Kuvyalika kwa mwana kungaŵe kokondwelesha komasoti kovuta. Mukankhala makolo, mungadabwe kuwona kuti mutaila nthawe yanu ikulu komasoti mphamvu zanu posamalila mwana wanu. Kuyona mosakwanila pamozi na kuchinja kwa maganizo kungachitishe kuti ukwati wanu osati ukoyenda bwino. Mwewo pamozi na muyanu mufunikila kuchinja mbali ziyakine kuti mukosamalila mwana wanu nochilikiza ukwati wanu. Kansi malangizo a m’Baibolo angakuyavyeni tyani mwamungachitile na mavuto amene aŵa?

VAYUNENA BAIBOLO: “Chikondi n’choleza ntima, n’chiweme ntima.” Komasoti chikondi “chusamalilalini vofuna vake veka, ndipo chukalipalini.” (1 Akorinto 13:4, 5) Pakuti lomba muli na mwana, n’vosadabwisa kuti maganizo ŵanu onse akonkhala pa mwana wanu. Mwanalume wanu angayambe kuwona kuti mumusamalilalini kapena kuti mumuikilakolini nzelu, tetyo mufunikilalini kuluŵa kuti naye ofuna chisamalilo chanu. Koma moleza ntima pamozi na kumuwamila ntima, mungamuyavye kuti akolimvwa kuti niwofunika ndipo naye ali na mbali pa kusamalila mwana.

“Mwewo soti analume . . . pitilijani kunkhala na anakazi ŵanu moŵaziŵa luweme.” (1 Petulo 3:7) Mufunikila kumvwisha kuti lomba nkazi wanu akotaila mphamvu zake zinyinji pa kusamalila mwana wanu. Pakuti yove lomba ali na maudindo ayakine, amene payakine angamuchitishe kunkhala na nkhaŵa, kumvwa kuŵeŵa komasoti kunkhala wosakondwela. Nthawe ziyakine angafwike pokukalipilani, koma olo n’tetyo osakalipa kamangu chifukwa chakuti kuti “munthu asakalipa kamangu ni muweme kusiyana na munthu wamphamvu.” (Miyambo 16:32) Nkhalani wozindikila ndipo muyavyeni pavinthu vakufunikila. —Miyambo 14:29.

VAMUNGACHITE:

• Analume: Mukoyavya nkazi wanu kulela mwana, na usiku kumo. Mukochefyako nthawe yamuchita vinthu viyakine kuti mukonkhala na nthawe yotandala na nkazi wanu komasoti na mwana wanu.

• Anakazi: Keno mwanalume wanu okusengani kuti akuyavyeni kusamalila mwana, osamulesha yayi. Keno yove omukatalini bwino monga ni mwamwenzeyembekezela osamukalipila, mmalo mwake mwachikondi mufunika kumutembeja nomuwonesha mwangachitile.

VAYUNENA BAIBOLO: “Pamene apo ove azankhale muŵili umo.” (Genesis 2:24) Olo kuti m’banja mwanu muli mwana lomba, mukokumbukila kuti mwewo na muyanu wamuukwati mukali “muŵili umo.” Mukochita chilichonse chamungakwanishe kuti mukotang’isha ukwati wanu.

Anakazi, mukotembeja vakuchita analume ŵanu pa thandizo yakukupasani. Mawu ŵanu otembeja angaŵe “opojeka” kuli mwanalume wanu. (Miyambo 12:18) Analume, ŵaujeni anakazi ŵanu kuti muŵakonda ngako, na kuti muŵaona kuti ni ofunika ngako. Ndipo atembejeni chifukwa cha mwakusamalilila banja.— Miyambo 31:10, 28.

“Aliyense osati akolifunila vopindulisha yove yeka nkhela, koma vopindulishasoti muyake.” (1 Akorinto 10:24) Nthawe zonse mukochitila vinthu viweme muyanu wamuukwati. Monga ŵanthu olungulana, mukonkhala na nthawe yokambilana. Mufunikila kutembeja vakuchita muyanu, nomvwishila maganizo a muyanu, ndipo pankhani yokhuza kuyonana mufunikilalini kuleshana monga banja. Ganizilani vofuna va muyanu. Baibolo yunena kuti: “Osati mukotanana, kupatulapo keno mwakatijana kulekeja patontho kwa kanthawe kuyonana.” (1 Akorinto 7:3-5) Tetyo monse mwaŵili mukokambilana pa chilichonse mwachilungamo. Kuleza ntima pamozi na kumvwisha vinthu kungakuyavyeni kutang’isha ukwati wanu.

VAMUNGACHITE:

• Mukowoneshesha kuti mupatula nthawe yotandala na muyanu wamuukwati.

• Mukochitako tunthu tungachitishe muyanu kulimvwa kuti mumukonda monga kumuletelako ka mphaso olo kumulembelako ka mesedji.

VAYUNENA BAIBOLO: “Kufumila pewenze ukali lucheche, waziŵa malemba atuŵa amene angakwanishe kukupasa nzelu zamene zingakuyavye kuti uzapulumuke.” (2 Timoteyo 3:15) Kambilannani vamukuti mukochita pophunzisa mwana wanu. Angaphunzile olo akali m’mala. Akaliyevyalika, mwana wanu angaziŵe lizu yanu nokhuziwa na mwamuvwila. Muŵelengeleni mwana wanu olo kuti akali lucheche. Olo kuti angamvwishelini vamuŵelenga, vamene ivi vingazamuyavya kuti akazakula akokonda kuŵelenga.

Olo kuti mwana wanu ni ntontho, angomvwishila keno mulaŵila naye za Mulungu. Simikijilani kuti mwana wanu akokumvwani pamulaŵila na Yehova mpemphelo. (Deuteronomo 11:19) Posoŵela, laŵilani za vinthu vechilenga Mulungu. (Salimo 78:3, 4) Akokula mwana wanu, akoziŵa kuti mukonda Yehova ndipo naye ayambe kumukonda.

VAMUNGACHITE:

• Mukopemphela kwa Yehova kuti akupaseni nzelu mwamungalelele mwana wanu.

• Kuti mwana wanu aphunzile vinthu mokulumija, mukowelejela mawu amene ali na mfundo zikulu-zikulu.