Mukalungulana muyamba moyo wa banja unyowani. Olo kuti mufunikila kupitilija kuŵakondwelesha noŵalemekeza makolo ŵanu, mukokumbukila kuti lomba muyanu wamuukwati niye wofunika ngako kuli mwewo pachalo chonse. Ayakine mwa a banja ŵanu angavutike kuti amvwishe vamene ivi. Koma mfundo za m’Baibolo zingakuyavyeni kuwona vinthu moyenelela, ndipo kuchita vamene ivi kungakuyavyeni kunkhala pantendele na a banja ŵanu, pamuyeja-yeja kuti mudjaile moyo wanyowani wa m’banja.

VAYUNENA BAIBOLO: “Ukolemekeza atata ŵako na amayi ŵako.” (Aefeso 6:2) Olo kuti mukule tyani, mufunikila kulemekeza makolo ŵanu nsiku zonse. Mukoziŵa kuti naye muyanu wamuukwati ali na makolo ŵake ndipo ofunikila kuŵasamalila. “Chikondi chiliye nsanje,” tetyo osachita nsanje mukawona kuti muyanu okatijana ngako na am’banja mwake.—1 Akorinto 13:4; Agalatiya 5:26.

VAMUNGACHITE:

• Mukopewa kulaŵila mawu monga akuti, “Achibale ŵako onidelela nthawe zonse” kapena akuti, “nthawe zonse, amayi ŵako osangalalalini na vanuchita newo.”

• Yeja-yejani kuwona vinthu mwakuviwonela muyanu.

VAYUNENA BAIBOLO: “Pachifukwa chamene ichi, mwanalume azasiye atata ŵake na amayi ŵake, nakuyalipamikija kuli mwanakazi wake, pamene apo ove azankhale muŵili umo.” (Genesis 2:24) Mukalowa m’banja, makolo ŵanu angawonenkhela kuti ofunikila kukusamalilani ndipo angayambe kuloŵelela m’banja yanu.

Mwewo na muyanu wamuukwati muli na udindo woikila malile makolo ŵanu pa nkhani zokhuza ukwati wanu. Mwachikondi, mufunikila kuŵauja pangapelele, nkhalani omasuka pokambilana nawo ndipo osapita mmbali, komasoti kambilanani nawo mwaulemu osati mwaukali. (Miyambo 15:1) Kulichefya, kufasa, na kuleza ntima kukuyavyeni kunkhala paushamwali uweme na a banja ŵanu nopitilija “mololelana m’chikondi.”—Aefeso 4:2.

VAMUNGACHITE:

• Keno muwona kuti a banja oloŵelelapo ngako pa vochitika va m’banja mwanu, mufunikila kukambilana na muyanu wamuukwati pa nthawe yakuti vinthu vili bwino.

• Mufunikila kupangana mwamukuti mukochitila vinthu.