Pa Chiheberi, zina yakuti Beteli yutanthauza “Ng’anda ya Mulungu.” (Genesis 28:17, 19) Yamene iyi ni zina yoyenelela ya malo amene Mboni za Yehova yezinkhazikisha pachalo chonse. Ku malo amene aŵa niye kwakuyanganila noyavya ntchito yolalikila. Bungwe Yutonga ili ku likulu ya pachalo chonse ku New York State, U.S.A., soti yuyanganila maofesi a nthambi m’vyalo vosiyana-siyana. Ŵanthu otumikila ku malo amene aŵa oitiwa kuti banja ya Beteli. Monga banja, onkhalila pamozi, oseŵenzela pamozi, olyela pamozi nophunzila Baibolo pamozi.​—Salimo 133:1.

Malo apadela kwamene onse m’banja ali na mzimu wolitwala. Beteli iliyonse ili na analume na anakazi Achikhilisitu amene ni olipeleka pochita chifunilo cha Mulungu soti ochilikiza vinthu va Ufumu nthawe zonse. (Mateyu 6:33) Paliye olondela malipilo aliwonse, koma onse opasiwa malo onkhala, chakulya na kandalama katontho koŵayavya pa vinthu vakufunikila aliyense payeka-payeka. Aliyense pa Beteli ali na ntchito yake. Ayakine oseŵenzela mu ofesi, mu khichini olo mu chipinda cholyela. Ayakine oseŵenzela kodindila mabuku olo koikila vikuto. Ayakine opyela m’vipinda voyona, owasha, okata ntchito yokonza vinthu olo ntchito ziyakine.

Kuchitika ntchito zinyinji zochilikiza ntchito yolalikila za Ufumu. Cholinga chikulu cha Beteli ni kufalisa chendi cha m’Baibolo ku ŵanthu anyinji. Chisanzo chake ni kabuku kano. Bungwe Yutonga niye yepanamila ntchito yolemba kabuku kano, kukatumija pa kompyuta kwa omasulila pachalo chonse, kukadinda pa mashini ofulumila ngako ku ng’anda za Beteli zosiyana-siyana nokatumija ku mipingo yopitilila pa 110.000. Pa vochitika vonse vamene ivi, mabanja a Beteli ochilikiza ntchito yofunika ngako pa ntchito zonse, yamene ni​—kulalikila uthenga uweme.​—Maliko 13:10.

• Kansi niŵani otumikila pa Beteli, soti osamaliliwa tyani?

• Kansi Beteli iliyonse yuyavya ntchito yofunika ngako yotyani?