Chaka chilichonse, gulu yasu yudinda ma Baibolo na mabuku mamiliyoni anyinji noŵayaŵila chosalipilisha. Tumanga nosamalila Ng’anda za Ufumu na maofesi a nthambi. Tuyavya abale na alongo anyinji amene otumikila pa Beteli na amishonale, soti tupeleka thandizo pakachitika soka. Tetyo mungakonshe kuti, ‘Kansi ndalama zochitila ntchito zonse zamene izi zufumila kuni?’

Tupeleka lini chakhumi, komasoti tuyendesha lini mbale ya zopeleka. Ntchito yasu yolalikila yufuna ndalama zinyinji, koma tusenga lini ndalama. Vyaka vopitilila 100 vapita, magazini yachiŵili ya Nsanja ya Olonda yelaŵila kuti tukhulupilila kuti Yehova niye otiyavya komasoti sewo “tikasenge lini thandizo ku ŵanthu”​—soti tiliyesengepo!​—Mateyu 10:8.

Ntchito yasu yuchilikiziwa na zopeleka zolifunila. Ŵanthu anyinji oyamikila ntchito yasu yophunzisa Baibolo soti opeleka ndalama kuyavya pa ntchito yolalikila. Mboni za Yehova mofumila pansi pa ntima okatishila ntchito nthawe yawo, mphamvu zawo, ndalama zawo na vinthu viyakine pochita chifunilo cha Mulungu pachalo chonse. (1 Mbiri 29:9) Pa Ng’anda ya Ufumu na pa misonkhano yadela na yachigawo ponkhala mabokosi ya zopeleka kuti ofuna aponyemo olo angapange zopeleka pokatishila ntchito webusaiti yasu ya jw.org. Nthawe zinyinji vopeleka vatulondela vufumila ku ŵanthu amene aliye vinyinji, monga munakazi wamasiye wosauka wechitembeja Yesu chifukwa choponya tundalama tuŵili moponyamo vopeleka. (Luka 21:1-4) Tetyo aliyense “angosunga kayakine pambali” kuti atwale “mokatijana na mwawasimikijila muntima mwake.”​—1 Akorinto 16:2; 2 Akorinto 9:7.

Tili na chikhulupililo chakuti Yehova apitilije kusonkhezela mitima ya ŵanthu ofuna ‘kumulemekeza na vinthu vawo vamtengo wapatali’ kuti achilikize ntchito ya Ufumu, kuti chifunilo chake chichitike.​—Miyambo 3:9.

• Kansi gulu yasu yusiyana tyani na vipembezo viyakine?

• Kansi vopaleka volifunila vuseŵenza ntchito yanji?