Monga ni mwamwaphunzilila mu kabuku kano, Baibolo ili na mfundo zinyinji zingakuyavyeni mwewo na banja yanu. Yehova ofuna kuti munkhale osangalala. Yove olonjeza kuti keno muika kulambila kwake pasogolo, “vinthu viyakine vonse viyangijiliwe kuli mwewo.” (Mateyu 6:33) Yove ofunishisha kuti munkhale shamwali wake. Onesheshani kuti mukatishila ntchito mpata uliwonse kuti mukulishe ushamwali wanu na Mulungu. Iyi ni shuko iweme ngako yangankhale nayo munthu.—Mateyu 22:37, 38.

VAYUNENA BAIBOLO: “‘Nizankhale atata ŵanu, ndipo mwewo muzankhale ŵana ŵangu anakazi na analume,’ wanena tetyo Yehova.” (2 Akorinto 6:18) Mulungu ofuna kuti munkhale shamwali wake wa pantima. Pemphelo ni njila imozi yatingachitile vamene ivi. Yehova otisenga kuti tikopemphela kuli yove “nthawe zonse.” (1 Atesalonika 5:17) Yove ni wokonzeka kumvwishila maganizo ali mu ntima mwasu na vutivuta. (Afilipi 4:6) Keno mwewo mumusenga pamozi na banja yanu, ove awone kuti Mulungu ni ngaye-ngaye kuli mwewo.

Kuyangijila pa kulaŵila na Mulungu, mufunikila kumumvwishila yove. Mungachite vamene ivi mwa kuphunzila Mawu ŵake na mabuku ofotokoza Baibolo. (Salimo 1:1, 2) Sinkhasinkhani pa vamwaphunzila. (Salimo 77:11, 12) Kumvwishila kwa Mulungu kufuna kuti mukopezeka nsiku zonse pa misonkhano Yachikhilisitu.—Salimo 122:1-4.

Kulaŵila na ŵanthu ayakine za Yehova ni njila iyakine yofunika ngako yatingatang’ishile ushamwali wasu na yove. Kuchita vamene ivi kaŵili-kaŵili, kukuyavyeni kuti muvwendele pafupi na yove.—Mateyu 28:19, 20.

VAMUNGACHITE:

• Nthawe zonse mukopatula nthawe yoŵelenga Baibolo nopemphela.

• Monga banja, mufunikila kuika vinthu va uzimu pamalo oyamba m’malo mwa vosangulusha na kupumula.

VAYUNENA BAIBOLO: “Vwendelani kuli Mulungu, ndipo yove naye akuvwendeleni.” (Yakobo 4:8) Mufunikila kunkhala na ndondomeko yonkhazikika ya kulambila kwa pabanja noikonkha. (Genesis 18:19) Koma mufunikila kuchita vinyinji kupambana pamene apo. Mulungu ofunikila kunkhala mbali ya moyo wanu wa nsiku na nsiku. Mufunikilasoti kutang’isha ushamwali wa banja yanu na Mulungu mwa kulaŵila za yove “mukankhala pansi m’ng’anda mwanu, poyenda pa nseu, poyona, na pouka.” (Deuteronomo 6:6, 7) Mufunikila kunkhala n’nga ni Yoswa wamene elaŵila kuti: “Koma newo pamo na am’ng’anda mwangu, tikotumikila Yehova.”—Yoswa 24:15.

VAMUNGACHITE:

• Nkhalani na pulogilamu yonkhazikika yophunzisa yamene ingakuyavyeni kuziŵa vosoŵa va aliyense m’banja yanu.