Wilembewa na Yohani 8:12-59
8 12 Pavuli pake Yesu elaŵila nawosoti kuti: “Newo nine kungweleŵela kwa chalo. Aliyense wonikonkhelela azayendelini mu mfinzi, koma azankhale na kungweleŵela kwa moyo.”
13 Tetyo Afalisi euja Yesu kuti: “Wewo ulichitila weka umboni koma umboni wako wamene uyo ni wachendilini yayi.”
14 Poyankha Yesu enena kuti: “Olo kuti nulichitila neka umboni, umboni wangu ni wachendi, chifukwa nuziŵa kwenifuma komasoti kwanikuya. Koma mwewo muziŵalini kwenifuma komasoti kwanikuya.
15 Mwewo muweluza munthu powona tyala mwakuwonekela.* Newo nuweluzalini munthu aliyense.
16 Koma nikafuna kuweluza, chiweluzo changu chunkhala chachilungamo, chifukwa nuweluzalini neka koma newo pamozi na Atata amene enituma tuweluzila pamozi.
17 Komasoti mu Chilamulo chanu chamene ichi elembamo kuti: ‘Umboni wa ŵanthu aŵili ni wachendi.’
18 Newo paneka nulichitila umboni ndipo Atata amene enituma onichitilasoti umboni.”
19 Lomba ove emukonsha kuti: “Atata ŵako ali kuni?” Yesu eyankha kuti: “Mwewo muniziŵalini komasoti muŵaziŵalini Atata ŵangu. Kuti newo muniziŵa sembe mwaziŵasoti Atata ŵangu.”
20 Yesu elaŵila mawu amene aŵa ali mmalo osungilamo vopeleka penzephunzisa m’kachisi. Koma paliye emukata, chifukwa nthawe yake yenze ikaliye kwana mphela.
21 Tetyo yove eŵaujasoti kuti: “Newo nufumapo ndipo muzanisakile-sakile, koma muzafwe mukali ochimwa. Kwanikuya newo mwewo mungakwanishelini kulutako.”
22 Lomba Ayuda amene awo eyamba kunena kuti: “Kansi ofuna kulipaya? Lomba ndaŵa yanji onena kuti, ‘Kwanikuya newo mwewo mungakwanishelini kulutako?’”
23 Yove epitilija kuŵauja kuti: “Mwewo nimwe ofumila pano pansi koma newo nine wofumila kululu. Mwewo nimwe wofumila muli chino chalo koma newo ninelini wofumila muli chino chalo.
24 N’chifukwa chake nakuujani kuti: Mwewo muzafwe mukali ochimwa. Chifukwa keno mukhulupililalini kuti wala wemwenzeyembekezela ni newo, muzafwe mukali ochimwa.”
25 Tetyo ove eyamba kunena kuti: “Kansi niwe ŵani?” Yesu eyankha kuti: “Nulivutishilanji kulaŵila na mwewo?
26 Nili na vinyinji vakuti nilaŵile vokhuza mwewo nopeleka chiweluzo. Ndipo wamene enituma onena vachendi, mwakuti venichimvwa kuli yove niye vanulaŵila muli chino chalo.”
27 Ove aliye ziŵe kuti enzelaŵila nawo vokhuza Atata.
28 Pavuli pake Yesu enena kuti: “Mukazamukweja Mwana wa munthu pamene apo muzaziŵe kuti wala wemwenzeyembekezela ni newo, komasoti kuti nuchitalini chilichonse mongoganiza tyala neka. Koma vanulaŵila vunkhala vokatijana ndendende na vechiniphunzisa Atata.
29 Ndipo wamene uyo enituma ali na newo. Yove aliye nisiye neka chifukwa nuchita vinthu vamene vumukondwelesha nthawe zonse.”
30 Penzelaŵila vamene ivi, ŵanthu anyinji eyamba kumukhulupilila.
31 Lomba Yesu epitilija kuuja Ayuda amene awo emukhulupilila kuti: “Mukapitilija kusunga mawu ŵangu, niye kuti nimwe chendi ophunzila ŵangu.
32 Muzaziŵe choonadi ndipo choonadi chamene icho chizakumasuleni.”
33 Ove emuyankha kuti: “Sewo nise ŵana ŵa Abulahamu ndipo tikaliyenkhalapo akapolo a munthu. Lomba wewo unena tyani kuti, ‘Muzamasuliwe’?”
34 Yesu eŵayankha kuti: “Shuwa nukuujani, aliyense wamene ochita chimo ni kapolo wa chimo.
35 Komasoti kapolo onkhalalini m’ng’anda ya abwana ŵake mpaka kale-kale koma mwana niye onkhalamo mpaka kale-kale.
36 Tetyo keno Mwana wakumasulani, muzankhale chendi omasuka.
37 Nuziŵa kuti nimwe mbadwa za Abulahamu. Koma mufuna kunipaya chifukwa muvomekejalini vanuphunzisa.
38 Newo nulaŵila veniwona penenze na Atata ŵangu, koma mwewo muchita vamwamvwa kwa atata ŵanu.”
39 Ove emuyankha kuti: “Atata ŵasu ni Abulahamu.” Yesu eŵauja kuti: “Kuti nimwe ŵana ŵa Abulahamu, sembe muchita ntchito za Abulahamu.
40 Koma lomba mufuna kunipaya, munthu wamene nakuujani choonadi chamene nechimvwa kwa Mulungu. Abulahamu aliyechite vamene ivi.
41 Mwewo muchita ntchito za atata ŵanu.” Ove enena kuti: “Sewo tiliye vyalike chifukwa cha chiwelewele,* tili na Atata amozi, Mulungu.”
42 Yesu eŵauja kuti: “Kuti Mulungu ni Atata ŵanu, sembe mwanikonda chifukwa newo nifumila kwa Mulungu ndipo nili pano. Niliyewele mwakufuna kwangu koma yove niye enituma.
43 Ndaŵa yanji mumvwishalini vanunena? Chifukwa chakuti mufunalini kumvwishila mawu ŵangu.
44 Mwewo nimwe ofumila kuli atata ŵanu Mdyelekezi, ndipo mufuna kuchita vakufuna atata ŵanu. Yove ni wopaya ŵanthu kufumila pachiyambi ndipo aliyepitilije kunkhala mu choonadi, chifukwa muli yove muliye choonadi. Akotala wenye, owonesha tyala mwalili, chifukwa yove ni wawenye komasoti ni tata wake wawenye.
45 Koma pakuti newo nukuujani vachendi, munikhulupililalini.
46 Ni ŵani wa mwewo wamene angapeleke umboni wowonesha kuti nachita chimo? Keno nulaŵila vachendi, ndaŵa yanji munikhulupililalini?
47 Wofumila kwa Mulungu omvwishila mawu a Mulungu. N’chifukwa chake mwewo mumvwishilalini, chifukwa nimwelini ofumila kwa Mulungu.”
48 Ayuda amene awo emuyankha kuti: “Kansi tutala wenye patunena kuti, ‘Niwe Msamaliya ndipo uli na chiŵanda’?”
49 Yesu eyankha kuti: “Newo niliye chiŵanda, koma nulemekeza Atata ŵangu ndipo mwewo muninyoza.
50 Koma newo nulifunilalini neka ulemelelo. Mulungu niye ofuna kuti nilemekezewe ndipo yove ni woweluza.
51 Shuwa nukuujani, keno munthu osunga mawu ŵangu, azawonelini imfwa olo patontho.”
52 Ayuda amene awo enena kuti: “Lomba taziŵa kuti uli na chiŵanda. Abulahamu emwalila, n’chimozi-mozisoti aneneli. Koma wewo unena kuti, ‘Keno munthu osunga mawu ŵangu azalaulelini imfwa olo patontho.’
53 Kansi wewo niwe nkulu kupambana atata ŵasu Abulahamu amene emwalila? Nawosoti aneneli emwalila. Lomba wewo uliwona monga niwe ŵani?”
54 Yesu eyankha kuti: “Keno nulilemekeza neka, niye kuti ulemelelo wangu ni watyala-tyala. Atata ŵangu niye onilemekeza, ŵamunena mwewo kuti ni Mulungu wanu.
55 Koma olo n’tetyo mwewo mumuziŵalini, koma newo numuziŵa. Keno ningalaŵile kuti numuziŵalini ningankhale wawenye monga ni mwewo. Koma numuziŵa chendi ndipo nusunga mawu ŵake.
56 Atata ŵanu Abulahamu enzekondwela ngako chifukwa enzeyembekezela kuwona nsiku yangu, mwakuti eiwona chendi ndipo ekondwela.”
57 Pavuli pake Ayuda amene awo enena kuti: “Ukaliye nokwanisha kumo vyaka 50, lomba unena kuti wimuwona Abulahamu?”
58 Yesu eŵauja kuti: “Shuwa nukuujani, Abulahamu akaliye nkhalako, newo nenzepo kale.”
59 Tetyo ove etola myala kuti amuteme nayo, koma Yesu efisama nofuma m’kachisi mwamene umo.
Malizu a m'nyansi
^ Olo kuti, “pokonkheja tyala mfundo za ŵanthu.”
^ Mu Chigiliki por·nei′a. Onani matanthauzo a mawu ayakine.
