M’vyaka 100 voyambilila, kagulu katontho ka “atumwi na akulu ku Yerusalemu,” enzetumikila monga Bungwe Yutonga soti enzepanga vosankha vikulu-vikulu m’malo mwa mpingo wonse wa Akhilisitu ozozewa. (Machitidwe 15:2) Kuti akatijane pa chosankha chimozi, enzelaŵijana Malemba nokonkha chisogozo cha mzimu wa Mulungu. (Machitidwe 15:25) Njila yamene iyi niye yukonkhewa masiku ŵano.

Mulungu oikatishila ntchito pofuna kukwanilisha chifunilo chake. Akwasu ozozewa amene ali mu Bungwe Yutonga okonda ngako Mawu a Mulungu soti oziŵa luweme moyendeshela ntchito yasu komasoti kusamalila nkhani zauzimu. Onkhala na nsokhano sondo iliyonse kuti alaŵijane vosoŵa va gulu yonse ya abale pachalo chonse. Monga ni mwevenzele m’vyaka 100 voyambilila, ove opeleka malangizo a m’Baibolo kupitila m’makalata olo kupitila muli opanamila madela na ŵanthu ayakine. Vamene ivi vuyavya ŵanthu a Mulungu kunkhala na malingalilo amozi nochita vinthu mokatijana. (Machitidwe 16:4, 5) Bungwe Yutonga yupanamila ntchito yokonza chakulya chauzimu, yutang’isha ŵanthu onse kuika ntchito yolalikila za Ufumu pasogolo, komasoti yupanamila ntchito yoika abale pa maudindo.

Yukonkha chisogozo cha mzimu wa Mulungu. Bungwe Yutonga yudalila chisogozo cha Yehova, Mfumu ya Chilengedwe chonse, komasoti chisogozo cha Yesu, Mutu wa mpingo. (1 Akorinto 11:3; Aefeso 5:23) Abale a m’Bungwe Yutonga oliwona lini kuti ni asogoleli a ŵanthu a Mulungu. Ove, pamozi na ozozewa onse, “okonkha Mwanawambelele [Yesu] kulikonse kwakuya.” (Chivumbulutso 14:4) Abale a ‘m Bungwe Yutonga otembeja ngako keno tuŵapemphelela.

• Kansi niŵani enze m’bungwe yutonga m’vyaka 100 voyambilila?

• Kansi Bungwe Yutonga yuchita chinji kuti ifwane chisogozo cha Mulungu masiku ŵano?