Olo kuti muyeja-yeja kuti munkhale na ukwati komasoti banja yosangalala, vinthu vosayembekezeleka vingachitike, vamene vingapangishe kuti kunkhale kovuta kuti munkhale osangalala. (Mlaliki 9:11) Mwachikondi Mulungu otiyavya keno takumana na mavuto. Keno mungakatishile ntchito mfundo za m’malemba zili umu m’nyasi, mwewo na banja yanu mungakwanishe kulimbana na mavuto, olo akule tyani.

VAYUNENA BAIBOLO: “Chitani vamene ivi pamumutulila nkhaŵa zanu zonse, pakuti yove okudelani nkhaŵa.” (1 Petulo 5:7) Mukokumbukila nthawe zonse kuti mayeselo ŵamukumana nawo ofumilalini kwa Mulungu. (Yakobo 1:13) Keno muvwendela pafupi, yove akuyavyeni kuti mukoyenda m’njila yoyenela. (Yesaya 41:10) “Mukhutulileni vili mu ntima mwanu.”—Salimo 62:8.

Kuŵelenga nophunzila Baibolo nsiku zonse kukuyavyenisoti kuti munkhazike ntima pansi. Mukachita tetyo muwone mwamene Yehova “mwakunkhazikila mitima yasu pansi keno takumana na mayeselo.” (2 Akorinto 1:3, 4; Aroma 15:4) Yove olonjeza kuti akupeni “ntendele wa Mulungu wamene upambana kuganizila kulikonse.”—Afilipi 4:6, 7, 13.

VAMUNGACHITE:

• Pemphelani kwaYehova kuti akuyavyeni kunkhala odekha na oganiza luweme.

• Onani vonse vamufuna kuchita ndipo sankhani vamwawona kuti vili luweme.

VAYUNENA BAIBOLO: “Ntima wa munthu womvwisha vinthu uziŵa vinthu, ndipo kwatu ya anzelu yusakila-sakila kuziŵa vinthu.” (Miyambo 18:15) Mvwishani mfundo zonse. Ziŵani vakufunikila aliyense m’banja. Laŵilani nawo. Ndipo mvwishilani vakulaŵila.—Miyambo 20:5.

Tyani keno wokondewa wanu wamwalila? Osayopa kuwonesha chisoni chanu. Kumbukilani kuti olo Yesu “elila.” (Yohane 11:35; Mlaliki 3:4) Kupumula na kuyona mokwanila n’kofunika ngako. (Mlaliki 4:6) Kuchita ivi kungakuyavyeni kuti mukwanishe kulimbana na vuto yukuvutishani maganizo.

VAMUNGACHITE:

• Mavuto akaliye yamba, nkhalani na chiyoloŵezi cholaŵijana na ŵanthu am’banja mwanu. Kuchita vamene ivi kungayavye kuti akolaŵila namwe momasuka mavuto akayamba.

• Mungaujeko ayakine ekumanako na vuto yolingana na yamene iyo.

VAYUNENA BAIBOLO: “Shamwali ngaye-ngaye okukonda nthawe zonse, ndipo yove ni m’bale wamene evyalikila kuti akuyavye pakawoneka mavuto.” (Miyambo 17:17) Ayanu angafune kukuyavyani koma angaziŵelini vangachite. Tetyo osaleka kuŵauja vamufuna. (Miyambo 12:25) Komasoti fwanani thandizo yauzimu kwa ŵala amene ni akulu auzimu. Malangizo a m’Baibolo angakuyavyeni mwewo.—Yakobo 5:14.

Keno nthawe zonse mukatijana na ŵanthu okhulupilila Mulungu na odalila malonjezo ŵake, mufwane thandizo yamufuna. Keno muyavya ŵanthu ayakine ofuna kulimbikisiwa, mukonkhazikishiwa ntima pansi. Aujeni za chikhulupililo chanu pa Yehova na malonjezo ŵake. Nkhalani na khama yoyavya ŵanthu ayakine ofuna thandizo. Tetyo mufunikilalini kulipatula kuli ŵanthu okukondani komasoti osamalila za mwewo.—Miyambo 18:1; 1 Akorinto 15:58.

VAMUNGACHITE:

• Fotokozelani muyanu wa pa ntima ndipo londelani thandizo yangakupaseni.

• Nkhalani owona ntima ndipo osapita m’mbali polaŵila za thandizo yamungafune.