Mukochinja-chinja mphamvu ya mawu. Kwejani mphamvu ya mawu ŵanu kuti mumvwikishe mfundo ikulu komasoti kuti mukulishe chidwi cha omvwishila. Chitani chimozi-mozi pamuŵelenga Malemba amene olaŵila uthenga wachiweluzo. Chefyani mphamvu ya mawu kuti mukulishe chifuno cha omvwishila komasoti kuti muwoneshe mfundo yamene ingachitishe nkhaŵa olo wowa omvwishila.

Mukochinja-chinja kamvwikidwe ka mawu. Keno n’vololeka m’chilaŵilo chanu, mungakwejeko kamvwikidwe ka mawu kuti muoneshe chidwi, kukula kwa chinthu olo kutalimpha kwake. Chefyani kamvwikidwe ka mawu ŵanu kuti muwoneshe chisoni olo nkhaŵa.

Kufulumila olo kuchelwa polaŵila. Mukolaŵila mofulumila pofotokoza uthenga wokondwelesha. Mukolaŵila mochelwa pofotokoza mfundo yofunika ngako.