A banja ya Beteli otumikila m’madipatimenti osiyana-siyana, kusamalila ntchito yolalikila m’chalo chimozi olo m’vyalo voŵelengeka. Ayakine okata ntchito yomasulila, yodinda magazini, yoika vikuto ku mabuku, soti ayakine oseŵenzela kosungila mabuku, kopangila ma CD na mavidiyo olo kusamalila ntchito ziyakine zokhuza dela yawo.

Komiti ya Nthambi yuyanganila ntchito. Bungwe Yutonga yapeleka udindo wosamalila ofesi ya nthambi iliyonse m’manja mwa Komiti ya Nthambi ya akulu oyenelela atatu olo opitililapo. Komiti ya Nthambi yuziŵisha Bungwe Yutonga za kupita pasogolo kwa ntchito komasoti mavuto aliwonse angawele m’dela yawo. Malipoti amene aŵa oyavya Bungwe Yutonga kuwona nkhani zangalembe m’vofalisa vasu na mfundo zangaikemo m’nkhani za pa misonkhano ya mpingo na misonkhano ikulu-ikulu. Opanamila Bungwe Yutonga otumijiwa nthawe na nthawe kuyayendela maofesi a nthambi kuti apeleke malangizo ku Komiti ya Nthambi okhuza mwangakatile ntchito yawo. (Miyambo 11:14) Ponkhala pulogilamu yapadela, soti woyendela nthambi olaŵila nkhani yutang’isha onse m’dela ya nthambi yamene iyo.

Oyavya mipingo. Abale audindo ku ofesi ya nthambi ovomekeja kuti mipingo inkhazikishiwe. Oyanganila soti ntchito ya apainiya, amishonale na opanamila madela amene otumikila m’dela ya nthambi yamene iyo. Okonza misonkhano ikulu-ikulu, oyanganila ntchito yomanga Ng’anda za Ufumu soti osimikijila kuti mabuku yotumijiwa ku mipingo. Ntchito zonse zuchitika ku ofesi ya nthambi zuyavya kuti nchito yolalikila ikoyenda mwadongosolo.​—1 Akorinto 14:33, 40.

• Kansi Makomiti a Nthambi oyavya Bungwe Yutonga m’njila yotyani?

• Kansi ofesi ya nthambi yusamalila ntchito zotyani?