Kalata ya Yuda 1:1-25
1 Ninewo Yuda, kapolo wa Yesu Khilisitu komasoti nkwake wa Yakobo. Nulembela oitiwa amene Mulungu, wamene ni Atata ŵasu oŵakonda komasoti kuŵateteza kuti ankhale okatijana na Yesu Khilisitu.
2 Mulungu ayangijile chifundo, ntendele na chikondi chake kuli mwewo.
3 Mwewo apantima pangu, nenzefunishisha kukulembelani za chipulumuso chatili nacho tonse. Koma olo n’tetyo, nawona kuti vingankhale luweme kukulembelani vinthu vingakutang’isheni kuniyata mwamphamvu nkhondo ya chikhulupililo chamene chipelekewa kamozi tyala kuli atuŵa amene awo.
4 Nalaŵila tetyo chifukwa ŵanthu ayakine aloŵa mojeŵa pakati panu. Malemba ewoneshelatu kale-kale kuti ŵanthu amene aŵa azaweluziwe. Ŵanthu amene aŵa oyopalini Mulungu ndipo atola kuwama ntima kukulu kwa Mulungu wasu kunkhala chifukwa chochitila nkhalidwe iliye nsoni.* Komasoti awonesha kuti ni osakhulupilika kwa Ambuye wasu mmozi tyala wamene etigula, Yesu Khilisitu.
5 Olo kuti muviziŵa kale vonse vamene ivi, nufuna kukukumbushani kuti Yehova pechipulumusha ŵanthu ŵake poŵafumya mu chalo cha Iguputo, pavuli pake ewononga amene enzeve chikhulupililo.
6 Komasoti angelo amene esiya utumiki wechiŵapasa Mulungu kululu komasoti malo ŵenzefunikila kunkhala, Mulungu eŵamanga na matcheni amene angatendekelini* noŵasunga mu mfinzi ikulu ngako kuti azaweluziwe pa nsiku ikulu.
7 Molingana na vamene ivi, ŵanthu a mmatauni a Sodomu na Gomola komasoti matauni apafupi enzechita chiwelewele* chiipa ngako komasoti kuyonana kwamene ni kosavomelejeka. Ŵanthu amene aŵa epasiwa chilango cha chiwonongeko chosasila* ndipo ni chisanzo chutichenjeja.
8 Olo kuti vili tetyo, nawosoti ŵanthu amene aloŵa mojeŵa amene aŵa okonda kulota, oipisha miŵili yawo komasoti ya ayakine,* onyoza ulamulilo komasoti olaŵila vonyoza ŵanthu amene apasiwa ulemelelo na Mulungu.
9 Koma Mikayeli nkulu wa angelo, ephoniyana maganizo na Mdyelekezi ndipo ekangana naye za thupi ya Mose, koma olo n’tetyo aliye yeje kumuweluza komasoti kumunyoza, mmalo mwake enena kuti: “Yehova akuzuzule.”
10 Koma ŵanthu amene aŵa olaŵila monyoza vinthu vonse vamene ovimvwishalini. Ndipo vala vakumvwisha mwachibadwa, molingana na nyama zamene zuganizalini, opitilija kuliipisha navo.
11 Ali na soka chifukwa akonkheja njila ya Kaini, asankha njila yophoniyeka ya Balamu kuti alondele mphoto ndipo awonongeka polaŵila mopanduka monga ni Kola.
12 Ŵanthu amene aŵa pamukulya nawo pamozi pamaphwando ŵamuchita kuti muwoneshane chikondi, onkhala monga ni myala ikulu-ikulu ili fisike mmanzi. Alisoti monga ni achiŵeta amene olilyesha ŵeka paliye kuchita wowa, mikumbi iliye manzi yutakuliwa na mphepo, komasoti monga ni vimiti viliye vitwazi koma nthawe yake yotwala yasala patontho kusila, voyumilatu* komasoti vojuliwa.
13 Alisoti monga ni mafunde oyofya ngako apa nyanja amene ofumya povu ya vinthu vochitisha nsoni, komasoti monga ni nyenyezi zuyenda paliye dongosolo, ndipo Mulungu waŵaika mu mfinzi ikulu ngako mwamene azankhalemo mpaka kale-kale.
14 Olosoti Inoki, wa m’badwo wa 7 kufumila kwa Adamu, elosela za ove pechinena kuti: “Onani Yehova ewela na angelo ŵake masauzande-masauzande
15 kuzaweluza ŵanthu onse, na kuzalamula kuti ŵanthu onse asayopa Mulungu apezeka na mulandu chifukwa cha vinthu vechichita vonyoza Mulungu, komasoti chifukwa cha vinthu vonse viipa ngako vechimulaŵilila ŵanthu ochimwa asayopa Mulungu amene aŵa.”
16 Ŵanthu amene aŵa okonda kung’ung’uzika, kudandaula vokhuza moyo wawo, ochita vinthu vakukumbwila komasoti olaŵila molitumba. Otamandasoti ŵanthu na cholinga chakuti afwanepo pindu.
17 Koma mwewo apantima pangu, kumbukilani mawu ŵechilaŵililatu atumwi ŵa Ambuye wasu Yesu Khilisitu kale-kale.
18 Pala ekuujani kuti: “Mmasiku osilijila kuzankhale ŵanthu onyoza, amene akuti azachite vinthu viipa vakukumbwila.”
19 Ŵanthu amene aŵa ochitisha kuti ŵanthu osati akokatijana, ochita vinthu monga ni vinyama ndipo osogolelewalini na mzimu wa Mulungu.
20 Koma mwewo apantima pangu, mukotang’isha chikhulupililo chanu chituŵa ngako, komasoti mukopemphela mokatijana na mzimu utuŵa,
21 kuti mupitilije kuchita vinthu vamene vingachitishe kuti Mulungu akokukondani, pamuyembekezela chifundo cha Ambuye wasu Yesu Khilisitu chamene chizachitishe kuti muzafwane moyo wosasila.
22 Komasoti pitilijani kuchitila chifundo ŵanthu amene okaikila vatukhulupilila.
23 Apulumusheni poŵafumya mokulumija pa mulilo. Pitilijanisoti kuchitila chifundo ŵanthu ayakine, koma mukosamala. Poŵachitila chifundo chamene icho, mukozondana na vovwala vawo vamene aviifya na minkhalidwe iipa.*
24 Mulungu wasu waulemelelo angakwanishe kukutetezani kuti osati mupone komasoti kukuyavyani kuti mupaname pamenso pake muliye chophoniya koma mulisangalale ngako.
25 Yove yeka ni Mulungu komasoti Mpulumusi wasu mwa Yesu Khilisitu Ambuye wasu, ndipo ni wowamila ulemelelo, ufumu, mphamvu na ulamulilo, kufumila kale-kale kufwika palipano komasoti mpaka kale-kale. Ame.
Malizu a m'nyansi
^ Onani matanthauzo a mawu ayakine.
^ Mu Chigiliki, “matcheni asasila.”
^ Onani matanthauzo a mawu ayakine.
^ Mu Chigiliki, “mulilo wosasila.” Onani matanthauzo a mawu ayakine.
^ Kutanthauza kuti oŵaipisha pochita chiwelewele.
^ Mu Chigiliki, “vakufwa kaŵili.”
^ Olo kuti, “aliifya na ntchito za muŵili.”