Mu gulu yasu tiliye achiŵeta amene olipiliwa. Koma tili na oyanganila oyenelela amene oyikiwa ‘kuti aŵetele mpingo wa Mulungu.’ Umu niye mwevenzele peweyamba mpingo wa Chikhilisitu. (Machitidwe 20:28) Akulu amene aŵa ni analume ofwikapo mwauzimu soti osogolela mpingo nouŵetela, “osati mokakamijika koma mofunishisha. Osati soti chifukwa chofuna kupindulapo kanthu, koma na ntima wonse.” (1 Petulo 5:1-3) Kansi otiyavya m’njila zotyani?

Otisamalila notiyanganila. Akulu osogolela noteteza mpingo mwauzimu. Pozindikila kuti Mulungu waŵapasa udindo ukulu wamene uyu, akulu okandilila lini ŵanthu ŵake, koma oŵayavya kuti ankhale otang’a komasoti otemwa. (2 Akorinto 1:24) Mchiŵeta ochita khama kusamalila nkhosa iliyonse payeka-payeka. Nawo akulu oyeja-yeja kuziŵa luweme munthu aliyense mu mpingo.​—Miyambo 27:23.

Otiphunzisa kuchita chifunilo cha Mulungu. Sondo iliyonse, akulu ochitisha misonkhano ya mpingo kuti atang’ishe chikhulupililo chasu. (Machitidwe 15:32) Analume olitwala amene aŵa osogolela pa ntchito yolalikila. Ove oseŵenzela nase pamozi notiphunzisa mbali zonse za ulaliki.

Otang’isha aliyense wa sewo payeka-payeka. Pofuna kusamalila vosoŵa vauzimu va aliyense wa sewo, akulu angatiyendele ku mang’anda kwasu olo angatandale nase pa Ng’anda ya Ufumu. Pa nthawe yamene iyi, ove okatishila ntchito Malemba popeleka thandizo na chitonthozo.​—Yakobo 5:14, 15.

Kuyangijila pa ntchito yawo mu mpingo, akulu anyinji alisoti na ntchito zawo, komasoti ali na udindo wosamalila mabanja ŵawo. Akulu okata nchito na nthina amene aŵa, ofunika kulemekezewa.—1 Atesalonika 5:12, 13.​

• Kansi akulu mu mpingo ali na udindo wotyani?

• Kansi akulu angawoneshe tyani kuti ali na chidwi na aliyense wa sewo?