Nangochita tyala chinthu chimozi ndipo monse mudabwa.
22 Pa chifukwa chamene ichi Mose ekupasani mdulidwe. Mdulidwe wamene uyo ni wofumilalini kuli Mose yayi, koma ni wofumila kuli makolo akale, ndipo muchita mdulidwe pa nsiku ya sondo.
23 Keno munthu ochitiwa mdulidwe pa nsiku ya sondo pofuna kuti osati afwaye Chilamulo cha Mose, kansi mukalipa ngako chifukwa chakuti nipojeka munthu pa nsiku ya sondo?
24 Lekani kuweluza powona tyala mawonekedwe akunja, koma mukoweluza na chiweluzo cholungama.”
25 Lomba ŵanthu ayakine onkhala mu Yelusalemu eyamba kunena kuti: “Kansi munthu wala wakufuna kupaya ni wamene uyulini?
26 Koma onani a uyu olaŵila patuŵa ndipo omuujalini chilichonse. Kansi olamulila amene aŵa asimikijila lomba kuti yove ni Khilisitu?
27 Koma sewo tuziŵa kwawafumila munthu wamene uyu. Koma lomba Khilisitu wamene uyo akazawela, paliye akuti azaziŵe kwawafumila.”
28 Lomba penzephunzisa m’kachisi mwamene umo Yesu eŵilikija kuti: “Mwewo muniziŵa komasoti muziŵa kwanafumila. Newo niliye wele mwakufuna kwangu koma enituma alipo chendi ndipo mwewo mumuziŵalini.
29 Newo numuziŵa, chifukwa nine nthumi yake. Yove niye enituma.”
30 Tetyo ove eyamba kusakila njila yangamupaile, koma paliye emukata chifukwa nthawe yake yenze ikaliye kwana.
31 Koma olo n’tetyo ŵanthu anyinji mu gulu yamene iyo emukhulupilila ndipo enzenena kuti: “Kansi Khilisitu akazawela, azachite vizindikilo vinyinji kupambana vawachita munthu wamene uyu?”
32 Afalisi echimvwa gulu ya ŵanthu yamene iyo peyenze ŵeleŵeshana vamene ivo vokhuza yove ndipo ansembe akulu-akulu komasoti Afalisi etuma akamalonda kuti akamukate.*
33 Pavuli pake Yesu enena kuti: “Ninkhale namwe mphela kwa kanthawe katontho nikaliyeluta kuli wamene enituma.
34 Muzanisakile-sakile koma muzanifwanelini, ndipo kwanikuti nizalute mwewo muzakwanishelini kufwikako.”
35 Tetyo Ayuda amene awo eyamba kukonshana kuti: “Kansi munthu wamene uyu ofuna alute kuni, kwamene sewo tingamufwanelini? Payakine ofuna alute kuli Ayuda amene emwajikana pakati pa Agiliki na kuyaphunzisa Agiliki amene awo?
36 Kansi otanthauza chinji pakulaŵila kuti, ‘Muzanisakile-sakile koma muzanifwanelini ndipo kwanikuti nizalute mwewo muzakwanishelini kufwikako’?”
37 Pa nsiku yosilijila yamene ni nsiku ikulu ya chikondwelelo chamene icho, Yesu epanama noŵilikija kuti: “Keno muyakine akumvwa njota, awele kuli newo azamwe manzi.
38 Mokatijana na vayunena lemba, aliyense wokhulupilila newo, ‘Nkati mwake ngamo-ngamo muzafume mimana ya manzi a moyo.’”
39 Pamene apa enzenena za mzimu wenze esala patontho kulondela onse amene emukhulupilila. Pa nthawe yamene iyi ŵanthu enze akaliye londela mzimu chifukwa Yesu enze akaliye londela ulemelelo wake.
40 Ayakine mu gulu yamene iyo amene echimvwa mawu amene aŵa eyamba kunena kuti: “Shuwa wamene uyu ni Mneneli.”
41 Ayakine enzenena kuti: “Khilisitu wala ni wamene uyu.” Koma ayakine enzenena kuti: “Kansi Khilisitu angafumile mu Galileya?
42 Kansi pala lemba yunenalini kuti Khilisitu azafumile muli ŵana a Davite komasoti ku Betelehemu, munzi wenzenkhala Davite?”
43 Tetyo gulu ya ŵanthu yamene iyo iyaŵanika pa nkhani yokhuza yove.
44 Ayakine a ove enzefuna kumukata,* koma paliye olo mmozi wamene emukumya.
45 Pavuli pake akamalonda ŵala ejokela kuli ansembe akulu-akulu na Afalisi ndipo ove eŵakonsha kuti: “Ndaŵa yanji muliye wele naye?”
46 Akamalonda amene awo eyankha kuti: “Paliye munthu wamene elaŵilapo monga ni yove kufumila kale yonse.”
47 Lomba Afalisi amene awo enena kuti: “Kansi namwesoti mwaluŵilishiwa?
48 Paliye olo mmozi mwa olamulila olo Afalisi wamene omukhulupilila, alipo payakine?
49 Koma gulu yonse ya ŵanthu amene aŵa asaziŵa Chilamulo ni yotembelelewa.”
50 Nikodemo, wamene kuvuli enze eluta kwa Yesu, komasoti enze mmozi wa Afalisi, eŵauja kuti:
51 “Chilamulo chasu chuweluzalini munthu akaliye fotokoza maganizo ŵake poyamba noziŵa vakuchita, kansi chuchita tetyo?”
52 Poyankha ove emuuja kuti: “Kansi wewosoti niwe wofumila ku Galileya ayi? Fufuza ndipo ufwanelini pamene ponena kuti mu Galileya muzafume mneneli.”*
Malizu a m'nyansi
^ Olo kuti, “epitilija kuyenda-yenda.”
^ Mu Chigiliki, “Volembewa vamene ivi eviziŵa.”
^ Yamene iyi ni sikulu ya Alabi.
^ Olo kuti, “akamumange.”
^ Olo kuti, “kumumanga.”
^ Mipukutu iyakine yakale komasoti yodalilika ifumya vesi 53 na vesi 11
