Wilembewa na Yohani 9:1-41
9 Penzeyenda, yove ewona munthu wamene evyalika na vuto yosalola.
2 Ophunzila ŵake emukonsha kuti: “Labi, kansi ni ŵani echimwa kuti munthu wamene uyu avyalike na vuto yamene iyi yosalola? Ni yove olo ni makolo ŵake?”
3 Yesu eyankha kuti: “Munthu wamene uyu olo makolo ŵake onse aliye chimwe. Koma vamene ivi vichitika kuti ntchito za Mulungu ziwonekele kupitila muli yove.
4 Tufunikila kukata ntchito za Mulungu wamene enituma mukali nzuŵa. Usiku ukuza pamene munthu angakatelini ntchito.
5 Newo panili m’chalo nine kungweleŵela kwa chalo chamene ichi.”
6 Pechilaŵila vamene ivi, etila mata pansi nokanya matika na mata amene awo, pavuli pake eika matika amene awo mmenso mwa munthu wamene uyo.
7 Tetyo emuuja kuti: “Nkhoya ukasambe pa tenga ya Silowamu” (zina yamene iyi kuimasulila kwake ni “Otumijiwa”). Tetyo eluta kuyasamba ndipo ewelako olola.
8 Lomba ŵanthu onkhala nawo pafupi komasoti ayakine amene kuvuli uku enzemuwona osenga-senga eyamba kunena kuti: “Kansi uyu ni walalini enzenkhala pansi nosenga-senga?”
9 Ayakine enzenena kuti: “Ni wamene uyu.” Ayakinesoti enzenena kuti: “Yayi, wangolingana naye.” Koma yove munecho enzeŵauja kuti: “Eye, ninewo.”
10 Tetyo emukonsha kuti: “Lomba menso ŵako amene aŵa aseguka tyani?”
11 Yove eyankha kuti: “Munthu muyakine zina yake Yesu wakanya matika noŵaika mmenso mwangu mwamene umu. Pavuli pake waniuja kuti, ‘Luta ku Silowamu ukasambe.’ Lomba naluta chendi kuyasamba ndipo nayamba kulola.”
12 Pechilaŵila tetyo ŵanthu amene awo emukonsha kuti: “Alikuni munthu wamene uyo?” Yove enena kuti: “Nuziŵalini.”
13 Ove etola munthu wala wamene poyamba enzelolalini noluta naye kwa Afalisi.
14 Nsiku yechikanya matika Yesu nosegula menso a munthu wamene uyo yenze nsiku ya Sondo.
15 Pa nthawe yamene iyo nawo Afalisi eyamba kukonsha munthu wala mwechiyambila kulola. Yove eŵafotokozela kuti: “Yove eika matika mmenso mwangu, ndipo neluta kuyasamba, mphela pavuli pake niyamba kulola.”
16 Lomba ayakine mwa Afalisi amene awo eyamba kunena kuti: “Munthu wamene uyu ni wofumilalini kwa Mulungu, chifukwa osungalini nsiku ya Sondo.” Ayakine enzenena kuti: “Kansi munthu wochimwa angachite tyani vizindikilo monga ni vamene ivi?” Tetyo ŵanthu amene awo eyaŵanika.
17 Afalisi amene awo ekonshasoti munthu wala wamene enzelolalini kuti: “Lomba wewo ukuti tyani za munthu wamene uyo, pakuti wakusegula menso?” Munthu wamene uyo enena kuti: “Ni mneneli.”
18 Koma olo n’tetyo, Ayuda amene awo aliyekhulupilile kuti munthu wamene uyo enzelolalini chendi ndipo wayamba kulola, mpaka eita makolo ŵake.
19 Ove ekonsha makolo amene awo kuti: “Kansi uyu ni mwana wanu wamunena kuti evyalika asalola? Lomba vakwanishika tyani kuti ayambe kulola?”
20 Makolo ŵake amene awo eyankha kuti: “Tuziŵa kuti uyu ni mwana wasu komasoti kuti evyalika asalola.
21 Koma tuziŵalini kuti vakwanishika tyani kuti lomba ayambe kulola komasoti tuziŵalini wamusegula menso. Mukonsheni yove munecho. Ni nkulu wamene uyu, afotokoze yeka.”
22 Makolo ŵake amene awo enena vamene ivi chifukwa enzeyopa asogoleli achipembezo a Chiyuda. Chifukwa ove enze ekatijana kale kuti keno muyakine angavomekeje kuti Yesu ni Khilisitu, akomufumya mmalo opemphelela.
23 N’chifukwa chake makolo ŵake amene awo enena kuti: “Ni nkulu wamene uyu. Mukonsheni munecho.”
24 Tetyo ove eitasoti munthu wala kachiŵili wamene enzelolalini nomuuja kuti: “Lemekeza Mulungu, sewo tuziŵa kuti munthu wamene uyo ni wochimwa.”
25 Yove eyankha kuti: “Vakuti ni wochimwa, newo nuviziŵalini. Chimozi tyala chanuziŵa ni chakuti, poyamba nenzelolalini koma lomba nulola.”
26 Lomba ove emukonsha kuti: “Ni chinji chawakuchita? Wasegula tyani menso ŵako?”
27 Yove eŵayankha kuti: “Nakuujani kale koma mwewo mwenzemvwishilalini. Lomba ndaŵa yanji mufunasoti kumvwa? Payakine namwesoti mufuna kunkhala ophunzila ŵake?”
28 Pechilaŵila vamene ivi, ove emunyoza kuti: “Wewo niye wophunzila wa munthu wamene wala, koma sewo nise ophunzila a Mose.
29 Tuziŵa kuti Mulungu elaŵila na Mose, koma za munthu wamene uyu, tuziŵalini kuti ofumila kuni.”
30 Munthu wamene uyo eŵayankha kuti: “Vamene ivi ni vodabwisa shuwa, muziŵalini kwawafumila, koma olo n’tetyo wanisegula menso.
31 Tuziŵa kuti Mulungu omvwishilalini ochimwa, koma keno munthu oyopa Mulungu ndipo ochita vakufuna yove, munthu wamene uyo omumvwishila.
32 Kufumila kale-kale tikaliye mvwapo kuti munthu muyakine wasegula menso a munthu wamene evyalika asalola.
33 Munthu wamene uyu kuti aliyefumile kwa Mulungu, sembe aliyekwanishe kuchita chilichonse.”
34 Poyankha ove emuuja kuti: “Wovyalikila mu uchimo weka-weka wewo. Lomba kansi ufuna utiphunzise?” Pevichitika tetyo emufumya mmalo opemphelela!
35 Yesu echimvwa kuti munthu wala amufumya mmalo opemphelela. Ndipo pechikumana naye emukonsha kuti: “Kansi ukhulupilila Mwana wa munthu?”
36 Munthu wamene uyo eyankha kuti: “Kansi mwana wa munthu wamene uyo ni ŵani? Niujeni mwewo akulu kuti nimukhulupilile.”
37 Yesu emuuja kuti: “Wamuwona kale ndipo ni wamene uyu waulaŵila naye lomba teti.”
38 Yove enena kuti: “Nakukhulupililani Ambuye.” Ndipo emugwadila.
39 Lomba Yesu enena kuti: “Niwela muli chino chalo kuzapeleka chiweluzo chakuti asalola ayambe kulola ndipo amene olola ankhale asalola.”
40 Afalisi amene enzenaye pamozi echimvwa vamene ivi, ndipo ekonsha Yesu kuti: “Kansi nasesoti tulolalini?”
41 Yesu eŵauja kuti: “Kuti mulolalini, sembe muliye chimo. Koma pakuti munena kuti ‘Tulola,’ chimo yanu izakhululukiliwelini.”
