Malemba Achigiriki Achikhilisitu otiuja za Baranaba na ntumwi Paulo. Analume amene aŵa enzetumikila monga opanamila madela, soti enzeyendela mipingo. Kansi n’chinji cheŵasonkhezela kuchita vamene ivi? Enzedela nkhaŵa umoyo wauzimu wa abale. Paulo elaŵila kuti yove enzefuna ‘kujokela kuti akatandalile abale’ nowona kuti ali tyani. Yove enze wokonzeka kufwamba makilomita anyinji kuti akaŵatang’ishe. (Machitidwe 15:36) Ichi niye cholinga cha opanamila madela masiku ŵano.

Owela kuzatitang’isha. Wopanamila dela aliyense oyendela mipingo pafupifupi 20, soti osila sondo imozi pa mpingo ulionse, kaŵili pachaka. Tutang’ishiwa ngako na abale amene aŵa na azinakazi ŵawo, keno ni olungula. Opanamila madela na azinakazi ŵawo oyeja-yeja kuziŵana na aliyense, atontho-atontho pamozi na akulu-akulu. Ove ofuna kulalikila pamozi na sewo noluta nase ku maphunzilo ŵasu a Baibolo. Opanamila amene aŵa ochita maulwendo auchiŵeta pamozi na akulu, soti olaŵila nkhani pa misonkhano ya mpingo na pa misonkhano ikulu-ikulu kuti atitang’ishe.​—Machitidwe 15:35.

Owonesha chidwi kuli aliyense. Opanamila madela ofuna kuziŵa umoyo wauzimu wa mipingo yonse. Okumana na akulu komasoti atumiki othandiza kuti awone mwaupitila pasogolo mpingo noŵayavya mwangakatile luweme ntchito zawo. Oyavya apainiya kuti apambane pa utumiki wawo, soti okonda kuziŵana na achasopano na kumvwa mwakupitila pasogolo mwauzimu. Aliyense mwa abale amene aŵa olitwala monga wantchito muyasu kuti ‘atiyavye.’ (2 Akorinto 8:23) Tuwamila kutolela chikhulupililo chawo na kulitwala kwawo kwa Mulungu.​—Aheberi 13:7.

• Ndaŵa yanji opanamila madela oyendela mipingo?

• Kansi otiyavya pa mbali zotyani akayendela mpingo?